អ្នកចាំទី វីរៈ ដារ៉ា ពេលឡើងទទួលពានជាឯកត្តជន នៅក្នុងពិធី CPL Honors កាលពីយប់ថ្ងៃចន្ទ។ រូបថត ស្វាយរៀង
ទោះបីជាធ្លាប់ទទួលរងការចោទប្រកាន់ពីអ្នកគាំទ្រថា បានលក់គ្រាប់បាល់ ពេលលេងឱ្យក្រុមជម្រើសជាតិកម្ពុជា ប៉ុន្តែអ្នកចាំទី វីរៈ ដារ៉ា របស់ក្រុមព្រះខ័នរាជស្វាយរៀង នៅតែជាប់ឈ្មោះជាអ្នកចាំទីល្អផ្តាច់គេ សម្រាប់ការប្រកួតលីគកំពូលកម្ពុជា រដូវកាលឆ្នាំ២០២៤-២០២៥ ដោយទទួលបានពានឯកត្តជនចំនួន៣តែម្នាក់ឯង ដូចគ្នាទីនឹងកីឡាករ Nieto Rondon របស់ក្រុមភ្នំពេញក្រោនដែរ។
គេនៅចាំបានថា អ្នកចាំទី វីរៈ ដារ៉ា ត្រូវបានអ្នកគាំទ្រភាគច្រើន បានដាក់ការសង្ស័យថា មានចេតនាលក់គ្រាប់បាល់ ឬកំណត់លទ្ធផលទុកជាមុន បន្ទាប់ពីពេលរូបគេបានបង្កើតកំហុស នៅមុខទី ធ្វើឱ្យរបូតគ្រាប់បាល់២គ្រាប់ជាប់ៗគ្នា នាំឱ្យក្រុមជម្រើសជាតិកម្ពុជា ចាញ់ក្រុមម្ចាស់ផ្ទះសិង្ហបុរី ២-១ ក្នុងព្រឹត្តិការណ៍ ASEAN Championship Mitsubishi Electric Cup កាលពីថ្ងៃទី១១ ខែធ្នូ ឆ្នាំ២០២៤។
សហព័ន្ធកីឡាបាល់ទាត់កម្ពុជា (FFC) បានបើកការស៊ើបអង្កេតអំពីករណីសង្ស័យនេះ ទៅលើ វីរៈ ដារ៉ា ប៉ុន្តែក្រោយពីអាជ្ញាធរមានសមត្ថកិច្ច បានធ្វើការតាមដាន និងស៊ើបអង្កេតតាមជំនាញរួចរាល់ និងរួមផ្សំដោយការស្រាវជ្រាវរបស់គណៈកម្មការសុចរិតភាពរបស់ FFC ទៅតាមនីតិវិធីជាក់លាក់ និងដោយការយកចិត្តទុកដាក់ ជាមួយនឹងអង្គភាពជំនាញក្រៅប្រទេសមួយចំនួនកន្លងមក គឺបានបង្ហាញលទ្ធផលជាអវិជ្ជមានរួមគ្នាថា វីរៈ ដារ៉ា ពុំមានអ្វីពាក់ព័ន្ធទៅនឹងការសង្ស័យទាំងអស់នោះទេ។ ផ្ទុយទៅវិញ កំហុសដែលកើតឡើងនាពេលនោះ គឺជាកំហុសបច្ចេកទេសនៃការលេង ដោយអចេតនាប៉ុណ្ណោះ។
យ៉ាងណាក៏ដោយ ជុំវិញការចោទប្រកាន់នោះ បានធ្វើឱ្យ វីរៈ ដារ៉ា ទទួលរងសម្ពាធខ្លាំង ពីអាជីពបាល់ទាត់របស់ខ្លួន ប៉ុន្តែគ្រប់យ៉ាងបានវិលមករកភាពប្រក្រតីវិញ នៅពេលរូបគេចូលលេងបានជាប់លាប់ជាមួយក្រុមស្វាយរៀងវិញ ហើយបានជួយឱ្យក្រុមនេះ ឱ្យឈ្នះពានលីគកំពូលកម្ពុជា និងឈ្នះជើងឯករង ពានរង្វាន់សម្តេច ហ៊ុន សែន ជាពិសេសបានជួយឱ្យក្រុមស្វាយរៀង ឈ្នះជើងឯករកពាន AFC Challenge League ជាប្រវត្តិសាស្រ្តលើកដំបូង។
បន្ថែមលើលទ្ធផល ដែលដណ្តើមបាន សម្រាប់ការលេងជាក្រុមនេះ អ្នកចាំទី វីរៈ ដារ៉ា បានឈ្នះពានឯកជនចំនួន៣តែម្នាក់ឯង ដែលត្រូវបានប្រកាស នៅក្នុងកម្មវិធីប្រគល់ពានលីគកំពូលកម្ពុជា (CPL Honors) កាលពីយប់ថ្ងៃចន្ទ។ ដារ៉ា បានឈ្នះពានស្រោមដៃមាស ជាអ្នកចាំទីល្អជាងគេ ឈ្នះពានជាកីឡាករសង្រ្គោះបាល់បានល្អជាងគេ និងបានឈ្នះពានជាកីឡាករ១១នាក់ល្អជាងគេ ប្រចាំរដូវកាលនេះ។
