លោក Oleg Starynskyi បានអបអរជាមួយក្រុមភ្នំពេញក្រោន ពេលឈ្នះពានសម្តេច ហ៊ុន សែន ឆ្នាំ២០២៥ ហើយពេលនេះលោកកំពុងស្វះស្វែងរកកីឡាករបរទេសថ្មីៗ មានសមត្ថភាពខ្ពស់ មកជួយដល់ក្រុម សម្រាប់រដូវកាលក្រោយ។ រូបថត ភ្នំពេញក្រោន
គ្រូបង្គោលក្រុមភ្នំពេញក្រោន លោក Oleg Starynskyi បានអះអាងថា លោក និងថ្នាក់ដឹកនាំក្លិប បាននឹងកំពុងស្វះស្វែងរកកីឡាករបរទេស មកពីលីកខ្លាំងៗ មានសមត្ថភាពខ្ពស់ មកជួយដល់ក្រុម សម្រាប់ប្រកួតប្រជែងយកពានបន្ថែមទៀត នៅរដូវកាល ឆ្នាំ២០២៥/២០២៦ ប៉ុន្តែកីឡាករបរទេសទាំងនោះ មិនមែនជាអ្នកចាស់ ដែលធ្លាប់លេងឱ្យភ្នំពេញក្រោន កន្លងមកនោះទេ។
លោក Oleg បានទម្លាយថា ខ្សែប្រយុទ្ធដែលធ្លាប់បង្ហាញគុណភាពបញ្ចប់ទីបានយ៉ាងល្អរបស់ជប៉ុន Shintaro Shimizu រួមទាំងកីឡាករបរទេសចាស់ៗមួយចំនួនទៀត ដែលធ្លាប់លេងជាមួយក្រុមភ្នំពេញក្រោន ជាពិសេសកីឡាករជប៉ុនមានសញ្ជាតិខ្មែរ Takaki Ose, Yudai Ogawa និងខ្សែបម្រើប្រយុទ្ធកូឡុំប៊ីមានសញ្ជាតិខ្មែរ Nieto Rondon ក៏ដូចជាខ្សែប្រយុទ្ធ Jelle Goselink, Ibeh Ofufu និង Javier Gayoso នឹងមិនវិលត្រឡប់មកវិញទេ។
គ្រូបង្វឹកសញ្ជាតិអ៊ុយក្រែនរូបនេះ បានប្រាប់ប្រព័ន្ធផ្សព្វផ្សាយថា៖ «ខ្ញុំធ្លាប់បាននិយាយក្នុងសន្និសីទកាសែត៤ទៅ៥ដងហើយថា Shintaro នឹងមិនវិលត្រឡប់មកវិញនោះទេ ចំណែកកីឡាករដទៃទៀត ដែលធ្លាប់នៅទីនេះ ក៏នឹងមិនត្រឡប់មកវិញដូចគ្នា។ យើងនឹងនាំយកកីឡាករដែលថ្មី ពីលីគខ្លាំងៗ មានសមត្ថភាពខ្ពស់ ដែលអាចជួយក្រុមឱ្យកាន់តែរីកចម្រើន និងចែករំលែកចំណេះដឹងរបស់ពួកគេទៅកីឡាករខ្មែរ»។
លោក Oleg ដែលធ្លាប់ដឹកនាំក្រុមភ្នំពេញក្រោន ឱ្យឈ្នះពានលីគកំពូលកម្ពុជា ចំនួន២លើក កាលពីឆ្នាំ២០២១ និងឆ្នាំ២០២២ និងទើបឈ្នះពានរង្វាន់សម្តេច ហ៊ុន សែន ឆ្នាំ២០២៥នេះ បានអះអាងថា វាជាពេលវេលាដែល ភ្នំពេញក្រោន ត្រូវធ្វើការផ្លាស់ប្តូរខ្លះ ដែលមានភាពវិជ្ជមាន។ «យើងត្រូវការថាមពលថ្មី ឈាមថ្មី នៅក្នុងក្រុម ដូច្នេះយើងអាចប្រឹងប្រែងសម្រាប់ពានរង្វាន់ជាច្រើនទៀត ដូច្នេះការផ្លាស់ប្តូរនេះស្ថិតនៅក្នុងគំនិតរបស់យើង ដោយយើងចង់នាំយកនូវគុណភាពថ្មីបន្ថែមទៀត»។
