ការប្រកួតជើងទី១រវាងក្រុមភ្នំពេញក្រោន (ក្រហម) និងក្រុមវិសាខា កាលពីថ្ងៃទី៣០ មេសា ហើយក្រុមទាំង២ ត្រូវប្រកួតកាត់សេចក្តី ជើងទី២ នៅថ្ងៃនេះ ដើម្បីរកក្រុមឈ្នះឡើងទៅវគ្គផ្តាច់ព្រ័ត្រ។ រូបថត ភ្នំពេញក្រោន
ក្រុមភ្នំពេញក្រោន និងវិសាខា សុទ្ធតែបានដាក់គោលដៅដណ្តើមយកជ័យជម្នះ សម្រាប់ការប្រកួតកាត់សេចក្តីជើងទី២ វគ្គពាក់កណ្តាលផ្តាច់ព្រ័ត្រពានរង្វាន់សម្តេច ហ៊ុន សែន លើកទី១៨ ឆ្នាំ២០២៥ នៅកីឡដ្ឋានព្រីនស៍ នាល្ងាចម៉ោង៦ ថ្ងៃពុធនេះ ដើម្បីបានឡើងទៅប្រកួតវគ្គផ្តាច់ព្រ័ត្រ។
សម្រាប់ការប្រកួតជើងទី១ នៅលើទឹកដីក្រុមភ្នំពេញក្រោន កាលពីថ្ងៃទី៣០ ខែមេសា ក្រុមវិសាខា បានវាយបកតាមស្មើក្រុមម្ចាស់ផ្ទះ ២-២ ហើយលទ្ធផលនេះ វានឹងធ្វើឱ្យការប្រកួតកាត់សេចក្តីជើងទី២ នៅថ្ងៃនេះ កាន់តែមានភាពតានតឹងខ្លាំង ព្រោះក្រុមទាំង២ សុទ្ធតែបានដាក់គោលដៅយកឈ្នះរៀងៗខ្លួន។
លោក Oleg Starynskyi គ្រូបង្គោលក្រុមភ្នំពេញក្រោន បានដឹងរួចទៅហើយថា ការប្រកួតជាមួយក្រុមវិសាខា តែងតែមានភាពតានតឹង និងគួរឱ្យចង់តាមដាន ប៉ុន្តែលោកបានអះអាងថា នេះជាការប្រកួតដ៏សំខាន់សម្រាប់ភ្នំពេញក្រោន ក្នុងការបោះជំហានឡើងទៅកាន់វគ្គផ្តាច់ព្រ័ត្រ។លោកបាននិយាយថា៖ «យើងចង់ឡើងទៅកាន់វគ្គផ្តាច់ព្រ័ត្រ និងឈ្នះពានរង្វាន់សម្រាប់រដូវកាលនេះ។ នេះជាឱកាសដែលយើងត្រូវតែធ្វើឱ្យបាន ដើម្បីទទួលបានជ័យជម្នះ គឺជ័យជម្នះដ៏សំខាន់នេះ កំពុងរង់ចាំយើង ដូច្នេះយើងត្រូវតែសាងសង់ចរិតលក្ខណៈឱ្យបានខ្លាំងក្លា និងជំរុញឱ្យបានលទ្ធផលល្អ។ ខ្ញុំសង្ឃឹមថា យើងនឹងធ្វើឱ្យអ្នកគាំទ្ររបស់យើងរីករាយបាន»។
គ្រូបង្វឹកសញ្ជាតិអ៊ុយក្រែន លោក Oleg បានបន្ថែមថា៖ «យើងបានផ្តោតលើអ្វីដែលយើងត្រូវកែប្រែ និងអ្វីដែលយើងអាចធ្វើឱ្យមានភាពប្រសើរឡើង ហើយយើងនឹងព្យាយាមធ្វើវា។ យើងបានឃើញពីចំណុចដែលយើងត្រូវកែប្រែ និងព្យាយាមធ្វើវាឱ្យបាន»។
ចំណែកលោក Tunji Ayoyinka Akeeb គ្រូបង្វឹកស្តីទីក្រុមវិសាខា ក៏បានអះអាងពីការត្រៀមខ្លួនបានយ៉ាងល្អ សម្រាប់ការប្រកួតកាត់សេចក្តីជាមួយក្រុមភ្នំពេញក្រោន នៅថ្ងៃនេះផងដែរ ដោយក្រុមមួយនេះ ចង់ដណ្តើមយកជ័យជម្នះ ដើម្បីបានឡើងទៅប្រកួតផ្តាច់ព្រ័ត្រ ហើយក៏ដើម្បីជាការសងសឹកក្រុមភ្នំពេញក្រោន ដែលបានទម្លាក់ពួកគេ នៅវគ្គពាក់កណ្តាលផ្តាច់ព្រ័ត្រនេះ កាលពីឆ្នាំមុនដែរ។
លោក Tunji Ayoyinka Akeeb បាននិយាយថា៖ «បរិយាកាសនៃការហ្វឹកហាត់ក្នុងសប្ដាហ៍នេះ គឺល្អមែនទែន ដោយសារយើងកំពុងតែយកចិត្តទុកដាក់ក្នុងការរៀបចំខ្លួន សម្រាប់ការប្រកួតជើងទី២នេះ។ កីឡាករទាំងអស់គ្នា ក៏កំពុងមានទឹកចិត្តយ៉ាងខ្លាំង ហើយបានត្រៀមខ្លួន និងលេងឱ្យអស់ពីសមត្ថភាព ដើម្បីការពារលទ្ធផលល្អ នៅក្នុងផ្ទះរបស់យើង»៕
