.jpg)
លោក ញាន ផល្លិត ជាអ្នកផលិតរថយន្ដម៉ូដែលអង្គរជាច្រើនស៊េរី រួមទាំង ម៉ូតូ រ៉ឺម៉ក និងរថយន្ដក្រុង។ រូបថត សហការី
ភ្នំពេញៈ ជិត ២ ទសវត្សរ៍មកហើយ ដែលឡានអង្គរ ជារថយន្ដប្រើថាមពលអគ្គិសនីដំបូងបំផុតនៅកម្ពុជា ផលិតដោយកូនខ្មែរ លោក ញាន ផល្លិត បានបង្ហាញរូបរាងនៅលើដងវិថីក្នុងរាជធានីភ្នំពេញ និងមានសម្ទុះគាំទ្រខ្លាំង។
យ៉ាងណាមិញ បច្ចុប្បន្ន បញ្ហាអវត្ដមាននៅលើទីផ្សាររថយន្ដ បានធ្វើឱ្យអ្នកទន្ទឹងរង់ចាំមានការងឿងឆ្ងល់ដោយនាំគ្នាសាកសួរនៅលើបណ្ដាញសង្គមហ្វេសប៊ុក ពីព្រោះពួកគេគិតថា វាជារឿងសោកស្ដាយដ៏ធំមួយ បើគម្រោងនេះមិនរីកចម្រើនទៅមុខ។
ពីរថយន្ដដំបូងក្នុងឆ្នាំ ២០០៣ រហូតដល់ស្នាដៃក្រោយៗមក លោក ផល្លិត បានសម្រេចសមិទ្ធផលជាច្រើន ដូចជា ម៉ូតូ ឡាន កង់បី ឡានក្រុង ទាំងដើរដោយអគ្គិសនី និងសូឡា បូកផ្សំជាមួយបច្ចេកវិទ្យាទំនើប រួមទាំងរថយន្ដវៃឆ្លាត ១ គ្រឿងផលិតក្នុងឆ្នាំ ២០១០។
ម៉ូដែលរថយន្ដវៃឆ្លាតមួយនេះ មិនបើកទ្វារឱ្យអ្នកផ្សេងចូលក្រៅពីម្ចាស់ ហើយទោះអាចពេលចូលទៅអង្គុយបានវាប្រាប់ថា អ្នកមិនមែនម្ចាស់វា បើកបរក៏មិនបាន។ ពេលចង់ចេញមកក្រៅវិញ វាមិនបើកទ្វារឱ្យចេញដែរ។ នៅពេលបិទទ្វារឡានខ្លាំងពេក ក៏វាព្រមានថា កុំបិទទ្វារខ្លាំងៗពេក និងមានបច្ចេកវិទ្យាប្លែកៗ រួមទាំងកុងតាក់បញ្ជាជាច្រើនទៀត។
លោក ផល្លិត និយាយដោយរីករាយ និងមានមោទនភាពពេលអង្គុយក្នុងរថយន្ដស្នាដៃរបស់ខ្លួនឯងថា៖ «មានអ្នកខ្លះសួរថា អត់ស្លាកលេខអ៊ីចឹង ប៉ូលិសហៅអត់? ប៉ុន្តែកន្លងមក ខ្ញុំមិនមានបញ្ហាអីទេ មានតែប៉ូលិស គាត់ឃើញលើកដៃឱ្យជាសញ្ញា ក្នុងន័យអបអរយើងវិញ ព្រោះមួយស្រុកខ្មែរមានតែមួយ»។
ពិតជាគួរឱ្យសោកស្តាយបើទោះកិត្តិស័ព្ទរបស់លោកល្បីខ្ទរខ្ទារ មានអ្នកអបអរ និងកោតសរសើរចាប់ពីក្នុងស្រុកដល់ក្រៅស្រុក រហូតមានក្រុមហ៊ុនពីអាមេរិក និងអាល្លឺម៉ង់មកថតផ្ទាល់ ប៉ុន្តែកង្វះអ្នកវិនិយោគ ធ្វើឱ្យគម្រោងនេះជាប់គាំង។
