លោក Heo Jae Won ត្រូវបានតែងតាំងជាគ្រូបង្គោលថ្មីរបស់ក្លិបបាល់ទាត់ឡាយហ្វ។ រូបថត Life FC
ក្លិបបាល់ទាត់ឡាយហ្វ (Life FC) បានបង្ហាញពីទំនុកចិត្តខ្ពស់ចំពោះគ្រូបង្គោលថ្មី លោក Heo Jae Won ក្នុងការដឹកនាំក្រុមឆ្ពោះទៅរកការទទួលបាននូវសមិទ្ធផលជោគជ័យ សម្រាប់ការប្រកួតប្រជែងនៅរដូវកាលថ្មី ឆ្នាំ២០២៥-២០២៥ បន្ទាប់ពីក្រុមមួយនេះ បានបញ្ចប់ការប្រកួត នៅរដូវកាលចាស់ ដោយមិនទទួលបានអ្វីសោះនោះ។
Life FC បានប្រកាសតែងតាំងលោក Heo Jae Won ជាគ្រូបង្គោលថ្មី កាលពីល្ងាចថ្ងៃចន្ទហើយតាមរយៈការប្រកួតជាផ្លូវការនេះ គ្រូបង្វឹកជនជាតិកូរ៉េខាងត្បូងរូបនេះ នឹងចូលខ្លួនដឹកនាំក្រុមជំនួសអតីតគ្រូបង្គោលចាស់ លោក Jorg Peter Steinebrunner ដែលត្រូវបាន Lifeប្រកាសចែកផ្លូវគ្នា កាលពីថ្ងៃទី៦ ខែមិថុនា ឆ្នាំ២០២៥។
មិនមែនតែ លោក Jorg Peter Steinebrunner ម្នាក់ទេ ដែល Life FC បានបញ្ចប់កិច្ចសន្យា ប៉ុន្តែលោក កាក់ មេសា ជាអ្នកចាត់ការទូទៅ ក៏ត្រូវបានក្លិបនេះ ប្រកាសពីការបញ្ចប់កិច្ចសន្យា កាលពីថ្ងៃអាទិត្យ ហើយកីឡាករបរទេសដូចជា Samual Erik Strong, Okoro Osa Orobosa, Kipson Atuheire និង Seo-in Kim និងកីឡាករក្នុងស្រុក លីន តារាដេវិត្យ, ចាន់ សារ៉ាពេជ្រ, សន សុវត្ថិ, ម៉េង សុភា, រង់ ពិសី, ទៀត គីមហេង សុទ្ធតែ Life បានប្រកាសពីការបញ្ចប់កិច្ចសន្យា។
ជាមួយការរុះរើទាំងក្បាលម៉ាស៊ីនដឹកនាំ និងកីឡាករជាច្រើននាក់នេះ ត្រូវបានគេគិតថា ដោយសារក្លិបបាល់ទាត់ឡាយហ្វ ដណ្តើមលទ្ធផលមិនល្អ ក្នុងការប្រកួតរដូវកាលចាស់ ឆ្នាំ២០២៤-២០២៥ ដោយក្រុមនេះ បានត្រឹមចំណាត់ថ្នាក់លេខ១០ សម្រាប់ការប្រកួតលីគកំពូលកម្ពុជា ដោយឈ្នះ៤ ស្មើ៥ ចាញ់១៩ដង និងបានធ្លាក់ចេញពីការប្រកួតពានរង្វាន់សម្តេច ហ៊ុន សែន នៅត្រឹមវគ្គជម្រុះ១៦ក្រុម ក្រោយចាញ់ក្រុមគិរីវង់សុខសែនជ័យ ២-០ និង ៣-២ សម្រាប់ការប្រកួតទាំង២ជើង។
យ៉ាងណាក៏ដោយ ជាមួយការប្រកាសបេក្ខភាពគ្រូបង្គោលថ្មី លោក Heo Jae Won ក្លិបបាល់ទាត់ឡាយហ្វ បានបង្ហាញទំនុកចិត្តខ្ពស់ទៅលើគ្រូបង្វឹកកូរ៉េខាងត្បូងម្នាក់នេះ ថា នឹងនាំយកនូវបទពិសោធន៍បាល់ទាត់ល្អៗ មកបណ្តុះក្តីសង្ឃឹមដល់យុវជន ក៏ដូចជាដឹកនាំក្រុម Life FC ឆ្ពោះទៅរកភាពជោគជ័យ។
