ម្ចាស់អាវលេខ១០ Nieto Rondon និងម្ចាស់អាវលេខ៦ Yudai Ogawa ពេលលេងឱ្យក្រុមភ្នំពេញកន្លងមក តែកីឡាករបរទេសសញ្ជាតិខ្មែរទាំង២នេះ គ្មានឈ្មោះសម្រាប់ការប្រកួតផ្តុំក្រុមជម្រើសជាតិកម្ពុជា លើកនេះទេ។ រូបថត ភ្នំពេញក្រោន
កីឡាករបទេសមានសញ្ជាតិខ្មែរ៣នាក់ ដែលបានបង្ហាញគុណភាពលេងយ៉ាងល្អ ទាំងការប្រកួតលីគកំពូលកម្ពុជា និងពានរង្វាន់សម្តេច ហ៊ុន សែន នារដូវកាលឆ្នាំ២០២៤-២០២៥នេះ គ្មានឈ្មោះនៅក្នុងការប្រមូលផ្តុំជាមួយក្រុមជម្រើសជាតិកម្ពុជា ដើម្បីត្រៀមប្រកួតមិត្តភាពជាមួយក្រុមជម្រើសជាតិតាជីគីស្ថាន នៅពហុកីឡដ្ឋានជាតិអូឡាំពិក នាព្រលប់ថ្ងៃទី៥ ខែមិថុនា ខាងមុខនេះទេ។
តាមបញ្ជីរាយនាមកីឡាករចូលរួមប្រមូលផ្តុំហ្វឹកហាត់ ត្រៀមសម្រាប់ការប្រកួតមិត្តភាពអន្តរជាតិជាមួយក្រុមជម្រើសជាតិតាជីគីស្ថាននេះ គឺគ្មានឈ្មោះខ្សែបម្រើប្រយុទ្ធរបស់កូឡុំប៊ី Nieto Rondon ខ្សែការពាររបស់ជប៉ុន Takaki Ose និងខ្សែបម្រើជប៉ុន Yudai Ogawa នោះទេ បើទោះបីជាអ្នកទាំង៣នេះ ទទួលបានសញ្ជាតិខ្មែរ ហើយធ្លាប់លេងឱ្យក្រុមជម្រើសជាតិកម្ពុជា កន្លងមកក៏ដោយ។ ចំណែកកីឡាករខ្មែរ ដែលធ្លាប់ជាប់ជម្រើសជាតិមួយចំនួនទៀត ក៏គ្មានឈ្មោះសម្រាប់ការប្រមូលផ្តុំលើកនេះដែរ។
ជុំវិញបញ្ហានេះ សហព័ន្ធកីឡាបាល់ទាត់កម្ពុជា បានបញ្ជាក់តាមរយៈការប្រកាសបញ្ជីរាយនាមកីឡាករចូលរួមប្រមូលផ្តុំហ្វឹកហាត់ កាលពីថ្ងៃពុធ បែបនេះថា៖ «កីឡាករមួយចំនួន បានអវត្តមាន ដោយសារមានបញ្ហារបួសអំឡុងការប្រកួតក្នុងក្លិបរបស់ពួកគេ និងបញ្ហាជាប់កាតក្រហម កាលពីប្រកួតមិត្តភាពអន្តរជាតិកន្លងទៅ»។
តាមព័ត៌មានច្បាស់ការណ៍ឱ្យដឹងថា ខ្សែបម្រើ Yudai Ogawa ដែលទើបចែកផ្លូវជាមួយក្លិបភ្នំពេញក្រោន និងខ្សែបម្រើប្រយុទ្ធ Nieto Rondon សុទ្ធតែជាប់ពិន័យកាតក្រហម សម្រាប់ការប្រកួតអន្តរជាតិកន្លងមក ហេតុនេះហើយទើបអ្នកទាំង២ មិនត្រូវបានកោះហៅសម្រាប់ការប្រមូលផ្តុំលើកនេះ ចំណែកខ្សែការពារ Takaki Ose ដែលទើបប្រកាសចែកផ្លូវជាមួយក្រុមភ្នំពេញក្រោន កាលពីម៉ោង ១២:១៧ ថ្ងៃព្រហស្បតិ៍នេះ ក៏អាចមានបញ្ហាអ្វីដែរ ទើបមិនបានចូលរួមជាមួយក្រុមជម្រើសជាតិកម្ពុជាលើកនេះ។