អ្នកចាំទី វីរៈ ដារ៉ា បានបង្ហាញពីមោទនភាព ចំពោះការឈ្នះពានឯកត្តជនចំនួន៣តែម្នាក់ឯង ក្នុងរដូវកាលនេះ។ ដារ៉ា បានយករូបភាពនៃការឡើងទទួលពានទាំង៣នេះ ទៅបង្ហោះនៅផេចហ្វេសប៊ុករបស់ខ្លួន ប៉ុន្តែអ្នកចាំទីឆ្នើមរូបនេះ មិនបានរាប់រៀបអ្វីច្រើនទេ ដោយបានសរសេរយ៉ាងខ្លីថា៖ «ចាំជួបគ្នា សម្រាប់ការប្រកួត នៅរដូវកាលក្រោយទៀត»។
ចំណែកកីឡាករកូឡុំប៊ី Nieto Rondon របស់ក្រុមភ្នំពេញក្រោន បានឈ្នះពានឯកត្តជនចំនួន៣តែម្នាក់ឯកដូច វីរៈ ដារ៉ា ដែរ គឺពានស្បែកជើងមាស ក្នុងនាមជាអ្នកទាត់បាល់បញ្ចូលទីបានច្រើនជាងគេ (២១គ្រាប់) ពានជាកីឡាករល្អជាងគេ និងពានជាកីឡាករ១១នាក់ល្អជាងគេ ប្រចាំរដូវកាលនេះ។
ខ្សែបម្រើប្រយុទ្ធរបស់ភ្នំពេញក្រោន Nieto Rondon បានបង្ហាញពានឯកត្តជនទាំង៣ ដែលរូបគេទទួលបាន សម្រាប់ការប្រកួតលីគកំពូលកម្ពុជា រដូវកាល ឆ្នាំ២០២៤-២០២៥នេះ។ រូបថត ភ្នំពេញក្រោន
ចំពោះកីឡាករ ដែលបានឈ្នះពានជាកីឡាករ១១នាក់ល្អជាងគេ ប្រចាំរដូវកាលនេះចំនួន៩នាក់ផ្សេងទៀត រួមមានខ្សែការពារ កាន់ ម៉ូ, អ៊ុក សុវណ្ណ និងខ្សែប្រយុទ្ធ De Andrade Souza Ramon របស់វិសាខា។ ខ្សែការពារ Mateus Martins របស់ណាហ្គាវើលដ៍ កីឡាករ សារ៉េត គ្រីយ៉ា, ញាណ សុស៊ីដាន និង Santos Cristian របស់ស្វាយរៀង ខ្សែប្រយុទ្ធ Nnamdi Ofufu Ibeh របស់ភ្នំពេញក្រោន និង សៀង ចន្ធា របស់បឹងកេត។
ជាមួយគ្នានេះលោក Pep Munoz គ្រូបង្គោលក្រុមព្រះខ័នរាជស្វាយរៀង ទទួលបានពានជាគ្រូបង្វឹកល្អជាងគេ សម្រាប់ការដឹកនាំក្រុមការប្រកួតលីគកំពូលកម្ពុជា រដូវកាលនេះ រីឯកីឡាករ ហាវ សុខណេត របស់ក្រុម ISI ដង្កោសែនជ័យ បានឈ្នះពានកីឡាករវ័យក្មេងល្អជាងគេ ហើយកីឡាករ ជា ច័ន្ទដារ៉ា របស់ណាហ្គាវើលដ៍ បានឈ្នះពានកីឡាករស៊ុតចូលទីល្អជាងគេ។
ទន្ទឹមជាមួយគ្នានេះ ពហុកីឡដ្ឋាន និងកីឡដ្ឋានចំនួន៣ ត្រូវបានគណៈកម្មការរៀបចំការប្រកួតលីគកំពូលកម្ពុជា ចាត់ចំណាត់ថ្នាក់ល្អ ហើយបានប្រគល់ពាន នៅក្នុងពិធី CPL Honors នោះដែរ គឺកីឡដ្ឋានព្រីនស៍របស់ក្លិបវិសាខា បានឈ្នះពានជាទីលានប្រកួតល្អជាងគេ និងពានជាកីឡដ្ឋាន ដែលមានទស្សនិកជនពេញចិត្តជាងគេ។
ចំណែកពហុកីឡដ្ឋានជាតិអូឡាំពិក ដែលក្លិបបឹងកេត បានយកជាកន្លែងរៀបចំការប្រកួត ក្នុងនាមជាម្ចាស់ផ្ទះនោះ បានទទួលពានជាកីឡដ្ឋានធ្វើជាម្ចាស់ផ្ទះល្អជាងគេ ចំណែកកីឡដ្ឋានស្វាយរៀង របស់ក្លិបព្រះខ័នរាជស្វាយរៀង បានទទួលពានជាកីឡដ្ឋានមានអ្នកទស្សនាច្រើនជាងគេ៕
