ការប្រកួតរបស់ ធឿន ធារ៉ា (ក្រហម) និងកីឡាករនីហ្សេរីយ៉ា Abdoulaye Diallo ពីយប់ថ្ងៃអាទិត្យ។ រូបថត Wurkz
កីឡាករជើងខ្លាំង ធឿន ធារ៉ា ត្រូវបានប្រកាសឱ្យឈ្នះពិន្ទុអ្នកប្រដាល់នីហ្សេរីយ៉ា Abdoulaye Diallo ទាំងវេទនា សម្រាប់ការប្រកួតការពារខ្សែក្រវាត់ IPCC Kun Khmer នៅលើទីតាំង ដីឡូតិ៍ជិតបុរីជីបម៉ុង ពោធិ៍ចិនតុង ខណ្ឌពោធិ៍សែនជ័យ រាជធានីភ្នំពេញ កាលពីយប់មិញ ចំណែកសិស្សប្អូនរបស់គេ អេ អាំម៉ារីនភូថង ប៊ិះតែនឹងសន្លប់ក្រោមដៃកីឡាករអាហ្សង់ទីន Tomas Aguirre ទៅហើយ មុនពេលប្រកាសឱ្យស្មើពិន្ទុទាំងមិនសូវសម។
សម្រាប់ការប្រកួតការពារដណ្តើមខ្សែក្រវាត់ IPCC Kun Khmer ដែលរៀបចំដោយសង្វៀនថោននេះ ធឿន ធារ៉ា ហាក់មិនបានបង្ហាញការប្រកួត ដោយមានភាពរហ័សរហួន ជាមួយគុណភាពកម្លាំងរឹងមាំនោះទេ គឺរូបគេ បានព្យាយាមបិទ និងគេចច្រើន ដែលធ្វើឱ្យកីឡាករ Abdoulaye Diallo កាន់តែវាយសម្រុកខ្លាំង ដើម្បីយកប្រៀប នៅក្នុងទឹកទី១។
សម្រាប់ការប្រកួត២ទឹកចុងក្រោយ កីឡាករនីហ្សេរីយ៉ា Abdoulaye Diallo នៅតែជាអ្នកបើកការវាយលុក ប៉ុន្តែរូបគេ ហាក់ស្រុតជំហរបន្តិច នៅពេល ធឿន ធារ៉ា ម៉ាត់ចូលផ្ទៃមុខពេញ នៅក្នុងទឹកទី២។ តែទោះបីជាយ៉ាងណា Abdoulaye Diallo នៅតែវាយចេញបានច្រើនជាង ធឿន ធារ៉ា ហើយសមនឹងទទួលបានជ័យជម្នះក្នុងការប្រកួតនេះ។
យ៉ាងណាក៏ដោយ លទ្ធផលជាផ្លូវការ ក្រោយការប្រកួត៣ទឹកពេញ ត្រូវបានគណៈកម្មការប្រកាសឱ្យ ធឿន ធារ៉ា ឈ្នះពិន្ទុ ដើម្បីបន្តគ្រងខ្សែក្រវាត់ IPCC Kun Khmer ទម្ងន់៧២គីឡូក្រាមរបស់គេបន្តទៅទៀត។ ប៉ុន្តែអ្នកគាំទ្រមួយចំនួន បានបញ្ចេញមតិរិះគន់ទៅលើការសម្រេចនេះថា មិនយុត្តិធម៌ចំពោះកីឡាករ Abdoulaye Diallo ដែលវាយចូលគោលដៅច្រើនជាង និងមានភាពរឹងមាំជាង ធឿន ធារ៉ា។
ការរិះគន់នេះ ដោយសារអ្នកគាំទ្រមើលឃើញថា ការប្រកួតលើកនេះ ធឿន ធារ៉ា វាយមិនលះដូចមុនៗ និងមានគុណភាពកម្លាំង ឆាប់ធ្លាក់ចុះ ធ្វើឱ្យរូបគេ មិនអាចបញ្ចេញក្បាច់សម្លាប់បានល្អ ហើយអ្វីដែលកាន់តែគួរអោយកត់សម្គាល់ទៀតនោះ គឺកីឡាករ Abdoulaye Diallo អាចវាយបានគ្រប់កាលៈទេសៈ ទាំងការម៉ាត់ បុកជង្គង់ ទាត់ និងការវាយកែង ធ្វើឱ្យ ធឿន ធារ៉ា ពិបាកក្នុងការចូលវាយប្តូរ។