លោកបានបន្ថែមថា៖ «ឥឡូវនេះយើងកំពុងជ្រើសរើសកីឡាករ ដែលស្របតាមគោលការណ៍របស់យើង ស្របទៅនឹងគុណភាពរបស់ក្រុម ដើម្បីជួយក្នុងការឈ្នះពានបន្ថែមទៀត និងជោគជ័យនៅលើឆាកអន្តរជាតិបន្តទៀត។ ក្រុមរបស់យើង កំពុងធ្វើការលើរឿងនេះ ដូច្នេះអ្នកគាំទ្រមិនចាំបាច់ស្មុគស្មាញជុំវិញការផ្លាស់ប្តូរនេះទេ»។
ខ្សែប្រយុទ្ធរបស់ជប៉ុន Shintaro Shimizu (ក្រហម) ពេលលេងឱ្យក្រុមភ្នំពេញក្រោន កាលពីរដូវកាល ឆ្នាំ២០២៣-២០២៤។ រូបថត សហការី
គិតមកដល់ពេលនេះ ភ្នំពេញក្រោន បានបញ្ចប់កិច្ចសន្យាជាមួយកីឡាករបរទេសរហូតដល់៦នាក់ គឺបានរក្សាទុកតែខ្សែការពាររបស់កូរ៉េខាងត្បូង Yi Young Park ម្នាក់ទេ តាមរយៈការបន្តកុងត្រាចំនួន១ឆ្នាំទៀត ហេតុនេះភ្នំពេញក្រោន ចាំបាច់ត្រូវជ្រើសរើសកីឡាករបរទេសបន្ថែមទៀត ដើម្បីត្រៀមការប្រកួតរដូវកាលថ្មី ជាពិសេសការប្រកួតពានរង្វាន់ AFC Challenge League 2025/2026 ដែលភ្នំពេញក្រោន ត្រូវប្រកួតជម្រុះជាមួយក្រុមជើងឯករបស់ប្រ៊ុយណេ Kasuka FC នៅថ្ងៃទី១២ ខែសីហា ឆ្នាំ២០២៥។
បើទោះបីជាក្រុមភ្នំពេញក្រោន បានត្រឹមប្រកួតជម្រុះពានរង្វាន់ AFC Challenge League 2025/2026 ខុសពីក្រុមម្ចាស់ជើងឯក ព្រះខ័នរាជស្វាយរៀង ដែលបានឡើងទៅលេងនៅវគ្គចែកពូលនៃពានរង្វាន់នេះ ដោយស្វ័យប្រវត្តិ ប៉ុន្តែលោក Oleg បានចាត់ទុកការទទួលបានកៅអីនេះថា ពិតជាដំណឹងវិជ្ជមាន សម្រាប់ក្លិប និងប្រជាជនកម្ពុជា ដែលភ្នំពញក្រោន បានលេងតំណាងឱ្យកម្ពុជា ជាថ្មី នៅលើឆាកអន្តរជាតិ។
លោកបញ្ជាក់ថា៖ «ពិតណាស់ដំបូងឡើយ យើងមិនបានរំពឹងថា នឹងបានកៅអីនេះទេ តែរហូតដល់ចប់រដូវកាល យើងទទួលបានដំណឹងនេះ ជុំវិញការកែសម្រួល ដូច្នេះវាពិតជាល្អ ហើយគ្រប់គ្នាមានការរំភើប និងរង់ចាំសម្រាប់ពានរង្វាន់នេះ»។
គ្រូបង្គោលក្រុមភ្នំពេញក្រោន លោក Oleg បានបន្ថែមថា៖ «យើងរីករាយខ្លាំងណាស់ ហើយយើងនឹងរៀបចំក្រុមសម្រាប់វគ្គជម្រុះនេះ។ គោលដៅរបស់យើង គឺឡើងវគ្គចែកពូល ដូច្នេះវាជាការប្រកួតប្រជែងដ៏ល្អ។ យើងនឹងរៀបចំក្រុម រៀបចំកីឡាករ ជាមួយតាក់តិច និងអ្វីៗគ្រប់យ៉ាង ដើម្បីទទួលបានលទ្ធផលល្អ៕