ស្ថាបនិកឡានអង្គររូបនេះ បានឱ្យដឹងថា កន្លងមកឃើញមានអ្នកគាំទ្រច្រើន ប៉ុន្តែពួកគាត់អាក់អន់ចិត្ត ដោយសារតែលោកមិនទាន់អាចផលិតសម្រាប់ដាក់លក់បាន។
រ៉ឺម៉កកង់ ៣ សមិទ្ធផលរបស់ស្ថាបនិកឡានអង្គរ។ រូបថត សហការី
លោក ផល្លិត ប្រាប់ ភ្នំពេញ ប៉ុស្តិ៍ អំពីមូលហេតុខកខានផលិតរថយន្ដលក់លើទីផ្សារនេះថា៖ «ការសម្រេចបានអ្វីមួយហើយ គ្មានអ្នកណា ចង់បោះបង់វាពាក់កណ្ដាលទីទេ។ ខ្ញុំផ្ទាល់ក៏មិនគិតបោះបង់ដែរ។ ខ្ញុំចង់បញ្ជាក់បងប្អូនក្នុងហ្វេសប៊ុក ដែលអ្នកខ្លះមិនយល់ និងសួរថា ធ្វើហើយម៉េចមិនលក់ ធ្វើបានតែតាំង បានតែអួត»។
លោកបន្ដថា៖ «ខ្ញុំចង់ប្រាប់ថា ខ្ញុំមិនបានចង់អួតអីទេ។ ខ្ញុំគ្រាន់តែគិតចង់បង្ហាញស្នាដៃថា ខ្មែរយើងអាចធ្វើបាន។ ប៉ុន្តែ កត្តាចម្បង គឺយើងមិនមានអ្នកវិនិយោគ។ បើខ្ញុំមានលុយគ្រប់គ្រាន់ មានដើមទុន មានក្រុមហ៊ុនណាច្បាស់លាស់វិនិយោគ យើងនឹងចាប់ផ្ដើមធ្វើជាចង្វាក់ផលិតកម្ម រោងចក្រធ្វើវាលក់ជាទ្រង់ទ្រាយធំ ដូចនៅបណ្ដាប្រទេសគេដែរ មិនឱ្យអ្នកគាំទ្រខកចិត្តទេ»។
ទាក់ទងនឹងខ្វះអ្នកវិនិយោគនេះ លោកបន្តការបកស្រាយថា ទី១ វាជាផលិតផលធ្វើដោយដៃសុទ្ធ។ ដូច្នេះលោកមិនអាចផលិត ១ ថ្ងៃបាន ៤-១០ គ្រឿងសម្រាប់ការលក់ទេ ដោយខ្លះត្រូវប្រើពេលរាប់ខែ រាប់ឆ្នាំឯណោះ។ ទី២ ដោយសារវាជារថយន្ដធ្វើឡើងដោយដៃ ទើបវាមិនទាន់មានលក្ខណៈស្ដង់ដាអន្តរជាតិ។
ជាវិស្វករស្វ័យសិក្សាក្នុងការផលិតរថយន្ដ ស្ថាបនិកឡានអង្គរ បានបញ្ជាក់ថា៖ «សំខាន់ គឺស្ដង់ដា គុណភាពហ្នឹងឯង ពីព្រោះសុវត្ថិភាពអ្នកដំណើរជាអាទិភាពចម្បង។ យើងធ្វើលក់ ចេះតែបានហើយ តែយើងមិនចង់លក់ ព្រោះវាយូរ ហើយមិនចង់បង្ខំលក់របស់ដែលមិនមានស្ដង់ដា»។
