
សកម្មភាពប្រកួតប្រដាល់គុនខ្មែរ នៅលើសង្វៀនរបស់ស្ថានីយទូរទស្សន៍ក្នុងស្រុក ដែលត្រូវបានធ្វើឡើង នៅរៀងរាល់ចុងសប្តាហ៍។ រូបថត សហការី
សហព័ន្ធកីឡាប្រដាល់គុនខ្មែរ បានធ្វើការព្រមានជាលាយល័ក្ខអក្សរ និងប្រកាសជាសាធារណៈដល់កីឡាករចំនួន១៥នាក់ ដែលបានចាប់គូប្រកួត ដោយសម្រាកមានរយៈពេលតិចជាង២សប្តាហ៍ ហើយអ្នកទាំងនេះ នឹងត្រូវពិន័យមិនឱ្យចាប់គូឡើងប្រកួតរយៈពេល៦សប្តាហ៍ បើសិនជាពួកគេ នៅតែប្រព្រឹត្តល្មើសទៅនឹងលក្ខន្តិកៈ បទបញ្ជាផ្ទៃក្នុង និងបទបញ្ជាគ្រប់គ្រងការប្រកួតរបស់សហព័ន្ធ ជាលើកទី២នោះ។
សេចក្តីសម្រេចស្តីពីការដាក់ពិន័យកីឡាករ ដែលប្រកួតសម្រាកមានរយៈពេលតិចជាង២សប្តាហ៍នេះ គឺត្រូវបានធ្វើឡើងតាមការចង្អុលបង្ហាញរបស់លោក ខូវ ឆាយ ជាប្រធានសហព័ន្ធកីឡាប្រដាល់គុនខ្មែរ ដើម្បីពង្រឹងលក្ខន្តិកៈ បទបញ្ជាផ្ទៃក្នុង និងបទបញ្ជាគ្រប់គ្រងការប្រកួតរបស់សហព័ន្ធឱ្យមានប្រសិទ្ធភាពខ្ពស់។
សហព័ន្ធកីឡាប្រដាល់គុនខ្មែរ បានបញ្ជាក់នៅក្នុងប្រការ១នៃសេចក្តីសម្រេច កាលពីថ្ងៃពុធ ម្សិលមិញថា៖ «ដាក់ពិន័យ ជាការព្រមានជាលាយល័ក្ខអក្សរ និងប្រកាសជាសាធារណៈដល់កីឡាករ ដែលបានចាប់គូប្រកួត ដោយសម្រាកមានរយៈពេលតិចជាង២សប្តាហ៍»។
ចំពោះកីឡាករទាំង១៥នាក់ ដែលទទួលរងការព្រមាននេះ រួមមានកីឡាករ ធន់ គឹមឡុង, ធន់ អៀងឡុង មកពីមជ្ឈមណ្ឌលកីឡាកងយោធពលខេមរភូមិន្ទ កីឡាករ រិទ្ធី មាន់ព្រៃ មកពីក្លិប Super Fight & GYM កីឡាករ សោម ពិសិដ្ឋ, ឡូញ វ៉ាន់ឌី របស់ក្លិបវិបុលដារិទ្ធិខណ្ឌពោធិ៍សែនជ័យ កីឡាករ ជុន រាត្រី ក្លិបកងពលតូចដឹកជញ្ជូនលេខ៩០។
កីឡាករ ម៉ន ភារម្យ ក្លិបការិយាល័យទី៥កងទ័ពជើងគោក កីឡាករ ម៉ាលី អគ្គីនេត្រ ក្លិបសុម៉ាលីគុនខ្មែរ កីឡាករ សឹង្ហ ឡេង ក្លិបអេភូថងកីឡា កីឡាករ ឆួន បួន ក្លិបបញ្ជាការដ្ឋានទ័ពពិសេស កីឡាករ ខន ទិត្យវិច្ឆិកា ក្លិបតាឡីដំរីមានរិទ្ធ កីឡាករ សូត្រ ខេវិន និង សូត្រ ប៊ុនធី របស់ក្លិបបក្សីស្លាបដែក កីឡាករ ហាប់ ខា ក្លិបនាគរាជចតុមុខ និងកីឡាករ នី នរមហាអាគមន៍ របស់ក្លិបខ្លារខិនមានរិទ្ធ។
