ក្រុមកីឡាករប្រណាំងកង់កម្ពុជា បានថតរូបរួមគ្នាជាមួយថ្នាក់ដឹកនាំសហព័ន្ធ គ្រូបង្វឹក និងតំណាងក្លិបនានា ដែលបានចូលរួមមហាសន្និបាត កាលពីថ្ងៃចន្ទ។ រូបថត NOCC
គណៈកម្មាធិការប្រតិបត្តិសហព័ន្ធកីឡាទោចក្រយានកម្ពុជា និង តំណាងក្លិបដែលចំណុះឱ្យសហព័ន្ធ បានសម្រេចរក្សាទុកថ្នាក់ដឹកនាំជាក្បាលម៉ាស៊ីនចាស់ ឱ្យបន្តដឹកនាំអាណត្តិថ្មីរយៈពេល ៤ឆ្នាំទៀត ហើយវាក៏ជាអាណត្តិ ដែលមន្រ្តីជំនាញរបស់សហព័ន្ធនេះ ដាក់គោលដៅស្វែងរកមេដាយមាសជូនជាតិ សម្រាប់ការប្រកួតនៅលើឆាកអន្តរជាតិផងដែរ ជាពិសេសការប្រកួតស៊ីហ្គេម។
នៅក្នុងមហាសន្និបាត បញ្ចប់អាណត្តិទី៤ និងបន្តអាណត្តិទី៥ ឆ្នាំ២០២៤-២០២៨ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) កាលពីថ្ងៃចន្ទ អង្គមហាសន្និបាត បានសម្រេចដោយការលើកដៃ ក្នុងការគាំទ្រ លោក ប៉ាន សូរស័ក្កិ ឱ្យបន្តធ្វើជាប្រធានសហព័ន្ធកីឡាទោចក្រយានកម្ពុជា រីឯលោក កឹម សុខុន លោក វង្ស ខាន់ពៅ និងលោក ឡាយ សុខសៅគន្ធា ជាអនុប្រធាន។
ចំណែកលោក នូ ចំរើន ត្រូវបានគាំទ្រឱ្យបន្តធ្វើជាអគ្គលេខាធិការ លោក ព្រែរ អ៊ីវកាទ្រី និងលោក សុខ ដារិទ្ធិ ជាអគ្គលេខាធិការរង ហើយកញ្ញា សួង ចាន់តូរ៉ាទី ជាអគ្គហិរញ្ញិក រីឯលោក ឡុង កែមវិចិត្រ លោក អ៊ូច សាវិន កញ្ញា មាស តឿ លោក សែម ប៊ុតឌី និងលោក ខ្លូត ករណី ជាសមាជិកសហព័ន្ធកីឡាទោចក្រយានកម្ពុជា ក្នុងអាណត្តិថ្មីនេះ។
យ៉ាងណាក៏ដោយ ប្រធានសហព័ន្ធលោក ប៉ាន សូរស័ក្កិ មិនមានវត្តមាននៅក្នុងមហាសន្និបាតនោះទេ ព្រោះលោកជាប់បំពេញភារកិច្ចនៅក្រៅប្រទេស ចំណែក លោក កឹម សុខុន ជាអនុប្រធាន និងជាប្រធានដឹកនាំអង្គមហាសន្និបាត បានវាយតម្លៃខ្ពស់ចំពោះសមាជិកប្រតិបត្តិអាណត្តិចាស់ ដែលបានខិតខំប្រឹងប្រែងបំពេញតួនាទីរបស់ខ្លួនបានយ៉ាងល្អ ដើម្បីរួមគ្នាជួយជំរុញឱ្យសហព័ន្ធទោចក្រយាន្តកម្ពុជា មានការអភិវឌ្ឍ និងឈានដល់ការបង្កើតបានប្រវត្តិសាស្រ្តឈ្នះបានមេដាយប្រាក់១ និងសំរឹទ្ធ១ ពីការប្រកួតស៊ីហ្គេម លើកទី៣២ ឆ្នាំ២០២៣ ដែលកម្ពុជា ធ្វើជាម្ចាស់ផ្ទះ។
ជាមួយគ្នានេះ លោក កឹម សុខុន បានឯកភាពលើទិសដៅផែនការយុទ្ធសាស្ត្រសំខាន់ៗក្នុងអាណត្តិថ្មី រួមជាមួយការអនុម័តលើរបាយការណ៍ហិរញ្ញវត្ថុ ការធ្វើវិសោធនកម្ម លក្ខន្តិកៈ និងបទបញ្ជាផ្ទៃក្នុងរបស់សហព័ន្ធ សម្រាប់អាណត្តិទី៥ ឆ្នាំ២០២៤-២០២៨ ហើយលោកក៏បានផ្តល់ការជឿជាក់លើគណៈកម្មាធិការប្រតិបត្តិអាណត្តិថ្មី ក្នុងការឈានទៅទទួលបានសមិទ្ធផលថ្មីៗបន្ថែមទៀត។
សហព័ន្ធកីឡាទោចក្រយានកម្ពុជា បានធ្វើមហាសន្និបាតបញ្ចប់អាណត្តិ៤ និងបន្តអាណត្តិទី៥ ឆ្នាំ២០២៤-២០២៨ នៅ NOCC កាលពីថ្ងៃទី១៦ ខែកញ្ញា។ រូបថត NOCC
