លោត វ៉ាត់ ចំរើន ពេលថ្លែង នៅក្នុងមហាសន្និបាតសហព័ន្ធកីឡាចំបាប់កម្ពុជា បញ្ចប់អាណត្តទី៧ និងបន្តអាណត្តិទី៨ កាលពីថ្ងៃសុក្រ។ រូបថត ឈន ណន
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) និងជារដ្ឋលេខាធិការក្រសួងអប់រំ យុវជន និងកីឡា បានប្រាប់ទៅគណៈកម្មាធិការប្រតិបត្តិថ្មីរបស់សហព័ន្ធកីឡាចំបាប់កម្ពុជា ត្រូវធ្វើម៉េចគ្រប់គ្រងហិរញ្ញវត្ថុឱ្យមានតម្លាភាព ចៀសវាងការបែបបាក់ផ្ទៃក្នុង នៅក្នុងសហព័ន្ធនេះ។
លោក វ៉ាត់ ចំរើន បានលើកឡើងបែបនេះ នៅក្នុងមហាសន្និបាតសហព័ន្ធកីឡាចំបាប់កម្ពុជា បញ្ចប់អាណត្តិទី៧ ឆ្នាំ២០២១-២០២៥ និងបន្តអាណត្តិទី៨ ឆ្នាំ២០២៥-២០២៩ នៅទីស្នាក់ការ NOCC កាលពីព្រឹកថ្ងៃសុក្រ ហើយនៅក្នុងអាណត្តិថ្មីនេះ លោក វ៉ាត់ ចំរើន នៅតែទទួលបានការគាំទ្រឱ្យបន្តធ្វើជាប្រធានសហព័ន្ធ ដោយមានលោក Casey Barnett លោក សំ សោភាន់ លោកព្រឹទ្ធាចារ្យ ហុក ឈាងគីម និងលោក ស៊ឹម ទូច ជាអនុប្រធាន អមដោយអគ្គលេខាធិការ អគ្គហេរញ្ញិក និងសមាជិកចំនួន៨នាក់ទៀត។
យ៉ាងណាក៏ដោយ នៅក្នុងចំណោមគណៈកម្មាធិការប្រតិបត្តិសហព័ន្ធកីឡាចំបាប់កម្ពុជា ក្នុងអាណត្តិទី៨នេះ លោក វ៉ាត់ ចំរើន បានសង្កត់ធ្ងន់ទៅលើកញ្ញា កាង ណុចបវរ ជាអគ្គលេខាធិការ និងលោក អន សុវឌ្ឍីយ៉ា ជាអគ្គហេរញ្ញិក ក៏ដូចរូបលោកផ្ទាល់ ជាប្រធានសហព័ន្ធ ដែលត្រូវធ្វើឱ្យមានតម្លាភាពលើការគ្រប់គ្រងហិរញ្ញវត្ថុរួមរបស់សហព័ន្ធនេះ។
លោក វ៉ាត់ ចំរើន បានថ្លែងថា៖ «ឥឡូវនេះយើងមានអគ្គលេខាធិការ និងអគ្គហេរញ្ញិក អ៊ីចឹងយើងត្រូវធ្វើម៉េចឱ្យមានតម្លៃភាព ក្នុងការរៀបចំហិរញ្ញវត្ថុរបស់យើង។ តម្លាភាពនេះបានន័យថា អ្នកបញ្ជាចាយ អត់មានសិទ្ធិកាន់លុយ រីឯអ្នកកាន់លុយ អត់មានសិទ្ធិបញ្ជាចាយ គឺប្រធានសហព័ន្ធ មានសិទ្ធិតែបញ្ជាគេទេ តែអត់មានសិទ្ធិកាន់លុយឡើយ រីឯអគ្គលេខាធិការ មានសិទ្ធិបញ្ជាចាយ តែអត់មានសិទ្ធិកាន់លុយ ចំណែកអគ្គហេរញ្ញិក កាន់លុយតែអត់មានសិទ្ធិចាយទេ»។
លោកបានបន្ថែមថា៖ «វាត្រូវតែធ្វើបែបហ្នឹង ដើម្បីឱ្យមានតម្លាភាព នៅក្នុងក្របខ័ណ្ឌនៃអភិបាលកិច្ចល្អរបស់សហព័ន្ធមួយៗ គឺត្រូវតែទទួលខុសត្រូវក្នុងតម្លាភាពនេះ ដើម្បីឱ្យមានយុត្តិធម៌ និងសមភាព នៅក្នុងការដឹកនាំគ្រប់គ្រង កុំឱ្យបែកបាក់ផ្ទៃក្នុង»។
