ក្រុងម៉ូស៊ុល៖ ធ្លាប់តែឃើញគំនរបាក់បែកនៃទីក្រុងម៉ូស៊ុល ដែលត្រូវបានបំផ្លិចបំផ្លាញដោយសង្គ្រាមនៅប្រទេសអ៊ីរ៉ាក់ ការមើលឃើញមនុស្សយន្តដើរទៅមកក្នុងភោជនីយដ្ឋានមួយ ដើម្បីបម្រើអតិថិជនដ៏ក្អាកក្អាយ ពិតជាទិដ្ឋភាពដ៏គួរឱ្យភ្ញាក់ផ្អើល។
«សូមស្វាគមន៍», «យើងសូមជូនពរឱ្យទទួលទានយ៉ាងរីករាយក្នុងភោជនីយដ្ឋានរបស់យើង», «យើងរីករាយនឹងមតិរបស់អ្នកចំពោះគុណភាពនៃសេវាកម្ម» នេះជាសំឡេងបន្លឺដោយបុគ្គលិកដំណើរការដោយស្វ័យប្រវត្តិ បញ្ចេញពន្លឺភ្នែកក្រហមព្រិចៗ ចេញពីរាងកាយដូចស្លៀករ៉ូបពណ៌ខៀវ និងសភ្លឺចែងចាំង។
លោក Rami ChkibAbdelrahman ជាម្ចាស់ភោជនីយដ្ឋាន White Fox ដែលបានបើកដំណើរការកាលពីខែមិថុនា បាននិយាយថា៖ «នៅលើកញ្ចក់ទូរទស្សន៍ អ្នកឃើញមនុស្សយន្ត និងតុអេក្រង់ថាច់ស្គ្រីននៅក្នុងប្រទេសអារ៉ាប់រួម អេស្ប៉ាញ និងជប៉ុន»។
លោកបន្តថា៖ «ខ្ញុំបានព្យាយាមនាំយកគំនិតទាំងនេះមកកាន់ទីក្រុងម៉ូស៊ុល»។
ម៉ាស៊ីនបម្រើអនាគតគឺជាលទ្ធផលនៃបច្ចេកវិទ្យា ដែលត្រូវបានបង្កើតឡើងនៅក្នុងទីក្រុងភាគខាងជើង ដែលជាទីតាំងដ៏រឹងមាំរបស់ក្រុមជីហាដ រដ្ឋអ៊ិស្លាម។
លោក Abdelrahman ដែលមានអាជីពជាទន្តពេទ្យបាននិយាយថា៖ «យើងបានឃើញគំនិតនេះនៅលើប្រព័ន្ធផ្សព្វផ្សាយសង្គមនៅភោជនីយដ្ឋាននៃអនាគត»។
វេលាទទួលទានអាហារពេលល្ងាច អ្នកគាំទ្រភោជនីយដ្ឋាននឹងទទួលបានអារម្មណ៍បីដូចអវកាសយានិកអណ្តែតក្នុងសាលរចនាគំនូរលើជញ្ជាំងគំរូតាមទិដ្ឋភាពភពផែនដី និងភពផ្សេងទៀត។
ពិតានមានពន្លឺចែងចាំងដោយក្រុមតារានិករ។ រចនាប័ទ្មលម្ហអវកាសក្នុងភោជនីយដ្ឋាន ផ្តល់ឱ្យអតិថិជននូវអារម្មណ៍នៃការសម្លឹងមើលតាមច្រកទ្វារនៃយានអវកាសមួយ។
ប៉ុន្តែភាពទាក់ទាញរបស់ភោជនីយដ្ឋាន នៅតែជាមនុស្សយន្ត ២គ្រឿង បង់កន្សែង ធ្វើដំណើរសន្សឹមៗលើគន្លងដូចផ្លូវរថភ្លើងដើម្បីលើកថាសអាហារបម្រើភ្ញៀវដល់តុទទួលទាន។
នៅពេលមនុស្សយន្តដើរមកជិត កាមេរ៉ាស្មាតហ្វូនតម្រង់មកថត ខណៈក្មេងៗរត់មកឈរជិតអ្នករត់តុស្វ័យប្រវត្តិ ដើម្បីថតរូបអនុស្សាវរីយ៍។
លោកAbdelrahmanបានបន្ថែមថា អ្វីគ្រប់យ៉ាងនៅក្នុងភោជនីយដ្ឋានគឺឌីជីថល រួមទាំងតុ ១៥ មានបំពាក់អេក្រង់ប៉ះបញ្ជាលើបញ្ជីរាយនាមមុខម្ហូប។
យ៉ាងណាមិញ មនុស្សមិនត្រូវបានជំនួសទាំងស្រុងដោយម៉ាស៊ីននោះទេ។
អ្នករត់តុវ័យក្មេង៤នាក់កំពុងរវល់រើសចានពីថាសរបស់មនុស្សយន្ត ហើយដាក់វានៅលើតុ។
ស្ថិតក្នុងចំណោមអតិថិជនដ៏ច្រើន លោក Bashar Mahmud ដែលមកញ៉ាំអាហារពេលល្ងាចជាមួយភរិយា បានឆ្លៀតដកកាមេរ៉ាថតរូបសែលហ្វ៊ីញញឹមជាមួយមនុស្សយន្ត។
ជាងដែកវ័យ ៥០ឆ្នាំដែលមានពុកចង្កាល្បាយអាចម៍ខ្លារូបនេះ បានប្រាប់ថា៖ «ខ្ញុំធ្លាប់ទៅដើរលេងក្រៅប្រទេស ហើយខ្ញុំមិនដែលឃើញអ្វីដូចនេះទេ។ នេះមនុស្សយន្តរត់តុនៅប្រទេសអ៊ីរ៉ាក់យើង មិនមែននៅប្រទេសតួកគី ហ្ស៊កដានី ឬអារ៉ាប៊ីសាអ៊ូឌីតទេ»៕ AFP