ខ្សែការពារ Takaki Ose (ក្រហម) បានបញ្ចប់កុងត្រាជាមួយក្លិបភ្នំពេញក្រោន ហើយរូបគេ ក៏គ្មានឈ្មោះក្នុងក្រុមជម្រើសជាតិកម្ពុជា។ រូបថត ភ្នំពេញក្រោន
យ៉ាងណាក៏ដោយខ្សែការពារអាហ្រ្វិកខាងត្បូង កាន់ ម៉ូ និងខ្សែប្រយុទ្ធកូតឌីវរ Abdel Kader Coulibaly ដែលទើបបានរួមចំណែកជួយឱ្យក្រុម ASEAN All Stars យកឈ្នះក្រុម Manchester United ១-០ ដ៏គួរឱ្យភ្ញាក់ផ្អើល សម្រាប់ការប្រកួតមិត្តភាព នៅលើទឹកដីប្រទេសម៉ាឡេស៊ី កាលពីយប់ថ្ងៃពុធ ម្សិលមិញ នៅតែមានឈ្មោះនៅក្នុងការប្រមូលផ្តុំក្រុមជម្រើសជាតិកម្ពុជា លើកនេះ ក្នុងនាមជាកីឡាករបរទេសមានសញ្ជាតិខ្មែរ។ រីឯកីឡាករជប៉ុនសញ្ជាតិខ្មែរ Mizuno Hikaru ក៏មានឈ្មោះក្នុងការប្រមូលផ្តុំលើកនេះផងដែរ។
ចំណែកកីឡាករខ្មែរចំនួន២០នាក់ទៀត ដែលត្រូវបានកោះហៅសម្រាប់ការប្រមូលផ្តុំជាមួយក្រុមជម្រើសជាតិលើកនេះ រួមមានអ្នកចាំទី អ៊ុំ វិចិត្រ, វីរៈ ដារ៉ា, រ៉េត លីហេង ខ្សែការពារ សារ៉េត គ្រីយ៉ា, អ៊ុក សុវណ្ណ, ឡេង ណូរ៉ា, ហួត វ៉ាន់ណេត, អ៊ីម វ៉ាឃីម ខ្សែបម្រើ ជូ ស៊ីនទិ, គឹម សុខយុទ្ធ, មិន រតនៈ, ស៊ុន សុវណ្ណមករា, អ៊ិន សូដាវីដ, ស៊ិន កក្កដា, បុង សាំយូអ៊េល ខ្សែប្រយុទ្ធ សៀង ចន្ធា, ញាណ សុស៊ីដាន, លឹម ពិសុទ្ធ, សារ ទី និង ហាវ សុខនេត្រ។
ទាក់ទងនឹងការប្រកួតមិត្តភាពអន្តរជាតិជាមួយក្រុមជម្រើសជាតិតាជីគីស្ថាន នៅពហុកីឡដ្ឋានជាតិអូឡាំពិក នាថ្ងៃទី៥ ខែមិថុនាខាងមុខនេះ សហព័ន្ធកីឡាបាល់ទាត់កម្ពុជា បានដាក់លក់សំបុត្រ ជាផ្លូវការហើយ គឺតំបន់ A ឬ CAT A សំបុត្រ១ថ្លៃ២ម៉ឺនរៀល និង CAT B សំបុត្រ១ ថ្លៃ១ម៉ឺនរៀល ប៉ុន្តែសម្រាប់អ្នកទិញ នៅថ្ងៃប្រកួតគឺ CAT A សំបុត្រ១ថ្លៃ៣ម៉ឺនរៀល និង CAT B សំបុត្រ១ថ្លៃ១៥០០០រៀល៕