បន្ទាប់ពីការពារខ្សែក្រវាត់បាន និងទទួលបានប្រាក់រង្វាន់ចំនួន១០លានរៀល កាលពីយប់ថ្ងៃអាទិត្យនោះ ធឿន ធារ៉ា ត្រូវបានប្រភពច្បាស់ការណ៍ ទម្លាយថា ត្រូវបានគេបញ្ជូនទៅកាន់មន្ទីរពេទ្យ បន្ទាប់ពីមានអាការៈពិបាកដកដង្ហើម និងឈឺក្បាលខ្លាំង។ ប្រភពដដែល បានឱ្យទៀតថា ធារ៉ា មានបញ្ហាគ្រុនញាក់ តាំងពីមុនការប្រកួត ទើបធ្វើឱ្យរូបគេឆាប់ធ្លាក់កម្លាំង សម្រាប់ការប្រកួតលើកនេះ។
ការប្រកួតរវាង អេ អាំម៉ារីនភូថង (ក្រហម) និងកីឡាករអាហ្សង់ទីន Tomas Aguirre ដោយអ្នកទាំង២នេះ បានប្រកាសឱ្យស្មើពិន្ទុគ្នា។ រូបថត Wurkz
ចំណែកការជួបគ្នារវាង អេ អាំម៉ារីនភូថង និងកីឡាករអាហ្សង់ទីន Tomas Aguirre បានក្លាយជាការប្រកួតដ៏ជក់ចិត្តបំផុត។ បើទោះបីជា Tomas Aguirre មានកម្ពស់ទាបជាង អាំម៉ារីន ដាច់ ប៉ុន្តែរូបគេ ពិតជាតាន់ និងវាយកណ្តាប់ដៃបានល្អ គឺគ្រាន់តែពាក់កណ្តាលទឹកទី១ កីឡាករអាហ្សង់ទីនរូបនេះ បានម៉ាត់ចូលផ្ទៃមុខពេញៗ និងបន្ថែមដោយការបុកជង្គង់ ធ្វើឱ្យ អាំម៉ារីន ឡើងចង់វង្វេងទៅហើយ។
តែទោះបីជាយ៉ាងណា ការវាយថែម២កែងទៀត ទៅលើ អាំម៉ារីន នៅពេលអាជ្ញាកណ្តាលចាប់ឃាត់ទៅហើយនោះ បានបង្កើតជាកំហុសចំពោះ Tomas Aguirre ដោយរូបគេ ត្រូវបានអាជ្ញាកណ្តាលចាប់ដៃ បង្ហាញឱ្យចៅក្រមទាំង៥នាក់កាត់ពិន្ទុ បន្ទាប់ពីលោកអាជ្ញាកណ្តាលរាប់ទៅលើ អាំម៉ារីន រួចមក។
ក្រោយការកាត់ពិន្ទុនេះ Tomas Aguirre បានធ្វើការវាយសម្រុកកាន់តែខ្លាំង ហើយការម៉ាត់ចូលពេញៗរបស់គេ បានធ្វើឱ្យ អេ អាំម៉ារីន រកកលចង់សន្លប់ម្តងៗទៅហើយ ចំណែកការប្រកួត២ទឹកចុងក្រោយ Tomas Aguirre នៅតែវាយចំគោលដៅបានច្រើន គ្រាន់តែរូបគេ រាងចង់អស់នៅចុងទឹកទី៣ បន្ទាប់ពីបានទទួលរកការវាយកែង បុកជង្គង់ និងទាត់ចូលធ្ងន់ៗរបស់ អាំម៉ារីន។
ជាមួយគ្នានេះ ការវាយកែងរបស់ Tomas Aguirre ក៏បានបន្សល់ស្នាមបែក នៅលើចិញ្ចើមឆ្វេងរបស់ អេ អាំម៉ារីនភូថង ផងដែរ ហើយក្រោយចប់ការប្រកួតភ្លាម កីឡាករអាហ្សង់ទីនរូបនេះ បានបង្ហាញទំនុកចិត្តខ្ពស់ថា នឹងទទួលបានជ័យជម្នះ ប៉ុន្តែចុងក្រោយរូបគេ បានត្រឹមបង្ហាញការខកចិត្ត ចំពោះការប្រកាសឱ្យស្នើពិន្ទុគ្នាជាមួយ អាំម៉ារីន។
អ្នកគាំទ្រមួយចំនួន ក៏បានបញ្ចេញមតិរិះគន់ទៅលើការសម្រេចសេចក្តីគូប្រកួតមិត្តភាពអន្តរជាតិមួយគូនេះដែរ ព្រោះខុសពីការប្រកួតជាក់ស្តែង ដែលគេមើលឃើញថា Tomas Aguirre សមតែអ្នកឈ្នះ។ ទន្ទឹមជាមួយគ្នានេះ អាំម៉ារីន ត្រូវបានបញ្ជូនទៅកាន់មន្ទីរពេទ្យ ដូច ធឿន ធារ៉ា ដែរ ដើម្បីពិនិត្យមើលស្នាមពកធំៗ២កន្លែង ដែលជាការវាយកែងថែមរបស់ Tomas Aguirre បន្ទាប់ពីរូបគេមានអាការៈឈឺក្បាលមិនបាត់នោះ៕
