សកម្មភាពប្រកួត Mas Fight នៅលើសង្វៀនថោន កាលពីថ្ងៃអាទិត្យ។ រូបថត ថោន
ប្រធាន Mas Fight ប្រចាំនៅកម្ពុជា លោក គឹម ស្រ៊ុនកុសល ដែលមានឈ្មោះក្រៅ Tommy Kim បានអះអាងថា បើកម្មវិធីប្រកួត Mas Fight នៅលើសង្វៀនថោន ត្រូវបានបិទ វានឹងក្លាយជាការខាតបង់ធំមួយ ព្រោះស្ថាប័ន Mas Fight នៅលើពិភពលោក នឹងឈប់ជួយផ្សព្វផ្សាយពីគុនខ្មែរ និងប្រទេសកម្ពុជាផងដែរ។
ទីប្រឹក្សាស្ថានីយទូរទស្សន៍ថោន លោក Tommy Kim បានលើកឡើងបែបនេះ ដោយសារអ្នកគាំទ្រមួយនេះ បានស្នើឱ្យបិទកម្មវិធីប្រកួត Mas Fight របស់សង្វៀនថោន នេះ បន្ទាប់ពីផ្ទុះការរិះគន់ខ្លាំង ទៅលើលោកអាជ្ញាកណ្តាល ឡុង វិបុល ដែលមិនទាន់មានជំនាញច្បាស់លាស់ ក្នុងការកាត់សេចក្តីការប្រកួតបែប MMA នេះ ធ្វើឱ្យកីឡាករកម្ពុជា ណាំឈៀវ គុនខ្មែរ ចាប់ក្លេរឹតកអ្នកប្រដាល់មីយ៉ាន់ម៉ា Joe Phyu ប៊ិះនឹងដាច់ខ្យល់ស្លាប់ សម្រាប់ការប្រកួត Mas Fight នេះកាលពីថ្ងៃអាទិត្យ។
យ៉ាងណាក៏ដោយ លោក Tommy យល់ថា ការស្នើឱ្យបិទកម្មវិធី Mas Fight នេះ គឺជាការខឹងខុស ដែលនឹងធ្វើឱ្យបាត់បង់ផលប្រយោជន៍រួម។ ចំណែកលោកអាជ្ញាកណ្តាល ឡុង វិបុល ដែលជាអ្នកបង្កើតកំហុស ក៏ត្រូវបានសហព័ន្ធកីឡាប្រដាល់គុនខ្មែរ សម្រេចដាក់ពិន័យ មិនឱ្យចូលរួមដឹកនាំការប្រកួតចំនួន៤សប្តាហ៍ រីឯ Joe Phyu ក៏មិនមានកើតអ្វីធំដុំនោះដែរ គឺបញ្ហានេះត្រូវបានលោក Tommy សម្របសម្រួលជាមួយភាគីមីយ៉ាន់ម៉ារួចហើយ។
លោក Tommy Kim បានប្រាប់ប្រព័ន្ធផ្សព្វផ្សាយបែបនេះថា៖ «Mas Fight បានដំណើរការនៅកម្ពុជាចូល៧ឆ្នាំហើយ ហើយបានជួយកីឡាករកម្ពុជាជាច្រើន។ វាមិនមែនជាកំហុស Mas Fight ទេ ហើយសុខៗបែរជាខឹងគោ មកវាយរទេះ ឬខឹងគោ ទៅដុតរទេះចោល វាមិនកើតទេ»។
លោកបានសង្កត់ធ្ងន់ថា៖ «សួរថា Mas Fight មានធ្វើអីខុស? អត់ធ្វើអីខុសទេ អ៊ីចឹងបើបិទមែន វាជាការខាតបង់មួយធំ។ យើងបាត់ការគាំទ្រពីស្ថាប័ន Mas Fight នៅលើពិភពលោក ដែលគេជួយផ្សព្វផ្សាយពីគុនខ្មែរ និងផ្សព្វផ្សាយពីប្រទេសកម្ពុជា អ៊ីចឹងសួរថា យើងចំណេញអីគេ? អត់មានចំណេញអ្វីទាំងអស់ ហេតុនេះសូមបងប្អូនមានការយោគយល់ និងអធ្យាស្រ័យផង»។
លោក Tommy Kim បានអះអាងថា បើបិទការប្រកួត Mas Fight នៅសង្វៀន មានតែការខាតបង់ គ្មានការចំណេញអ្វីដល់កម្ពុជា និងការផ្សព្វផ្សាយគុនខ្មែរនោះទេ។ រូបថត Tommy