លោកបានបញ្ជាក់ថា៖ «តាមសមិទ្ធផល ដែលយើងសម្រេចសម្រាប់អាណត្តិចាស់កន្លងមកនេះ យើងសង្ឃឹមជឿជាក់ថា គណៈកម្មាធិការប្រតិបត្តិសហព័ន្ធថ្មី នឹងបន្តដឹកនាំសហព័ន្ធកីឡាទោចក្រយានកម្ពុជា ឱ្យកាន់តែមានប្រសិទ្ធភាពល្អប្រសើរ និងទទួលបានជោគជ័យថ្មីៗបន្ថែមទៀត»។
ចំណែកលោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា បានចាត់ទុកការដណ្តើមបានមេដាយប្រាក់១ និងសំរឹទ្ធ១ របស់កីឡាករ ឃឹម ម៉េងឡុង លើប្រភេទកីឡាកង់ភ្នំ ក្នុងព្រឹត្តិការណ៍ស៊ីហ្គេម ឆ្នាំ២០២៣ ជាលទ្ធផលដ៏អស្ចារ្យជាកំណត់ត្រាប្រវត្តិសាស្រ្ត ហើយតាមរយៈការធ្វើម្ចាស់ផ្ទះស៊ីហ្គេម ឆ្នាំ២០២៣នោះ ក៏បានបង្ហាញឱ្យឃើញពីភាពរីកចម្រើនផ្នែកធានធានមនុស្ស ដែលមន្រ្តីបច្ចេកទេសរបស់សហព័ន្ធភាគច្រើន មានសមត្ថភាពអាចបំពេញការងារជាមួយអ្នកជំនាញមកពីអន្តរជាតិបានល្អ។
លោក ចំរើន បាននិយាយថា៖ «ចំពោះសមិទ្ធផល សម្រាប់អាណត្តិចាស់ គឺយើងបានទទួលមេដាយពីការប្រកួតស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្រ្ត ហើយយើងបណ្តោះបណ្តាលធនធានមនុស្សបានច្រើនទាំងគ្រូបង្វឹក មន្រ្តីបច្ចេកទេស និងកីឡាករ កីឡាការិនី ហើយទិសដៅទៅមុខ គឺការជ្រើសរើសកីឡាករកីឡាការិនីថ្នាល សម្រាប់ត្រៀមការប្រកួតកីឡាយុវជនអាស៊ី ឆ្នាំ២០២៩ ដែលកម្ពុជាធ្វើជាម្ចាស់ផ្ទះ»។
គណៈកម្មាធិការប្រតិបត្តិសហព័ន្ធកីឡាទោចក្រយានកម្ពុជា និងតំណាងក្លិបទាំងអស់ បានលើកដៃគាំទ្រសមាសភាពថ្នាក់ដឹកនាំអាណត្តិថ្មី នៅក្នុងមហាសន្និបាត។ រូបថត NOCC
លោកបន្ថែមថា៖ «យើងមិនបានបញ្ចប់មហិច្ឆតាត្រឹមការប្រកួតស៊ីហ្គេម ឆ្នាំ២០២៣នោះទេ គឺយើងមានមហិច្ឆតាបន្ថែមទៀត ដោយត្រូវធ្វើការអភិវឌ្ឍឱ្យបានខ្លាំងទាំងលើគ្រូបង្វឹក និងកីឡាករ ពិសេសយើងត្រូវរៀបចំទីលានហ្វឹកហាត់ស្តង់ដា ព្រោះទីលានមានសារសំខាន់ នៅពេលយើងធ្វើម្ចាស់ផ្ទះ វាជាអាទិភាពរបស់យើង អ៊ីចឹងយើងត្រូវធ្វើការជាមួយក្រុមយុវជនឱ្យបានច្រើន ចាប់ពីឆ្នាំ២០២៤នេះទៅ»។
ជាមួយគ្នានេះ សហព័ន្ធកីឡាទោចក្រយានកម្ពុជា ក៏យកចិត្តទុកដាក់ទៅលើការអភិវឌ្ឍក្រុមមនុស្សធំ។ លោក នូ ចំរើន ថា សហព័ន្ធ នឹងរៀបចំឱ្យមានការបោះជំរំហ្វឹកហាត់នៅខេត្តកំពត និងខេត្តពោធិ៍សាត់ លើប្រភេទកីឡាកង់ភ្នំ ដើម្បីត្រៀមការប្រកួតស៊ីហ្គេម លើកទី៣៣ ឆ្នាំ២០២៥នៅប្រទេសថៃ ដែលក្រុមកង់ភ្នំ មានមហិច្ឆតាស្វែងរកមេដាយមាសជូនជាតិ។
អគ្គលេខាធិការរូបនេះ បានបញ្ជាក់ថា៖ «យើងចង់រក្សាចំនួនមេដាយ ដែលយើងធ្លាប់បាន កាលស៊ីហ្គេម ឆ្នាំ២០២៣ និងបន្ថែមមហិច្ឆតាក្នុងការយកមេដាយមាស ព្រោះការដាក់មហិច្ឆតាដណ្តើមយកមេដាយមាសកន្លងមក យើងធ្វើមិនបាន ដោយបានត្រឹមមេដាយប្រាក់ និងសំរឹទ្ធ អ៊ីចឹងយើងត្រូវធ្វើការងារឱ្យបានកាន់តែខ្លាំង ដើម្បីស្វែងរកមេដាយមាសជូនជាតិ និងអ្នកគាំទ្រ»៕
