ពហុកីឡដ្ឋានជាតិមរតកតេជោ ពេលរៀបចំពិធីបើក-បិទ ការប្រកួតស៊ីហ្គេម លើកទី៣២ ឆ្នាំ២០២៣។ រូបថត សហការី
រដ្ឋាភិបាលចិនបានសម្រេចទទួលយកនូវគម្រោងសំណើរធំៗចំនួន២របស់កម្ពុជា គឺគម្រោងជំនួយផ្នែកការហ្វឹកហាត់កីឡាកម្រិតខ្ពស់របស់ក្រុមជម្រើសជាតិកម្ពុជា នៅប្រទេសចិន និងគម្រោងជួយបច្ចេកទេសក្នុងការបន្តថែទាំពហុកីឡដ្ឋានជាតិមរតកតេជោ ដែលត្រូវបានសាងសង់ឡើងក្រោមជំនួយឥតសំណងរបស់រដ្ឋាភិបាលចិនដូចគ្នា។
ការបើកភ្លើងខៀវទទួលយកសំណើរទាំង២របស់កម្ពុជានេះ គឺធ្វើតាមរយៈលោក Zeng Huacheng អគ្គនាយករងនៃក្រសួងពាណិជ្ជកម្មប្រទេសចិន នៅពេលលោកបានដឹកនាំប្រតិភូចិន និងតំណាងស្ថានទូតចិនប្រចាំនៅកម្ពុជា មកជួបពិភាក្សាការងារជាមួយលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាគណៈកម្មាធិការជាតិអូឡាំពិកកម្ពុជា (NOCC) កាលពីថ្ងៃទី១២ ខែមីនា។
ជុំវិញការងារនេះ លោក វ៉ាត់ ចំរើន បានប្រាប់ប្រព័ន្ធផ្សព្វផ្សាយថា គម្រោងនៃការផ្ដល់ជំនួយនេះ គឺជាជំនួយឥតសំណងរដ្ឋាភិបាលចិន តាមរយៈក្រសួងពាណិជ្ជកម្មចិន ផ្ដល់មកឱ្យរាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ ដោយមាន NOCC និងក្រសួងអប់រំ យុវជន និងកីឡា ជាអ្នកសម្របសម្រួល។
តាមរយៈការពិភាក្សាជាមួយលោក Zeng Huacheng នៅទីស្នាក់ការ NOCC កាលពីថ្ងៃពុធនោះ ភាគីចិន បានផ្ដល់នូវដំណឹងល្អ ពាក់ព័ន្ធឹងគម្រោងជំនួយចំនួន២របស់កម្ពុជា គឺទី១ គម្រោងជំនួយផ្នែកការហ្វឹកហាត់នៅចិន សម្រាប់ឆ្នាំ២០២៥ ដែលបេសកកម្មនេះ ក្រុមការងារជំនាញពិសេសរបស់ចិន នឹងចុះមកធ្វើការជាមួយក្រុមកីឡាជម្រើសជាតិកម្ពុជា និងធ្វើការពិភាក្សាបន្ថែមជាមួយ NOCC ទៅលើការត្រៀមរៀបចំបញ្ជូនកីឡាករ កីឡាការិនី ១៦១នាក់ ដែលត្រូវចេញទៅហ្វឹកហាត់នៅចិន ត្រៀមស៊ីហ្គេម លើកទី៣៣ ឆ្នាំ២០២៥។
លោក Zeng Huacheng ពេលដឹកនាំក្រុមប្រតិភូចិន មកពិភាក្សាគ្នាជាមួយលោក វ៉ាត់ ចំរើន នៅទីស្នាក់ការ NOCC កាលពីថ្ងៃទី១២ ខែមីនា។ រូបថត NOCC