អ្នកជំនាញកីឡា លោក វ៉ាត់ ចំរើន បានសង្កត់ធ្ងន់ថា ការធ្វើឱ្យមានតម្លាភាព ក្នុងការរៀបចំគ្រប់គ្រងលើហិរញ្ញវត្ថុ នៅក្នុងសហព័ន្ធកីឡាចំបាប់កម្ពុជានេះ វាជារឿងសំខាន់ ដែលត្រូវធ្វើឱ្យបាន ហើយមិនមែនយកមនោសញ្ចេតនាមកធ្វើការងារនោះទេ គឺត្រូវយកច្បាប់ ទម្លាប់ ក្រឹត្យក្រម វិធាន និងបទបញ្ញត្តិ មកធ្វើ។
លោកបញ្ជាក់ថា៖ «យើងដាក់ទិសដៅយ៉ាងម៉េច យើងត្រូវធ្វើអ៊ីចឹង ហើយនេះជាអ្វីដែលយើងត្រូវពង្រឹងសមត្ថភាពគ្រប់គ្រងរបស់យើង។ បើយើងគ្រប់គ្រងទៅធូររលុង អត់មានវិន័យ និងអត់គោរពតាមក្រឹត្យក្រម យើងនឹងមានជម្លោះផ្ទៃក្នុង និងមានសតិអារម្មណ៍ អ៊ីចឹងអ្វីដែលល្អ គឺត្រូវបានតម្លាភាព នៅក្នុងការគ្រប់គ្រងរបស់យើង ហើយនេះជាអ្វីដែលយើងទាំងអស់គ្នា ត្រូវធ្វើឱ្យបាន នៅក្នុងអាណត្តិនេះ»។
គណៈកម្មាធិការប្រតិបត្តិទី៨របស់សហព័ន្ធកីឡាចំបាប់កម្ពុជា ថតជាមួយក្រុមគ្រូបង្វឹក និងកីឡាករ កីឡាការិនី នៅថ្ងៃមហាសន្និបាត។ រូបថត ឈន ណន
បន្ថែមទៅលើការជំរុញឱ្យមានការរៀបចំគ្រប់គ្រងហិរញ្ញវត្ថុឱ្យមានតម្លាភាពនេះ លោក វ៉ាត់ ចំរើន បានស្នើឱ្យមន្រ្តីក្រោមឱវាទ នៅក្នុងសហព័ន្ធកីឡាចំបាប់កម្ពុជា ត្រូវខំប្រឹងអភិវឌ្ឍបច្ចេកទេសពីអត្តពលិក ពីកម្រិតថ្នាលរហូតដល់ក្រុមជម្រើសជាតិ ក៏ដូចជាអភិវឌ្ឍមន្រ្តីបច្ចេកទេស អាជ្ញាកណ្តាលចៅក្រមផងដែរ។
នៅក្នុងចំណុចនេះ លោក ចំរើន បានប្រាប់ឱ្យសហព័ន្ធកីឡាចំបាប់កម្ពុជា បង្កើតគណៈកម្មការអាជ្ញាកណ្តាលចៅក្រម, គណៈកម្មការអភិវឌ្ឍបច្ចេកទេស, គណៈកម្មការផ្នែកចំបាប់បុរាណ និងគណៈកម្មការផ្នែកទីផ្សារ និងផ្សព្វផ្សាយ ជាដើម ដើម្បីឱ្យបំពេញការងារដាច់ដោយឡែកពីគ្នា ក្នុងការជំរុញការអភិវឌ្ឍវិស័យកីឡាចំបាប់កម្ពុជា ឱ្យកាន់តែរីកចម្រើនទៅមុខទៀត។
តែទោះបីជាយ៉ាងណា គេនៅមិនទាន់ដឹងថា គណៈកម្មាធិការប្រតិបត្តិថ្មីរបស់សហព័ន្ធកីឡាចំបាប់កម្ពុជា ជាពិសេសកញ្ញា កាង ណុចបវរ ដែលជាអ្នកកាន់ការងាររួមផ្នែកបច្ចេកទេស នៅក្នុងសហព័ន្ធនេះ អាចធ្វើបានទៅតាមការចង្អុលបង្ហាញរបស់លោក វ៉ាត់ ចំរើន ដែលជាប្រធានសហព័ន្ធ ឬយ៉ាងណាទេនោះទេ ខណៈការបំពេញការងារក្នុងអាណត្តិទី៧កន្លងមក អគ្គលេខាធិការរូបនេះ ហាក់មិនសូវស្វាគមន៍ដល់គ្រប់ប្រព័ន្ធផ្សព្វផ្សាយ ឱ្យចូលរួមជួយផ្សព្វផ្សាយពីសកម្មភាពកីឡាចំបាប់ប៉ុន្មានទេ៕
