ប្រតិភូកីឡាហាប់គីដូកម្ពុជា បានថតរួមគ្នាជាមួយថ្នាក់ដឹកនាំរបស់បណ្តាប្រទេសផ្សេងៗ ដែលបានចូលរួមការប្រកួតកីឡាហាប់គីដូជើងឯ៝កអាស៊ាន នៅប្រទេសឥណ្ឌូនេស៊ី។ រូបថត សហព័ន្ធ
ក្រុមកីឡាករ កីឡាការិនីហាប់គីដូកម្ពុជា បានបញ្ចប់ការប្រកួតកីឡាហាប់គីដូជើងឯកអាស៊ីអាគ្នេយ៍ លើកទី២ ឆ្នាំ២០២៥ (2nd South East Asia Hapkido Championship 2025) នៅប្រទេសឥណ្ឌូនេស៊ី ដោយឈ្នះបានមេដាយសរុបចំនួន២៣ គឺមេដាយមាស៤ ប្រាក់៧ និងមេដាយសំរឹទ្ធចំនួន១២។
តាមរយៈការប្រកួតចំនួន២ថ្ងៃ កាលពីថ្ងៃទី១៤ និងទី១៥ ខែមិថុនានេះ ក្រុមអត្តលិកកីឡាហាប់គីដូកម្ពុជា បានធ្វើឱ្យបណ្តាប្រទេសទាំង៨ ដែលបានចូលរួមក្នុងការប្រកួតកីឡាហាប់គីដូជើងឯកអាស៊ាននេះ មានការភ្ញាក់ផ្អើល តាមរយៈការដណ្តើមបានមេដាយមាស ប្រាក់ និងសំរឹទ្ធ ស្ទើរគ្រប់វិញ្ញាសា ជាពិសេសគឺអត្តពលិកទាំង១១នាក់របស់កម្ពុជា សុទ្ធតែដណ្តើមបានមេដាយដូចគ្នា។
លោក គង់ ចាន់ធីណា អគ្គលេខាធិការសហព័ន្ធខ្មែរកីឡាហាប់គីដូ បានប្រាប់ពីប្រទេសឥណ្ឌូនេស៊ីមកថា៖ «មុនការប្រកួត យើងគិតថា ឱ្យតែដណ្តើមបានមេដាយមាសចន្លោះពី២ទៅ៣គ្រឿង វាអាចបញ្ជាក់ពីកម្រិតបច្ចេកទេសរបស់យើងប្រដំប្រសងនឹងប្រទេសមួយចំនួនទៅហើយ ប៉ុន្តែជាក់ស្តែងយើងដណ្តើមបានមេដាយមាស៤ រួមទាំងមេដាយប្រាក់ និងសំរឹទ្ធជាច្រើនទៀត គឺពិតជារំភើបណាស់»។
លោកបញ្ជាក់ថា៖ «យើងទទួលបានលទ្ធផលល្អប្រសើរជាងការរំពឹងទុក ហើយការដណ្តើមបានមេដាយជាច្រើននេះ ធ្វើឱ្យប្រណ្តាប្រទេសចូលរួមទាំងអស់ មានការភ្ញាក់ផ្អើល ដែលកម្ពុជាយើងធ្វើបានល្អ ទោះបីជាក្រុមអត្តពលិករបស់យើង មិនសូវមានឱកាសបានចេញទៅប្រកួតនៅក្រៅប្រទេស»។
នៅក្នុងចំណោមមេដាយទាំង២៣ ដែលក្រុមហាប់គីដូកម្ពុជា ដណ្តើមបានពីការប្រកួតជើងឯកអាស៊ាននេះ កីឡាការិនី គង់ម៉ូណា ជេសស៊ីកា ដណ្តើមបានមេដាយទាំង៣វិញ្ញាសា ដែលកញ្ញាបានឈ្នះមេដាយមាស១ ប្រាក់១ និងសំរឹទ្ធ១ ចំណែកប្អូនស្រីរបស់នាង គង់ម៉ូណា ដាយអាណា ឈ្នះបានមេដាយមាស១ និងសំរឹទ្ធ១ ហើយកីឡាករ គង់ម៉ូណា មិថុរ៉ា ដែលជាបងប្រុស ដណ្តើមបានមេដាយប្រាក់ចំនួន២។
លោក គង់ ចាន់ធីណា ពេលឡើងបំពាក់មេដាយដល់អត្តពលិកកម្ពុជា និងអត្តពលិកអន្តរជាតិ ដែលដណ្តើមបានមេដាយ ក្នុងការប្រកួតកីឡាហាប់គីដូជើងឯកអាស៊ាន លើកទី២ ឆ្នាំ២០២៥។ រូបថត សហព័ន្ធ
