ក្រុមព្រះខ័នរាជស្វាយរៀង បានក្លាយជាម្ចាស់ជើងឯកលីគកំពូលកម្ពុជា មុនពេលកំណត់ ក្រោយឈ្នះ៣ពិន្ទុ ពីណាហ្គាវើលដ៍ ពីយប់មិញ។ រូបថត ស្វាយរៀង
ការស៊ុតបាល់បញ្ចូលទី នៅនាទីទី ៩០+៧ របស់ខ្សែការពារជប៉ុន Takashi Odawara បានជួយឱ្យក្រុមព្រះខ័នរាជស្វាយរៀង ឈ្នះក្រុមណាហ្គាវើលដ៍ ២-១ កាលពីយប់មិញ ហើយក៏ជាជ័យជម្នះ ជួយឱ្យក្រុមនេះបានសម្រេចគោលដៅ ឈ្នះពានលីគកំពូលកម្ពុជា មុនពេលកំណត់ផងដែរ ទោះនៅសល់២ប្រកួតទៀត។
សម្រាប់ការប្រកួត ដែលធ្វើនៅកីឡដ្ឋានស្វាយរៀង កាលពីយប់ថ្ងៃពុធ ម្សិលមិញនេះ ខ្សែប្រយុទ្ធប្រេស៊ីល Roque Cristian បានរកគ្រាប់បាល់នាំមុខឱ្យក្រុមម្ចាស់ផ្ទះ ព្រះខ័នរាជស្វាយរៀង តាមរយៈការស៊ុតបញ្ចូលទីយ៉ាងស្អាត នៅនាទីទី១៦ ប៉ុន្តែកីឡាករជប៉ុន Hugo Kametani បានស៊ុតគ្រាប់បាល់តាមស្មើ ឱ្យក្រុមណាហ្គាវើលដ៍វិញ នៅនាទីទី៥០។
លទ្ធផលស្មើគ្នា ១-១ នេះបានអូសបន្លាយរហូតដល់នាទីបន្ថែម ៩០+៦ ដែលគេមិនរំពឹងថា ស្វាយរៀង អាចរកបានគ្រាប់បាល់ជ័យជម្នះ នៅក្នុងរយៈពេល២នាទីចុងក្រោយនោះទេ។ ប៉ុន្តែសម្រែកហ៊ោកញ្ជ្រៀវរបស់អ្នកគាំទ្រ បានផ្ទុះលាន់រំពងពេញកីឡដ្ឋាន នៅពេលពួកគេឃើញខ្សែការពារជប៉ុន Takashi Odawara បានស៊ុតបាល់ភ្លាតចេញពីដៃអ្នកចាំទី រ៉េត លីហេង បញ្ចូលទីបានយ៉ាងល្អ នៅនាទីទី ៩០+៧ នោះ។
គ្រាប់បាល់របស់ Takashi Odawara បានក្លាយជាជ័យជម្នះយ៉ាងធំបំផុត សម្រាប់ក្រុមស្វាយរៀង និងអ្នកគាំទ្ររបស់ក្លិបមានមូលដ្ឋាននៅខេត្តស្វាយរៀងមួយនេះ ព្រោះវាជាគ្រាប់បាល់ ដែលជួយឱ្យ ស្វាយរៀង ឈ្នះណាហ្គាវើលដ៍ ២-១ ដើម្បីសម្រេចគោលដៅ ឈ្នះពានលីគកំពូលកម្ពុជា មុនពេលកំណត់ ទោះនៅសល់២ប្រកួតក្នុងដៃទៀត។
ការឈ្នះ៣ពិន្ទុ នៅក្នុងការប្រកួតលើកទី២៨នេះ បានជួយឱ្យ ក្រុមស្វាយរៀង មាន៧៣ពិន្ទុ ដាច់ឆ្ងាយពីក្រុមឈរនៅលេខ២ ភ្នំពេញក្រោន ចំនួន១០ពិន្ទុ ហេតុនេះ បើទោះបីជា ភ្នំពេញក្រោន បានឈ្នះទាំង៣ប្រកួត ដែលនៅសល់ ហើយ ស្វាយរៀង បានចាញ់២ប្រកួតចុងក្រោយ ក៏ពួកគេ នៅតែជាម្ចាស់ជើងឯក។