ថ្វីដ្បិតភាពជាក់ស្ដែង រថយន្ដដែលលោកផលិត លោកបាននិងកំពុងបើកបរជារៀងរាល់ថ្ងៃ ដូចជា ទៅហាត់ប្រាណ ទៅខេត្ត រហូតដល់សៀមរាប កោះកុង កំពត ដោយមិនមានបញ្ហាអ្វីយ៉ាងណាក៏ដោយ ក៏លោកនៅតែមិនចង់ទាន់ដាក់លក់ពួកវានាពេលនេះដែរ។
រថយន្ដក្រុងរបស់លោក ញាន ផល្លិត រំលេចម៉ូដែល Cambodia។ រូបថត សហការី
លើសពីនេះ ម៉ាឡេស៊ី ចង់ទិញរថយន្ដរបស់លោកយកទៅតាំងនៅកាស៊ីណូ ដោយហ៊ានឱ្យតម្លៃរាប់ម៉ឺនដុល្លារ។ លោក ផល្លិត ឱ្យដឹងថា ដោយសារវាជាស្នាដៃទី១ លោកចង់ទុកជាគំរូ មានរូបរាងជាក់ស្ដែង និងជាប្រវត្តិសាស្ត្រនៅស្រុកខ្មែរ។
ជាង ៥ ឆ្នាំដោយគ្មានសកម្មភាពអ្វីទាក់ទងការផលិត ឬអភិវឌ្ឍ លោកបង្ហើបឱ្យដឹងថា៖ «ខ្ញុំមានបញ្ហាសុខភាព។ ខ្ញុំសម្រាកមួយរយៈ ដោយមិនបានអភិវឌ្ឍអ្វីថ្មីទេ។ ប៉ុន្តែខ្ញុំនៅតែបន្ដខិតខំស្រាវជ្រាវពីបច្ចេកវិទ្យាថ្មីៗ។ យើងហាត់ប្រាណបណ្ដើរ ធ្វើការបណ្ដើរពីព្រោះខ្ញុំគ្រោងបង្កើតយានជំនិះថ្មី និងរកដៃគូវិនិយោគបន្ថែម»។
លោកថា លោកមិនត្រឹមតែសម្រាប់យានជំនិះលើគោកទេ តែលោកមានផែនការផលិតតាក់ស៊ីអាកាស ទូកសូឡា ដែលមានន័យថា យានយន្ដគ្រប់មធ្យោបាយធ្វើដំណើរទាំងផ្លូវគោក ផ្លូវទឹក និងអាកាស។ លោកបានសិក្សាពីផ្នែកទាំងនេះមួយចំនួនធំហើយ។
លោក ញាន ផល្លិត ជាមួយម៉ូតូអគ្គិសនីដែលលោកផលិតឡើងខ្លួនឯង។ រូបថត សហការី
ឆ្លើយតបគម្រោងអ្នកស្នងលើការផលិតស្នាដៃក្នុងស្រុកនេះ លោក ផល្លិត បានបង្ហើបឱ្យដឹងថា លោកមានកូនស្រីម្នាក់ និងកូនប្រុសម្នាក់ ដែលទំនងបន្ដមរតកនេះ។
ប៉ុន្តែលោក ផល្លិត អះអាងថា ពួកគេនៅក្មេងខ្ចី ដែលមិនទាន់ធ្វើបានល្អិតល្អន់ដូចលោកទេ ហើយលោកក៏កំពុងដុសខាត់ពួកគេបន្ថែម។
លោកថា៖ «ខ្ញុំអាយុក្បែរ ៧០ ហើយ តែច្រើនប៉ុនណាក៏ខ្ញុំនៅតែព្យាយាមធ្វើ។ បើធ្វើខ្លួនឯងមិនបាន ក៏បង្គាប់ប្រាប់គេ ពីព្រោះវានៅតែជាបំណងខ្ញុំ មិនថា លទ្ធផលទៅជាយ៉ាងណានៅថ្ងៃមុខក៏ដោយ»។
សម្រាប់ព័ត៌មានបន្ថែម សុំចូលហ្វេសប៊ុកលោក ផល្លិត គឺ @nheanphaleok៕
វីដេអូ៖