ជាមួយគ្នានេះ កីឡាករវ័យក្មេង សុខុន សីហនុត ក៏ដណ្តើមបានមេដាយទាំង៣វិញ្ញាសា ដែរ គឺរូបគេបានមេដាយមាស លើវិញ្ញាសាប្រយុទ្ធ និងមេដាយសំរឹទ្ធចំនួន២ទៀត លើវិញ្ញាសាលោតចម្ងាយ និងវិញ្ញាសាកាច់។ រីឯមេដាយមាស១ទៀត ដណ្តើមបានដោយកីឡាករ ភិន មុនីរតន៍ លើវិញ្ញាសាលោតចម្ងាយ ហើយ មុនីរតន៍ ក៏ដណ្តើមបានមេដាយប្រាក់លើវិញ្ញាសាប្រយុទ្ធផងដែរ។
ជាមួយការដណ្តើមបានមេដាយមាស៤ ប្រាក់៧ និងសំរឹទ្ធចំនួន១២ ពីការប្រកួតកីឡាហាប់គីដូជើងឯកអាស៊ាននេះ លោក គង់ ចាន់ធីណា បានបង្ហើបថា ប្រទេសមួយចំនួន មិនធ្លាប់ដឹងថា កម្ពុជា មានវិស័យកីឡាហាប់កីដូនោះទេ ប៉ុន្តែក្រុមកម្ពុជា បែរជាបង្ហាញសមត្ថភាពប្រកួតប្រជែងគួរឱ្យកោតសរសើរ។
លោក ចាន់ធីណា ដែលជាគ្រូធំប្រចាំសហព័ន្ធខ្មែរកីឡាហាប់គីដូផងនោះ បញ្ជាក់ថា៖ «ប្រទេសខ្លះ មានការងឿយឆ្ងល់ ព្រោះពួកគាត់មិនដឹងថា នៅកម្ពុជាយើង មានប្រភេទកីឡាហាប់គីដូដែរ តែនៅពេលឃើញវត្តមានក្រុមហាប់គីដូរបស់យើង ធ្វើបានល្អបែបនេះ គឺប្រតិភូរបស់ប្រទេសផ្សេង មានការភ្ញាក់ផ្អើល និងបានកោតសរសើរដល់ពួកយើង ជាពិសេសម្ចាស់ផ្ទះឥណ្ឌូនេស៊ីតែម្តង ដែលមានការរីកចម្រើនខ្លាំងលើប្រភេទកីឡាហាប់គីដូនេះ»។
ជាមួយភាពរីកចម្រើនរបស់ក្រុមហាប់គីដូកម្ពុជានេះ លោក ចាន់ធីណា បានបន្ថែមថា៖ «ទិសដៅរបស់ថ្នាក់ដឹកនាំ ជាពិសេសលោកឧកញ៉ា សៅ សេងហាក់ ជាប្រធានសហព័ន្ធ បានខិតខំប្រឹងប្រែងជំរុញការអភិវឌ្ឍវិស័យកីឡានេះនៅកម្ពុជា ឱ្យបោះជំហានទៅមុខបានល្អប្រសើរជាងមុន ដោយលោកឧកញ៉ា បានលះបង់ថវិកាផ្ទាល់ខ្លួន គឺធ្វើម៉េចឱ្យក្រុមហាប់គីដូរបស់យើង បានចេញទៅប្រកួត នៅលើឆាកអន្តរជាតិ»។
គួរបញ្ជាក់ថា នៅក្នុងរយៈពេលជាង៣០ឆ្នាំមកនេះ សហព័ន្ធខ្មែរកីឡាហាប់គីដូ ទើបតែមានឱកាសបញ្ជូនក្រុមអត្តពលិកទៅចូលរួមការប្រកួតនៅលើឆាកអន្តរជាតិ ជាលើកទី២នេះទេ ខណៈការចូលរួមការប្រកួតជាលើកដំបូង ក្នុងការប្រកួតកីឡាហាប់គីដូជើងឯកពិភពលោក ឆ្នាំ២០២៤ (World I.H.F Hapkido Championship 2024) នៅប្រទេសថៃ ក្រុមហាប់គីដូកម្ពុជា ទទួលបានលទ្ធផលដ៏ត្រចះត្រចង់ គឺដណ្តើមបានមេដាយមាស១២ ប្រាក់១៣ និងសំរឹទ្ធ១៥ សរុបចំនួន៤០មេដាយ៕