ជាមួយគ្នានេះ សហព័ន្ធកីឡាប្រដាល់គុនខ្មែរ ក៏បានបង្ហាញពីជំហរដាក់ពិន័យទៅលើកីឡាករ ដែលបន្តប្រព្រឹត្តខុសជាលើកទី២ផងដែរ ដោយបញ្ជាក់ថា៖ «ករណីកីឡាករ ដែលមានឈ្មោះដូចប្រការ១ ប្រព្រឹត្តខុសដោយចាប់គូប្រកួត សម្រាកតិចជាង២សប្តាហ៍ ជាលើកទី២ ត្រូវដាក់ពិន័យមិនអនុញ្ញាតឱ្យចាប់គូចូលរួមប្រកួតរយៈពេល៦សប្តាហ៍។ រាល់សេចក្តីសម្រេចទាំងឡាយណា ដែលផ្ទុយនឹងសេចក្តីសម្រេចនេះ ទុកជានិរាករណ៍»។
ជាមួយគ្នានេះ លោក ខូវ ឆាយ បានដាក់កំហិតឱ្យគណៈកម្មាធិការប្រតិបត្តិសហព័ន្ធកីឡាប្រដាល់គុនខ្មែរ អគ្គលេខាធិការ អនុគណៈកម្មការបច្ចេកទេស ដៃគូអភិវឌ្ឍ ស្ថានីយទូរទស្សន៍ពាក់ព័ន្ធ ក្រុមហ៊ុនពាក់ព័ន្ធ សមាគម ក្លិប និងសាមីខ្លួន ត្រូវអនុវត្តសេចក្តីសម្រេចនេះ ឱ្យមានប្រសិទ្ធភាពខ្ពស់ ចាប់ពីថ្ងៃចុះហត្ថលេខានេះតទៅ។

លោក ខូវ ឆាយ ពេលថ្លែងក្នុងកម្មវិធីប្រដាល់ថ្នាល «អារាមគុនខ្មែរ» នៅខេត្តបាត់ដំបង ខណៈពេលនេះ លោកចាប់ផ្តើមអនុវត្តវិធានការដាក់ពិន័យទៅលើកីឡាករដែលប្រកួតសម្រាកមានរយៈពេលតិចជាង២សប្តាហ៍។ រូបថត សហព័ន្ធ
គួរបញ្ជាក់ថា ការសម្រេចដាក់ពិន័យទៅលើកីឡាករ ដែលប្រកួតសម្រាកមានរយៈពេលតិចជាង២សប្តាហ៍នេះ ត្រូវបានសហព័ន្ធកីឡាប្រដាល់គុនខ្មែរ អនុវត្តជាលើកដំបូង បន្ទាប់ពីកីឡាករ ក៏ដូចជាគ្រូបង្វឹករបស់ក្លិបមួយចំនួន នៅតែបំពានលក្ខន្តិកៈ បទបញ្ជាផ្ទៃក្នុង និងបទបញ្ជាគ្រប់គ្រងការប្រកួត ដែលសហព័ន្ធ បានកំណត់ គឺបន្ទាប់ពីប្រកួតហើយ គ្រប់កីឡាករទាំងអស់ ត្រូវសម្រាកយ៉ាងតិចរយៈពេល២សប្តាហ៍ ទើបអនុញ្ញាតឱ្យចាប់គូឡើងប្រកួតទៀត។
ការធ្វើបែបនេះ គឺដើម្បីផ្តល់ឱកាសឱ្យកីឡាករជំនាន់ក្រោយ ក៏ដូចជាកីឡាករមិនទាន់មានឈ្មោះបោះសំឡេង បានឡើងប្រកួតនៅតាមសង្វៀនផ្សេងៗដែរ ព្រោះកន្លងមកនេះពួកគេ ស្ទើរតែគ្មានឱកាសបានឡើងប្រកួតសោះ។
ផ្ទុយទៅវិញ ចំពោះកីឡាករដែលមានសមត្ថភាព និងប្រជាប្រិយភាពខ្លាំង បែរជាទទួលបានឱកាសឡើងប្រកួតស្ទើររាល់សប្តាហ៍ ហើយបញ្ហានេះ ក៏ជាហានិភ័យធ្វើឱ្យខូចដល់កីឡាករផងដែរ៕