លោក ពេជ្រ សុផាន់ និងកីឡាករ ពេជ្រ សម្បត្តិ ពេលថតជាមួយគ្នា បន្ទាប់ពីដណ្តើមបានខ្សែក្រវាត់ សម្រាប់ការប្រកួតនៅអាមេរិក កាលពីថ្ងៃទី៣១ ខែឧសភា ឆ្នាំ២០២៥។ រូបថត Krud Kun Khmer
កីឡាករ សុខ ធី ហៅ កាកា បានផ្ទុះកំហឹង និងចោទប្រកាន់លោក ពេជ្រ សុផាន់ ថា ជាគ្រូអួត ដែលព្យាយាមនិយាយលើកខ្លួនឯង និងកូនសិស្ស ពេជ្រ សម្បត្តិ ខ្លាំងពេក នៅពេលអ្នកទាំង២នេះ បានចុះកិច្ចសន្យាប្រកួតគ្នាជាលើកដំបូង នៅលើសង្វៀនហង្សមាស នាថ្ងៃទី២៨ ខែមិថុនា ខាងមុខនេះ។
សម្រាប់ការផ្គូផ្គងឱ្យ សុខ ធី និង ពេជ្រ សម្បត្តិ ជួបគ្នាជាលើកដំបូង ក្នុងការប្រកួតដណ្តើមខ្សែក្រវាត់ ប្រភេទម្ងន់៦០គីឡូក្រាមនេះ លោក ពេជ្រ សុផាន់ ដែលត្រូវបានគេចាត់ទុកថា ជា «គ្រូឆ្នើម» នោះ បានប្រាប់ប្រព័ន្ធផ្សព្វផ្សាយ នៅព្រលានយន្តហោះអន្តរជាតិភ្នំពេញ ក្នុងដំណើរវិលត្រឡប់មកពីប្រកួតនៅសហរដ្ឋអាមេរិកថា សុខ ធី បានសុំចុះចាញ់ ពេជ្រ សម្បត្តិ រួចទៅហើយ សម្រាប់ការប្រកួតលក្ខណៈពាក់ហ្គង់តូចចេញម្រាម។
លោកបានបញ្ជាក់ថា៖ «ការប្រកួតពាក់ហ្គង់តូច ឬអំបោះឆៅ សុខ ធី អត់ហ៊ានជាមួយ ពេជ្រ សម្បត្តិ ទេ គឺសុំឱ្យ សម្បត្តិ ឈ្នះទៅហើយ តែដោយសារអ្នកគាំទ្រចង់ទស្សនាការប្រកួតរបស់អ្នកទាំង២នេះ យើងក៏តាមសំណើ សុខ ធី ទៅ គឺពាក់ហ្គង់ធម្មតា វ៉ៃ៥ទឹក ដើម្បីឱ្យអស់ចិត្តរៀងខ្លួន»។
ជាមួយការសម្រេចប្រកួតពាក់ហ្គង់ធម្មតានេះ លោក ពេជ្រ សុផាន់ នៅតែជឿជាក់លើ ពេជ្រ សម្បត្តិ ថា នឹងធ្វើបានល្អ។ ផ្ទុយទៅវិញ លោកបារម្ភទៅលើ សុខ ធី ដែលអាចនឹងមិនហ៊ានចូលវាយប្តូរជាមួយ ពេជ្រ សម្បត្តិ គឺអាចប្រកួតយកតាមលំនាំ Muay Thai ឬហៅថា «ផ្ទះលេខ២» ដែលវ៉ៃបែបខ្លាចៗ ឱ្យតែចប់៥ទឹក។
លោក សុផាន់ បានសង្កត់ធ្ងន់ថា៖ «ចំពោះ ពេជ្រ សម្បត្តិ ធ្លាប់ប្រកួតគ្រប់ប្រភេទហ្គង់អស់ហើយ ហេតុនេះវាមិនជាបញ្ហាអ្វីសម្រាប់រូបគេនោះទេ ហើយការប្រកួតជាមួយ សុខ ធី នេះ បើ សុខ ធី មានបេះដូងជាអ្នកប្រយុទ្ធពិតមែន ខ្ញុំជឿជាក់ថា គូហ្នឹងល្អមើល ប៉ុន្តែបើ សុខ ធី វាយរបៀបផ្ទះលេខ២ ដែលរូបគេធ្លាប់រៀនសូត្រពីមុនមកនោះ ខ្ញុំជឿថា អ្នកគាំទ្រ នឹងជេរផ្អើលប្រទេសហើយ»។