ជាមួយគ្នានេះ លោក Tommy Kim បានទម្លាយថា អ្នកដែលបានបញ្ចេញមតិយោបល់ឱ្យបិទកម្មវិធី Mas Fight នេះ គឺមានចំនួនតិចទេ ដោយសារពួកគាត់ មិនទាន់បានយល់ច្បាស់ពីច្បាប់ Mas Fight និងមិនបានគិតវែងឆ្ងាយពីផលប្រយោជន៍ ដែលកម្មវិធីនេះ បានជួយដល់កីឡាករកម្ពុជាយើង និងផ្សព្វផ្សាយពីកម្ពុជា នៅលើឆាកអន្តរជាតិ។
ជាមួយហេតុផលនេះ លោក Tommy Kim បានអះអាងថា Mas Fight នឹងបន្តរៀបចំដូចធម្មតា នៅលើសង្វៀនថោន ហើយលោកគ្រោងនឹងនាំយកអាជ្ញាកណ្តាលបរទេសតាមរយៈសហព័ន្ធកីឡាយុទ្ធគុនចម្រុះកម្ពុជា (CMMA) មកកាត់សេចក្តី តែលោកក៏បានស្នើឱ្យសហព័ន្ធកីឡាជាតិផ្សេងទៀត បណ្តុះបណ្តាលអាជ្ញាកណ្តាលខ្មែរលើជំនាញ Mas Fight ឬ MMA ឱ្យបានច្រើនផងដែរ ចៀសវាងនាំយកគណៈកម្មការ Mas Fight របស់គេមករៀបចំ ដែលត្រូវចំណាយច្រើន។
ផ្តោតលើការប្រកួត Mas Fight នៅសង្វៀនថោន នាថ្ងៃអាទិត្យនេះ លោក Tommy បានបញ្ជាក់ថា៖ «ខ្ញុំបានរៀបចំមន្រ្តីអាជ្ញាកណ្តាលបរទេស ហើយយើងបានពិភាក្សាជាមួយ សហព័ន្ធកីឡាយុទ្ធគុនចម្រុះកម្ពុជា ដែលជាលក្ខណៈ MMA ដែរ ដោយសារកម្មវិធីរបស់យើង មានគុនខ្មែរលាយជាមួយ MMA»។
លោកបន្ថែមថា៖ «អ៊ីចឹងយើងអាចយកមន្រ្តីអាជ្ញាកណ្តាលបរទេសមកចូលរួម ដើម្បីឱ្យកម្មវិធីនេះ វាទៅបានពេញមុខពេញមាត់តែម្តង។ គ្រាន់តែថា អាចមានការចំណាយច្រើនជាងមន្រ្តីអាជ្ញាកណ្តាលខ្មែរ ប៉ុន្តែយើងរីករាយនឹងធ្វើ ដើម្បីឱ្យកម្មវិធីដំណើរការទៅរលូន ហើយបំពេញតាមការគាំទ្ររបស់បងប្អូនអ្នកគាំទ្រខ្មែរយើង»។
ជុំវិញការងារនេះ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) និងជារដ្ឋលេខាធិការក្រសួងអប់រំ យុវជន និងកីឡា ហើយក៏ជាប្រធានសហព័ន្ធកីឡាយុទ្ធគុនចម្រុះកម្ពុជាផងនោះ បានឱ្យដឹងថា លោកកំពុងពិនិត្យ និងសម្របសម្រួលទៅលើបញ្ហាដែលបានកើតឡើង នៅក្នុងការប្រកួត Mas Fight នេះ ហើយលោកបញ្ជាក់ថា គ្មានអ្នកណា អាចរំលោភលើការងារបច្ចេកទេសបានទេ។
លោក វ៉ាត់ ចំរើន ថ្លែងថា៖ «យើងកំពុងពិនិត្យទៅលើការងារទាំងអស់នេះ គឺបច្ចេកទេសនេះ គ្មានអ្នកណាអាចរំលោភបុព្វសិទ្ធិរបស់សហព័ន្ធ, បុព្វសិទ្ធិរបស់ NOCC និងរបស់ក្រសួងអប់រំ យុវជន និងកីឡា ដែលជាស្ថាប័នទទួលខុសត្រូវរបស់រាជរដ្ឋាភិបាលបានទេ។ ការរកចំណូល ឬការឧបត្ថម្ភ មិនអាចរំលោភទៅលើបច្ចេកទេស និងបទបញ្ជានៃការប្រកួតណាមួយបានឡើយ គឺបុព្វសិទ្ធិបច្ចេកទេស ស្ថិតនៅលើសហព័ន្ធ និងនៅលើការគ្រប់គ្រងរបស់ NOCC និងក្រសួងអប់រំ»៕
