ក្លិប​ម្ចាស់​ជើងឯក ព្រះខ័នរាជស្វាយរៀង បាន​ប្រកាស​ពី​ការ​ចែក​ផ្លូវ​ជាមួយ​កីឡាករ​បរទេសសញ្ជាតិប្រេស៊ីល​ចំនួន​៣នាក់​ហើយ ហើយ​ក្លិប​នេះ ក៏នឹ​ង​ត្រៀម​ប្រកាស​ពីបេក្ខភាព​គ្រូ​​បង្វឹក​ថ្មី ជំនួស​ការ​ចាកចេញ​របស់​គ្រូ​បង្គោល​សញ្ជាតិ​អេស្ប៉ាញ​លោក Pep Munoz នៅថ្ងៃពុធ​​សប្តាហ៍​ក្រោយ​នេះ​ផងដែរ ដើម្បី​ត្រៀម​ដឹកនាំ​ការ​ប្រកួត​រដូវ​កាល​ថ្មី ឆ្នាំ​២០២៥-២០២៦។

       តាមការ​ប្រកាស​ជាបន្តបន្ទាប់ នៅលើ​ផេច​ហ្វេសប៊ុក​របស់​ក្លិប​ព្រះខ័នរាជស្វាយរៀង កាលពី​ថ្ងៃ​ព្រហស្បតិ៍​ម្សិលមិញ​ បាន​បញ្ជាក់​ថា ក្លិប​មូល​ដ្ឋាន​នៅ​ខេត្តស្វាយរៀង មួយនេះ បានបញ្ចប់​កិច្ចសន្យា​ជាមួយ​ខ្សែ​ប្រយុទ្ធ  Pablo Augusto រួមជាមួយមិត្តរួមជាតិ​របស់​គេ Breninho​ ឬBreno Caetano និង Matheus Moresche ជា​ផ្លូវ​ការ​ហើយ។

       នៅក្នុងចំណោម​កីឡាករ​ប្រេស៊ីល​​ទាំង​៣​នេះ អ្នកគាំ​ទ្រ​កម្ពុជា បាន​បង្ហាញការ​សោក​ស្តាយ​ចំពោះ​សមត្ថ​ភាព  Breno Caetano។ បើទោះបីជា​ម្ចាស់​អាវ​លេខ​៩៧​រូប​នេះ ចូល​លេង​ឱ្យក្រុម​ស្វាយរៀង បាន​ត្រឹម៥​លើក ក្នុងការ​ប្រកួតបាន​រង្វាន់ AFC Challenge League ប៉ុន្តែ Breno ពិតជា​មានគុណ​ភាព​លេង​បាន​ល្អ និងជា​កីឡាករ​​មាន​ល្បឿនលឿន ដែល​​អាច​ផ្លាស់ទី​លេង​ពីតំបន់ការពារ​ទៅ​ដល់ប្រយុទ្ធ ដោយមិនបាន​បង្ហាញ​ពីការ​ថមថយគុណ​ភាព​កម្លាំង​នោះ​ទេ។

       កីឡាករ Breno Caetano ត្រូវបាន​លោក Pep Munoz នាំ​យក​មក សម្រាប់តែ​ការ​ប្រកួត​ពាន​​ AFC Challenge League នេះ​ទេ ព្រោះ​លោក​មាន​បំណង​​ចង់​ជួយ​ក្រុមស្វាយរៀង ឱ្យ​ឈ្នះ​ជើងឯក​ពាន​លំដាប់​ទី​៣​ទ្វីប​អាស៊ីមួយនេះ ជា​លើកដំបូង ប៉ុន្តែ​គ្រាប់យ៉ាងបាន​រលាយ​បាត់ បន្ទាប់ពី​ស្វាយរៀង បានចាញ់​ក្រុម ​ FK Arkadag របស់តួកមេគីស្ថាន ២-១ នៅ​វគ្គ​ផ្តាច់​ព្រ័ត្រ កាលពី​ថ្ងៃទី​១០ ខែឧសភា​នោះ។

កីឡាករប្រេស៊ីល​ Pablo Augusto (រាប់ពី​ឆ្វេង) GABI, Cristian Roque, Matheus Moresche និង Breno Caetano ពេលថតជាមួយគ្នា​កន្លងមក។ រូប​ថត ស្វាយរៀង

       ការបរាជ័យ​ក្រោយការ​ប្រកួត​រហូត​ដល់​១២០នាទី​នោះ បាន​ក្លាយជា​រាត្រី​ដ៏ឈឺចាប់​សម្រាប់​ក្រុម​ស្វាយរៀង និង​អ្នកគាំទ្របាល់​ទាត់​កម្ពុជា។ Breno និង​មិត្តរួម​ក្រុម​ បានសម្រក់ទឹកភ្នែក​សោកស្តាយ ចំពោះការ​បាត់បង់ឱកាស​ឈ្នះ​ពាន AFC Challenge League នោះ ហើយ​​ទង្វើ​នេះបាន​ធ្វើ​ឱ្យ​អ្នកគាំ​ទ្រ មើល​ឃើញ​កាន់តែ​ច្បាស់ពីទំហំទឹក​ចិត្ត​របស់ Breno ដែល​មានចំពោះ​កម្ពុជា និងចង់​ឃើញ​កីឡាករ​ប្រេស៊ីល​រូប​នេះ បន្តលេង​នៅក្រុមស្វាយរៀង ប៉ុន្តែ​គ្រប់​យ៉ាង​បានបញ្ចប់ហើយ។