សកម្មភាពប្រកួតរបស់ក្រុម Life FC ក្នុងការប្រកួតលីគកំពូលកម្ពុជា រដូវកាលឆ្នាំ២០២៤-២០២៥។ រូបថត Life FC
Life FC បានបញ្ជាក់តាមសេចក្តីប្រកាសរបស់ខ្លួនបែបនេះថា៖ «ជាមួយនឹងបទពិសោធន៍ និងទេពកោសល្យ ក្នុងភាពជាគ្រូបង្វឹកដឹកនាំបាល់ទាត់អស់ជាច្រើនឆ្នាំ លោក Heo Jae Won នឹងនាំមកនូវបទពិសោធ បាល់ទាត់ ដែលបណ្តុះក្តីស្រមៃរបស់យុវជន ក្លិបបាល់ទាត់ឡាយហ្វ និងបង្ហាញផ្លូវសម្រាប់អនាគតកីឡាករជំនាន់ក្រោយរបស់កម្ពុជា នៅក្នុងរដូវកាលថ្មីដ៏គួរឱ្យរំភើបនាពេលខាងមុខនេះ»។
ក្លិបបានបន្ថែមថា៖ «យើងខ្ញុំកំពុងទន្ទឹងរង់ចាំនូវរដូវកាលមួយ ដែលពោរពេញទៅដោយការប្រកួតប្រជែងដ៏ខ្លាំងខ្លា ដែលមានការរូបរួមគ្នាជាក្រុម ឆ្ពោះទៅរកភាពជោគជ័យ និងពេលវេលា ដែលមិនអាចបំភ្លេចបាន។ សូមរង់ចាំតាមដានព័ត៌មានថ្មីៗ ហើយត្រៀមខ្លួនដើម្បីគាំទ្រក្រុមរបស់យើងសម្រាប់រដូវកាលថ្មីនេះ!»។
តាមប្រវត្តិត្រួសៗ លោក Heo Jae Won ធ្លាប់ជាប់ជាកីឡាករជម្រើសជាតិកូរ៉េខាងត្បូង ទាំងក្រុមអាយុក្រោម២០ឆ្នាំ និងអាយុក្រោម២៣ឆ្នាំ មុនពេលខ្សែការពារកម្ពស់១,៨៧ម៉ែត្ររូបនេះ ចូលប្រកបអាជីពជាមួយក្លិប លេងនៅលីគកូរ៉េខាងត្បូង ចំនួន៥ ជាបន្តបន្ទាប់គ្នា ពីឆ្នាំ២០០៦ ដល់ឆ្នាំ២០១៥។
បន្ទាប់មកនៅឆ្នាំ២០១៦ លោកបានចេញមកប្រកកអាជីពនៅក្រៅស្រុកជាមួយក្រុម Al-Khor Sports Club ដែលលេងនៅលីគកាតា និងក្រុម Dibba Football Club ហើយនៅឆ្នាំ២០១៧ លោក Heo Jae Won បានមករួមរស់ជាមួយក្រុម Pahang FC នៅលីគកំពូលម៉ាឡេស៊ី មុនវិលត្រឡប់ទៅលេងឱ្យក្រុម Jeonnam Dragons នៅស្រុកកំណើតវិញ នៅឆ្នាំ២០១៨។
យ៉ាងណាក៏ដោយ គេនៅមិនទាន់ប្រាកដថា ការធ្វើដំណើរមកប្រកបអាជីពជាលើកដំបូង នៅប្រទេសកម្ពុជា ក្នុងនាមជាគ្រូបង្គោលឱ្យក្រុម Life FC លោក Heo Jae Won នឹងអាចកែប្រែស្ថានភាពក្រុមមួយនេះ ឱ្យឈានទៅរកការប្រកួតប្រជែងកាន់តែខ្លាំង ឬក៏ជួបហេតុការណ៍គិតមិនដល់ដូចគ្រូបង្វឹក Jorg Peter Steinebrunner នោះទេ ព្រោះកៅអីនៅ Life FC រាងក្តៅបន្តិចហើយ ព្រោះគ្រូបង្វឹកជើងចាស់ លោក ប្រាក់ សុវណ្ណារ៉ា ក៏ធ្លាប់ត្រូវបានក្លិបមួយនេះ បញ្ចប់កិច្ចសន្យាផងដែរ៕