កីឡាករ សុខ ធី បានស្វាគមន៍ដល់អ្នកគាំទ្រ មុនពេលប្រកួតកន្លងមក ខណៈពេលនេះរូបគេ កំពុងខឹងនឹងលោកគ្រូ ពេជ្រ សុផាន់។ រូបថត KKIF
ចំពោះការលើកឡើងរបស់ លោក ពេជ្រ សុផាន់ នេះ បានធ្វើឱ្យកីឡាករ សុខ ធី ផ្ទុះកំហឹងខ្លាំង ហើយបានចោទលោក សុផាន់ ថា ជាគ្រូអួត ដោយបាននិយាយបំផ្លើសការពិត លើកតែខ្លួនឯង និងកូនសិស្សជ្រុលពេក ហើយបានទម្លាក់ភាពកម្សោយមកឱ្យរូបគេ ដែលមិនធ្លាប់បាននិយាយថា ខ្លាច ពេជ្រ សម្បត្តិ នោះទេ។
សុខ ធី បាននិយាយតបទៅកាន់លោក ពេជ្រ សុផាន់ បែបនេះថា៖ «ខ្ញុំធ្លាប់និយាយមែនថា ខ្ញុំអត់ប្រកួតហ្គង់តូចទេ ដោយសារខ្ញុំធ្លាប់ថ្លោះដៃ ធ្វើឱ្យឆ្អឹងដៃ (ម្រាមដៃមេខាងឆ្វេង)របស់ខ្ញុំហើមមកដល់សព្វថ្ងៃ ប៉ុន្តែខ្ញុំមិនដែលបាននិយាយថា ខ្ញុំសុំចុះចាញ់ ឬខ្លាច ពេជ្រ សម្បត្តិ ខ្លាចហ្គង់តូច្ធផ្សព្វផ្សាយ ្រេរឿងវ៉ៃហ្គង់តូច ដូចការលើកឡើងរបស់លោកគ្រូ ពេជ្រ សុផាន់ នោះទេ»។
កីឡាករ សុខ ធី ដែលបានធំធាត់ និងហ្វឹកហាត់ប្រដាល់នៅប្រទេសថៃ បានបន្ថែមថា៖ «គាត់ (ពេជ្រ សុផាន់) អួតលើកតែខ្លួនឯង ដោយអាងថា ខ្លួនបានឡើងធ្វើជាគ្រូឆ្នើម ហើយនៅពេលខ្ញុំនិយាយតបបែបនេះ កុំថា ខ្ញុំអត់ស្គាល់ចាស់ស្គាល់ទុំ ព្រោះបើចាស់ធ្វើខុសបែបនេះ ខ្ញុំក៏អត់ខ្វល់នោះដែរ»។
បើទោះបីជាមានការប៉ះពាក្យសំដីគ្នា មុនការប្រកួតយ៉ាងនេះក្តី ប៉ុន្តែលោក គ្រី ពីឡុត អ្នកផ្គូផ្គង និងជាពិធីករនៅសង្វៀនហង្សមាស បានបញ្ជាក់ថា ទាំងភាគី ពេជ្រ សម្បត្តិ និង សុខ ធី បានផ្តិតមេដាយទៅលើកិច្ចសន្យានៃការប្រកួត នៅថ្ងៃទី២៨ ខែមិថុនា ខាងមុខនេះរួចហើយ អ៊ីចឹងកីឡាករ ដែលខកខានមិនបានមកប្រកួត នឹងប្រឈមការសងមកម្ចាស់កម្មវិធី និងប្រឈមនឹងមុខច្បាប់ លើកលែងតែកីឡាករនោះឈឺ តែឱ្យប្រាកដថាឈឺ ព្រោះបើពិនិត្យឃើញថា អត់ឈឺ ក៏មានបញ្ហាដូចគ្នា៕
