ក្រុមកីឡាករ កីឡាការិនីហាប់គីដូកម្ពុជាបានរួមគ្នាបង្កើតប្រវត្តិសាស្រ្តដ៏ត្រចះត្រចង់មួយសម្រាប់ការចេញទៅប្រកួតនៅលើឆាកអន្តរជាតិជាលើកដំបូងរបស់ខ្លួន តាមរយៈការដណ្តើមបានមេដាយសរុបចំនួន៤០ ពីការប្រកួតកីឡាហាប់គីដូជ្រើសរើសជើងឯកពិភពលោក (World I.H.F Hapkido Championship 2024) នៅប្រទេសថៃ។
តាមរយៈការប្រកួត ដោយបានចាប់ផ្តើមពីថ្ងៃទី២ និងបានបញ្ចប់កាលពីថ្ងៃទី៤ ខែសីហា ឆ្នាំ២០២៤នេះ កីឡាករ កីឡាការិនីហាប់គីដូទាំង ១៩នាក់ (ស្រី៨នាក់) របស់កម្ពុជាបានឈ្នះមេដាយគ្រប់ៗគ្នាពីការប្រកួត World I.H.F Hapkido Championship 2024 ដែលមានសរុបចំនួន ៤០ ក្នុងនោះមានមេដាយមាស ១២ ប្រាក់ ១៣ និងសំរឹទ្ធ១៥។
ជាមួយលទ្ធផលដ៏ជោគជ័យនេះបានបង្ហាញថា នៅក្នុងចំណោមអត្តពលិកហាប់គីដូទាំង ១៩នាក់របស់កម្ពុជា គឺមានអ្នកខ្លះបានឈ្នះមេដាយចំនួន ៥តែម្នាក់ឯង ហើយមួយចំនួនទៀតបានឈ្នះ៤ ឈ្នះ៣ ឈ្នះ២ និងតិចបំផុតឈ្នះបានមេដាយ១ ព្រោះការប្រកួតនេះ គណៈកម្មការអនុញ្ញាតឱ្យអត្តពលិកម្នាក់អាចប្រកួតបានចំនួន៥ វិញ្ញាសាដោយកំណត់ទៅតាមប្រភេទអាយុ។
លោក គង់ ចាន់ធីណា គ្រូបង្វឹកសហព័ន្ធខ្មែរកីឡាហាប់គីដូដែលបានដឹកនាំកីឡាករកីឡាការិនីកម្ពុជាទៅចូលរួមការប្រកួតជើងឯកពិភពលោកនៅប្រទេសថៃនេះ បានប្រាប់ថា៖ «កីឡាករ កីឡាការិនីរបស់យើងបានឈ្នះមេដាយគ្រប់ៗគ្នាពីការប្រកួតនេះ ហើយនេះជាជោគជ័យដ៏ធំបំផុត ព្រោះមុនការប្រកួតយើងមិនហ៊ានសង្ឃឹមដល់ការដណ្តើមបានមេដាយផង ប៉ុន្តែចុងក្រោយ ពួកយើងដណ្តើមបានមេដាយសរុបរហូតដល់៤០ គឺមេដាយមាស១២ ប្រាក់១៣ និងសំរឹទ្ធ១៥»។
យ៉ាងណាក៏ដោយ ចំពោះចំនួនមេដាយនេះ លោក គង់ ចាន់ធីណា បានប្រាប់ថា នៅក្នុងតារាងចំណាត់មេដាយរបស់គណៈកម្មការរៀបចំការប្រកួតរបស់ថៃ គឺបានដាក់ឱ្យកម្ពុជា ឈ្នះបានមេដាយសរុបត្រឹម៣៨ទេ ក្នុងនោះមានមេដាយមាស១១ ប្រាក់១៣ និងសំរឹទ្ធ១៤ ហើយបញ្ហានេះត្រូវបានលោក ចាន់ធីណា បង្ហើបថា វាអាចមកពីបញ្ហាបច្ចេកទេស ដោយលោកនឹងបញ្ជាក់សាជាថ្មី នៅពេលធ្វើមកដល់កម្ពុជាវិញ។
យ៉ាងណាក៏ដោយ ជាមួយលទ្ធផលដ៏ល្អនេះ វានៅតែជួយឱ្យក្រុមហាប់គីដូកម្ពុជា បានឈរនៅចំណាត់ចំណាត់ថ្នាក់លេខ២ បន្ទាប់ពីម្ចាស់ផ្ទះថៃ ដែលបានឈ្នះមេដាយមាសច្រើនជាងគេ ខណៈព្រឹត្តិការណ៍ World I.H.F Hapkido Championship 2024 នេះ មាន ១២ប្រទេសចូលរួម រួមមានសហរដ្ឋអាមេរិក ប្រេស៊ីល អូស្រ្តាលី អាល្លឺម៉ង់ អ៊ីរ៉ង់ ឥណ្ឌា កូឡុំប៊ី កម្ពុជា មីយ៉ាន់ម៉ា ឡាវ នេប៉ាល់ និងម្ចាស់ផ្ទះថៃ ដែលមានក្រុមអត្តពលិកច្រើនជាងគេ។
គួរបញ្ជាក់ថា សហព័ន្ធខ្មែរកីឡាហាប់គីដូកម្ពុជា បានបញ្ចូនប្រតិភូកីឡាចំនួន ២៤នាក់ទៅចូលរួមការប្រកួតកីឡាហាប់គីដូជើងឯកពិភពលោកនៅប្រទេសថៃនេះ ដោយមានលោក ម៉ុក សាំងហ៊ុន ជាប្រធានប្រតិភូនិងលោក ឃីម ណារិទ្ធ ជាប្រតិភូរង និងគ្រូបង្វឹក លោក គង់ ចាន់ធីណា អមដោយគ្រូជំនួយ ២នាក់ និងកីឡាករ ១១នាក់និងកីឡាការិនី ៨នាក់។
បើតាមលោក គង់ ចាន់ធីណា បានឱ្យដឹងថា ប្រតិភូកីឡាហាប់គីដូកម្ពុជា ដែលធ្វើដំណើរដោយឡានក្រុងនោះ នឹងនាំយកមេដាយទទួលបានពីការប្រកួត World I.H.F Hapkido Championship 2024 មកដល់ពហុកីឡដ្ឋានជាតិអូឡាំពិក រាជធានីភ្នំពេញ នាអំឡុងម៉ោង៤ ថ្ងៃអង្គារនេះ។
ជាមួយគ្នានេះ លោកនាយករដ្ឋមន្រ្តី ហ៊ុន ម៉ាណែត ក៏បានបង្ហោះសារអបអរសាទរដល់ក្រុមកីឡាហាប់គីដូកម្ពុជាផងដែរ។
លោកបានបង្ហោះនៅលើផេចហ្វេសប៊ុកផ្លូវការរបស់លោក នាម៉ោង ១២:៣១ ថ្ងៃនេះថា៖ «អបអរសាទរ ក្រុមកីឡាករ កីឡាការិនីហាប់គីដូកម្ពុជាដែលឈ្នះបានមេដាយ ៤០គ្រឿងក្នុងព្រឹត្តិការណ៍ជើងឯកពិភពលោកដោយក្នុងនោះរួមមានមេដាយមាស ១២គ្រឿង មេដាយប្រាក់១៣គ្រឿង និងមេដាយសំរឹទ្ធ១៥គ្រឿង»៕