ជាមួយគ្នានេះ Breno Caetano បាន​បង្ហោះសារ​អរគុណ​ដល់​គ្រប់​គ្នា​នៅក្នុង​​ក្លិប​ព្រះខ័នរាជស្វាយរៀង ជាពិសេស​អ្នកគាំ​ទ្រ​កម្ពុជា ដែល​បាន​បង្កើតនូវ​រឿង​ដ៏ភ្ញាក់ផ្អើល​សម្រាប់​រូប​គេ ក្នុងការ​មក​ប្រកបអាជីពបាល់​ទាត់​នៅ​កម្ពុជា​ ក្នុង​រយៈពេលប្រមាណ​៣ខែ​នេះ។ Breno សរសេរ​ថា៖ «ខ្ញុំ​បាន​ជួប​ប្រទះ​រឿង​អស្ចារ្យ​នៅ​ទីនេះ ហើយ​ខ្ញុំតែងតែព្យាយាមលះបង់ខ្លួនឯងឱ្យអស់ពីសមត្ថភាព នៅ​លើ​ទី​លាន»។

បន្ថែមលើក​នេះ Breno ក៏បានសម្តែងការគោរព និងដឹងគុណ​ដល់​គ្រូ​បង្គោល​លោក Pep Munoz ដែលបាន​ផ្តល់ទំនុក​ចិត្ត និង​ភាព​ជឿជាក់ ក្នុងការ​ផ្តល់​ឱកាស​នាំ​យក​រូបគេ​មក​លេង​នៅ​ក្រុមស្វាយរៀង ដែលជា​កន្លែង​ទទួលបាន​នៅការ​យកចិត្តទុក​ដាក់ ការ​ជួយទំនុក​បម្រុង និង​ការ​លើក​ទឹក​ចិត្ត​ទាំង​មិត្ត​រួម​ក្រុម និង​អ្នកគាំ​ទ្រ ធ្វើ​ឱ្យ​រូបគេ​កាន់តែ​ចង់បង្ហាញ​សមត្ថ​ភាពឱ្យ​ប្រសើរ​ឡើង។

កីឡាករ​វ័យ​២៨​ឆ្នាំ​រូប​នេះ ​បានបញ្ជាក់​ជារួម​ថា៖​ «អរគុណអ្នកគាំទ្រទាំងអស់ ខ្ញុំមិនមានពាក្យ​អរគុណអ្វី​ឱ្យសម​ទៅនឹងក្តី​ស្រឡាញ់ ដែល​ខ្ញុំ​ទទួលបាន​ពី​អ្នកទាំងអស់​គ្នា​នោះ​ទេ គឺ​តែងតែគាំទ្រ និងផ្តល់នូវ​ថាមពលវិជ្ជមានសម្រាប់​ខ្ញុំ។ អរគុណសម្រាប់ការអនុញ្ញាតឱ្យខ្ញុំជាផ្នែកមួយនៃគ្រួសារ​បាល់​ទាត់​ស្វាយរៀង។ ខ្ញុំសូមជូនពរឱ្យក្លិបទទួលបានជោគជ័យ ហើយខ្ញុំនឹងលើកទឹកចិត្តជានិច្ច។ ខ្ញុំរីករាយដែលបានពាក់អាវ​ក្រុម​ស្វាយរៀង»។

ក្រៅ​ពីការ​ប្រកាស​ពីការ​ចាកចេញ​របស់​កីឡាករ​ប្រេស៊ីលទាំង​៣នាក់​ខាង​លើ​នេះ ក្លិប​ព្រះខ័នរាជស្វាយរៀង ក៏បានបញ្ចប់កិច្ចសន្យាជាមួយ​កីឡាករ​កម្ពុជា នី សុខរី ផងដែរ តែ​បាន​ប្រកាស​​នាំ​យក​ខ្សែ​ប្រយុទ្ធ ចន្ថា ចន្ទាកា ដែល​ធ្លាប់លេង​ឱ្យបឹងកេត និង សុផល ឌីម៉ង់ ដែល​ធ្លាប់លេង​ឱ្យក្រុមអង្គរ​ថាយហ្គឺរ មក​ចូលរួមជាមួយ​ក្រុមនេះ សម្រាប់ត្រៀមការ​ប្រកួត​រដូវកាលក្រោយ។

ទន្ទឹមជាមួយគ្នា​នេះ ក្លិប​ព្រះខ័នរាជស្វាយរៀង ក៏​នឹង​ធ្វើ​សន្និសីទកាសែត ​ប្រកាសពី​​បេក្ខភាព​គ្រូ​​បង្គោល​ថ្មី ជំនួស​ការ​ចាក​ចេញ​របស់​លោក Pep Munoz ផង​ដែរ ដែល​នឹង​ធ្វើ​នៅ​សណ្ណាគារ​សូហ្វីតែល នា​ថ្ងៃអង្គារ​ ទី​៣ ខែមិថុនា សប្តាហ៍ក្រោយនេះ៕