កីឡាការិនីជឺជីតស៊ូ ម៉ាប់ សុខហួយ បានក្លាយជាអត្តពលិកកម្ពុជាដំបូងគេ ដែលដណ្តើមបានខ្សែក្រវាត់ ក្នុងព្រឹត្តិការណ៍ AFG Open Championship។ រូបថត សហព័ន្ធ
កីឡាការិនីជឺជីតស៊ូ ម៉ាប់ សុខហួយ បានក្លាយជាអត្តពលិកកម្ពុជាដំបូងគេ ដែលដណ្តើមបានខ្សែក្រវាត់ Absolute Pro Championship នៅក្នុងព្រឹត្តិការណ៍ AFG Open Championship 2025 បន្ទាប់ពីកីឡាការិនីរូបនេះ បានឈ្នះទាំង២ប្រកួតជាប់ៗគ្នា ដែលធ្វើនៅសាកលវិទ្យាល័យ Rangsit ក្នុងទីក្រុងបាងកក ប្រទេសថៃ។
សម្រាប់ការប្រកួតលើវិញ្ញាសា Absolute Pro Division ដែលជាប្រភេទទម្ងន់បើកចំហដល់អត្តពលិកគ្រប់ប្រភេទទម្ងន់ឱ្យចូលរួមនេះ ម៉ាប់ សុខហួយ ជាអត្តពលិក ដែលមានមាឌតូច និងមានទម្ងន់ស្រាលជាងគេ នៅក្នុងចំណោមកីឡាការិនីផ្សេងៗទៀត ប៉ុន្តែតាមរយៈការប្រកួត ដែលធ្វើឡើងពីថ្ងៃទី ១៧ដល់ថ្ងៃទី១៨ ខែឧសភា ឆ្នាំ២០២៥នេះ សុខហួយ ពិតជាធ្វើបានយ៉ាងល្អ។
នៅការប្រកួតវគ្គពាក់កណ្តាលផ្តាច់ព្រ័ត្រ ម៉ាប់ សុខហួយ បានប្រកួតជាមួយកីឡាការិនីLucy Greenway ដែលជាម្ចាស់ខ្សែក្រវាត់ខ្មៅមកពីប្រទេស Wales ហើយនាងបានយកយកឈ្នះលើជើងខ្លាំងម្នាក់នេះ ដោយពិន្ទុ បន្ទាប់ពីការប្រកួតពេញ៨នាទី។
ជ័យជម្នះនេះ បានជួយឱ្យ ម៉ាប់ សុខហួយ ឡើងទៅជួបកីឡាការិនីលំដាប់កំពូលរបស់ម៉ាឡេស៊ី Mia Foo នៅវគ្គផ្តាច់ព្រ័ត្រ ហើយតាមរយៈការប្រកួតយ៉ាងតានតឹងរយៈពេល៨នាទីពេញ កីឡាការិនីកម្ពុជា សុខហួយ ត្រូវបានសម្រេចឱ្យឈ្នះជើងខ្លាំង Mia Foo ដោយពិន្ទុយ៉ាងរំភើបបំផុត ដើម្បីក្លាយជាម្ចាស់ខ្សែក្រវាត់។
ការដណ្តើមបានខ្សែក្រវាត់ Absolute Pro Championship នៅក្នុងព្រឹត្តិការណ៍ AFG Open Championship 2025 របស់ ម៉ាប់ សុខហួយ បានធ្វើឱ្យគ្រប់គ្នា ដែលបានចូលរួមការប្រកួតនេះ មានការភ្ញាក់ផ្អើលខ្លាំង ព្រោះវាជាខ្សែក្រវាត់ដំបូង ដែលអត្តពលិកជឺជីតស៊ូកម្ពុជា ដណ្តើមបាន។
កីឡាករ កីឡាការិនីជឺជីតស៊ូរបស់កម្ពុជាទាំង៦នាក់ ដែលត្រូវបានបញ្ជូនឱ្យទៅចូលរួមការប្រកួត AFG Open Championship 2025 នៅប្រទេសថៃ។ រូបថត សហព័ន្ធ
ជាមួយគ្នានេះ សហព័ន្ធកីឡាជឺជីតស៊ូកម្ពុជា បានប្រកាសដោយភាពរីករាយ ចំពោះការដណ្តើមបានខ្សែក្រវាត់ របស់កីឡាការិនីជម្រើសជាតិ ម៉ាប់ សុខហួយ ហើយបានចាត់ទុកជ័យជម្នះនេះ ជាសមិទ្ធផលដ៏ល្អបំផុត ដែលកើតចេញពីការខិតខំប្រឹងប្រែងរបស់ ម៉ាប់ សុខហួយ។
សហព័ន្ធកីឡាជឺជីតស៊ូកម្ពុជា បានប្រកាស តាមរយៈការបង្ហោះសារកាលពីថ្ងៃអាទិត្យថា៖ «នេះជាខ្សែក្រវាត់ជើងឯក AFG លើកដំបូងរបស់កម្ពុជា និងបង្ហាញពីសមត្ថភាពបច្ចេកទេស និងភាពហ្មត់ចត់ របស់ ម៉ាប់សុខហួយ នៅលើឆាកអន្តរជាតិ»។
«យើងខ្ញុំសូមចូលរួមអបអរសាទរចំពោះ ម៉ាប់ សុខហួយ ចំពោះលទ្ធផលដ៏ល្អឥតខ្ចោះនេះ ហើយមានមោទនភាពយ៉ាងខ្លាំង ចំពោះការខិតខំប្រឹងប្រែងរបស់នាង តំណាងឱ្យប្រទេសកម្ពុជា ប្រកបដោយភាពអស្ចារ្យទៅតាមទម្រង់ផ្សេងៗ!»។ សហព័ន្ធ បានបញ្ជាក់បន្ថែម នៅការប្រកាសរបស់ខ្លួន។
គួរបញ្ជាក់ថា សម្រាប់ការប្រកួត AFG Open Championship 2025 នៅប្រទេសថៃនេះ កម្ពុជា បានបញ្ជូនកីឡាករ៣នាក់ និងកីឡាការិនី៣នាក់ ទៅចូលរួម ខណៈព្រឹត្តិការណ៍កីឡាជឺជីតស៊ូធំជាងគេប្រចាំនៅតំបន់អាស៊ាននេះ មានអត្តពលិកជិត១ពាន់នាក់ បានចូលរួមប្រកួតប្រជែងគ្នា ហើយវាពិតជាអស្ចារ្យ ដែលកីឡាការិនី ម៉ាប់ សុខហួយ បានឈ្នះខ្សែក្រវាត់ជូនកម្ពុជា ជាលើកដំបូង៕