លោក វ៉ាត់ ចំរើន បន្ថែមថា៖ «គម្រោងនេះ មិនត្រឹមជាជំនួយត្រឹមឆ្នាំ២០២៥នោះទេ តែជាគម្រោងជំនួយរហូតដល់ឆ្នាំ២០២៩ សម្រាប់គោលដៅនៃការធ្វើម្ចាស់ផ្ទះកីឡាយុវជនអាស៊ី ឆ្នាំ២០២៩ នៅកម្ពុជា អ៊ីចឹងកិច្ចពិភាក្សាគ្នាបានផ្ដោតការយកចិត្តទុកដាក់ទៅលើការត្រៀមលក្ខណៈ ដែលរដ្ឋាភិបាលចិន បានផ្ដល់នូវភ្លើងខៀវថា គម្រោងសំណើរនៃការទទួលការហ្វឹកហាត់នៅសាធារណរដ្ឋប្រជាមានិតចិននេះ ត្រូវបានរដ្ឋាភិបាលចិនទទួលយក និងមានការគាំទ្រទាំងស្រុង»។
«ប៉ុន្ដែនៅនីតិវិធីនៃការរៀបចំបច្ចេកទេសឱ្យបានល្អ ហើយនឹងទទួលនូវកិច្ចសហប្រតិបត្តិ និងកិច្ចសន្យាជាមួយគ្នាក្នុងកម្រិតជំនាញពិសេស ដើម្បីទទួលយកនូវការទទួលខុសត្រូវគ្នាទៅវិញទៅមក នៅក្នុងគម្រោងនេះ»។ លោក វ៉ាត់ ចំរើន បានបន្ថែម។
ចំពោះគម្រោងជំនួយផ្នែកការហ្វឹកហាត់កីឡាកម្រិតខ្ពស់របស់ក្រុមជម្រើសជាតិកម្ពុជា នៅប្រទេសចិន លើកនេះ លោក វ៉ាត់ ចំរើន បានបញ្ជាក់ថា វាដូចគ្នាទៅនឹងគម្រោង ដែលកម្ពុជា ធ្លាប់បានទទួលមុនស៊ីហ្គេម លើកទី៣២ ឆ្នាំ២០២៣ដែរ គឺកីឡាករ កីឡាការិនីជម្រើសជាតិកម្ពុជា បានទៅហ្វឹកហាត់នៅចិន មុនស៊ីហ្គេម ក្រោមការជួយឧបត្ថម្ភទាំងស្រុងពីមិត្ដចិន ទាំងលើការស្នាក់នៅ ហូបចុក សំបុត្រយន្ដហោះ និងការហ្វឹកហាត់នៅទីនោះ ហើយក៏មានគម្រោងបញ្ជូនគ្រូបង្វឹកជំនាញប្រភេទកីឡាល្អៗមួយចំនួន មកបង្ហាត់បន្ថែមនៅកម្ពុជាផងដែរ។
ដោយឡែក ចំពោះគម្រោងស្នើសុំបន្ដជួយការថែទាំពហុកីឡដ្ឋានជាតិមរតកតេជោ លោក វ៉ាត់ ចំរើន បានបញ្ជាក់ថា៖ «គម្រោងនេះ យើងបានទទួលដំណឹងថា ពហុកីឡដ្ឋានជាតិមរតកតេជោ គឺមានការស្នើសុំបន្ដជួយការថែទាំ ព្រោះការថែទាំមានលក្ខណៈស្មុគស្មាញ និងពិសេស អ៊ីចឹងគម្រោងស្នើសុំការជួយបច្ចេកទេសក្នុងការថែទាំបន្ដនេះ គឺរដ្ឋាភិបាលចិន ក៏បានចាប់អារម្មណ៍ និងគាំទ្រទាំងស្រុងដែរ»។
ចំពោះការបើកភ្លើងខៀវ ទទួលយកនូវគម្រោងសំណើរធំៗចំនួន២របស់កម្ពុជា ពីសំណាក់រដ្ឋាភិបាលចិន ខាងលើនេះ លោក វ៉ាត់ ចំរើន បានធ្វើការវាយតម្លៃជារួម ប្រកបដោយភាពជឿជាក់ថា៖ «យើងសង្ឃឹមថា ជំនួយឥតសំណង់របស់រដ្ឋាភិបាលចិន លើកនេះ នឹងធ្វើឱ្យពហុកីឡដ្ឋានជាតិមរតកតេជោ ក៏ដូចជាគុណផលកីឡារបស់ក្រុមជម្រើសជាតិយើង នឹងទទួលបានលទ្ធផលល្អបន្ថែមទៀត ក្នុងការត្រៀមចូលរួមការប្រកួតស៊ីហ្គេម ចុងឆ្នាំ២០២៥នេះ នៅប្រទេសថៃ»៕