ក្រុមស្វាយរៀង បានចាប់លោក Pep Munoz បោះឡើងលើ ដើម្បីជាការអបអរដល់គ្រូបង្វឹកសញ្ជាតិអេស្ប៉ាញរូបនេះ ដែលបានដឹកនាំក្រុមស្វាយរៀង ឱ្យឈ្នះពានលីគកំពូលកម្ពុជា ២រដូវកាលជាប់គ្នា។ រូប ស្វាយរៀង
យ៉ាងណាក៏ដោយ លោក Pep Munoz គ្រូបង្គោលក្រុមព្រះខ័នរាជស្វាយរៀង បានអះអាងថា ការឈ្នះលីគកំពូលកម្ពុជា នៅរដូវកាលនេះ មានការពិបាកខ្លាំងណាស់ ព្រោះមានការប្រកួតប្រជែងខ្លាំងជាងរដូវកាលមុន ហើយក្រុមស្វាយរៀង ដែលមានភារកិច្ចចូលរួមប្រកួតពានរង្វាន់ ASEAN Club Championship Shopee Cup 2024/2025 និងពាន AFC Challenge League តំណាងឱ្យកម្ពុជានោះ គឺមានកាលវិភាគប្រកួតមមាញឹកជាងគេ។
លោក Pep បាននិយាយថា៖ «ការក្លាយជាម្ចាស់ជើងឯកនៃខេមបូឌានព្រីមៀរលីគ នៅក្នុងរដូវកាលនេះ គឺជារឿងមួយដែលពិបាកខ្លាំង ព្រោះលីគកំពូល ពោរពេញទៅដោយការប្រកួតប្រជែងខ្ពស់ខ្លាំងណាស់ ជាមួយនឹងកាលវិភាគប្រកួតដ៏មមាញឹក។ ក្រុមកីឡាករ គ្រូបង្វឹក និងបុគ្គលិកទាំងអស់ ពិតជាបានខំប្រឹងប្រែងយ៉ាងខ្លាំង ហើយពួកគេគឺជាអ្នកធ្វើឱ្យវាក្លាយជាការពិត នៅពេលនេះ»។
ចំណែកគ្រូបង្គោលក្រុមភ្នំពេញក្រោន លោក Starynskyi ក៏បានអបអរសាទរ ចំពោះការឈ្នះពានលីគកំពូលកម្ពុជា ចំនួន២រដូវកាលជាប់ៗគ្នារបស់ក្រុមព្រះខ័នរាជស្វាយរៀង នេះដែរ។ លោកបាននិយាយថា៖ «សូមអបអរដល់ក្រុមស្វាយរៀង ហើយខ្ញុំគិតថា ពួកគេធ្វើបានល្អខ្លាំងណាស់»។
លោកបន្ថែមថា៖ «ដូចបានឃើញហើយ ការប្រកួតប្រជែងជាមួយក្រុមស្វាយរៀង ២រដូវកាលនេះ គឺប្រៀបដូចជា Liverpool ប្រកួតប្រជែងជាមួយ Man City។ ពិតណាស់ យើងក៏ធ្វើបានល្អដែរ ហើយបើឱ្យនិយាយត្រឡប់ទៅដល់ការឈ្នះពានរបស់យើង២លើកចុងក្រោយ គឺយើងឈ្នះតិច បានពិន្ទុតិច ប៉ុន្តែឥឡូវទោះយើងប្រឹងប្រែងដើម្បីលេខ២ តែយើងឈ្នះច្រើនជាងមុន យើងមានលទ្ធផលល្អជាង និងទាត់ចូលទីច្រើនគ្រាប់ ប៉ុន្តែស្វាយរៀង ទាត់ចូលច្រើនជាងយើង»៕
ក្រុមស្វាយរៀង បាននាំគ្នាអបអរដល់ខ្សែការពារជប៉ុន Takashi Odawara ដែលរកបានគ្រាប់បាល់ជ័យជម្នះឱ្យក្រុមស្វាយរៀង នៅនាទីទី ៩០+៧។ រូបថត ស្វាយរៀង
