The Phnom Penh Post Search

Search form

Logo of Phnom Penh Post newspaper Phnom Penh Post - អ្នកជំនាញ​បច្ចេកវិទ្យា​វៃឆ្លាត បើក​ការជជែក​អំពី​គុណ​សម្បត្ដិ និង​គុណ​វិបត្ដិ​បញ្ញា​សិប្បនិម្មិត​នៅ​កម្ពុជា​




អ្នកជំនាញ​បច្ចេកវិទ្យា​វៃឆ្លាត បើក​ការជជែក​អំពី​គុណ​សម្បត្ដិ និង​គុណ​វិបត្ដិ​បញ្ញា​សិប្បនិម្មិត​នៅ​កម្ពុជា​

Content image - Phnom Penh Post
មនុស្សយន្ត​រត់តុ​ត្រូវបានប្រើ​ជំនួសបុគ្គលិក​ជា​មនុស្ស​​នៅក្រុង​បាងហ្គាល័រ ប្រទេសឥណ្ឌា។ រូបថត AFP

អ្នកជំនាញ​បច្ចេកវិទ្យា​វៃឆ្លាត បើក​ការជជែក​អំពី​គុណ​សម្បត្ដិ និង​គុណ​វិបត្ដិ​បញ្ញា​សិប្បនិម្មិត​នៅ​កម្ពុជា​

​ភ្នំពេញ: បណ្ដា​ប្រទេស​អភិវឌ្ឍន៍​កំពុង​ប្រណាំងប្រជែង​ផលិត​បច្ចេកវិទ្យា​វៃឆ្លាត​នានា ​ដើម្បី​ជា​ជំនួយ​កិច្ចការ​មនុស្ស និង​មហិច្ឆតា​ជា​ប្រទេស​ឈាន​​មុខ​ខាង​បច្ចេកវិទ្យា​ទំនើប​។

​បច្ចេកវិទ្យា​វៃឆ្លាត រួមមាន រ៉ូ​បូត ប្រព័ន្ធ​វិភាគ​ចក្ខុ​ទស្សន៍ សមត្ថភាព​ស្គាល់​សំឡេង ក៏ដូចជា​ការបកប្រែ​ភាសា​ជាដើម ដែល​វា​មាន​សមត្ថភាព​ធ្វើ​កិច្ចការ​ជំនួស​មនុស្ស​បាន​។

​ខណៈ​បច្ចេកវិទ្យា​វៃឆ្លាត​កំពុងតែ​ជួយ​សម្រួល​កិច្ចការ​មនុស្ស​បាន​យ៉ាងច្រើន ការសិក្សា និង​ការជជែក​វែកញែក​ជាច្រើន​ត្រូវបាន​ធ្វើឡើង​ពី​គុណ​សម្បត្ដិ និង​គុណ​វិបត្ដិ​របស់​បច្ចេកវិទ្យា​ទំនើប​នេះ​ផងដែរ​។

​សាកលវិទ្យាល័យ Cam-Tech University បានរៀបចំ​សិក្ខាសាលា​អន​ឡាញ​មួយ​នាពេល​ថ្មីៗ​ក្រោម​ប្រធានបទ «​តើ​បច្ចេកវិទ្យា​វៃឆ្លាត ឬ​បញ្ញា​សិប្បនិម្មិត​អាចជួយ ឬ​ជំនួស​មនុស្ស​បានដែរ​ឬទេ​?» ដោយមាន​ការចូលរួម​ពី​តំណាង​ក្រុម​​អ្នកសិក្សា​ស្រាវជ្រាវ តំណាង​ស្ថាប័នរដ្ឋ និង​ឯកជន ភ្នាក់ងារ​រដ្ឋាភិបាល លោកគ្រូ​អ្នកគ្រូ និង​សិស្សានុសិស្ស​។​

​លោក Alamgir Hossain ជា​សាកលវិទ្យាធិការរង និង​ជា​សាស្ដ្រ​ចា​រ្យ​ផ្នែក​បញ្ញា​សិប្ប​និម្មិត​រយៈពេល ៣០​ ឆ្នាំ នៅ​ចក្រភព​អង់គ្លេស​បាន​ចូលរួម​ក្នុងការ​ធ្វើ​បទ​បង្ហាញ ក៏ដូចជា​វាគ្មិន ​១​ រូប​។
លោក​ជា​អតីត​សាស្ដ្រាចារ្យ​សាកលវិទ្យាល័យ Teesside University ចក្រភព​អង់គ្លេស និង​បាន​បោះពុម្ពផ្សាយ​ការស្រាវជ្រាវ​ជាង ៣០០​ ច្បាប់ និង​ចូលរួម​ក្នុងការ​បោះពុម្ព​សៀវភៅ​ចំនួន ១២​ក្បាល​ផងដែរ​។

​វត្ដ​មាន​របស់​វាគ្មិន​សំខាន់ៗ​ចំនួន ៣ ​រូប រួមមាន លោក Mattew Tippetts ជានា​យក​ប្រតិ​ប​ត្ដិ និង​ជា​សហ​ស្ថាបនិក Clik លោក វ័រ សុខ​ណា ជាសហ​ស្ថាបនិក​ដៃគូ​គ្រប់គ្រង ​Data U Academy និង Mekong Big Data និង DataU Academy និង​វេជ្ជបណ្ឌិត ស្រេង ស៊ីណា ជា​អ្នកស្រាវជ្រាវ​ក្រោយ​បញ្ចប់​ថ្នាក់បណ្ឌិត​មកពី KMITL ប្រទេស​ថៃ​។

​វាគ្មិន​ទាំងនេះ​បាន​ឯកភាព​ទៅលើ​ការអភិវឌ្ឍ​ដ៏​លឿន​នៃ​បច្ចេកវិទ្យា​វៃឆ្លាត​ក្នុងសង្គម​បច្ចុប្បន្ន ដែល​អាច​ជំនួស​កិច្ចការ​មនុស្ស​ខ្លះៗ ជាពិសេស ការងារ​មិនសូវ​ប្រើ​ជំនាញ​។

​លោក ឈុំ ផា​រី​ណូ អ្នក​សម្របសម្រួល​សិក្ខាសាលា​បច្ចេកវិទ្យា​វៃឆ្លាត បាន​ប្រាប់​ ភ្នំពេញ ប៉ុស្ដិ៍ថា​៖ «​វាគ្មិន​ក៏បាន​លើកឡើង​ពី​បញ្ហា​ប្រឈម​មួយចំនួន​ទាក់ទង​នឹង​បញ្ញា​សិប្បនិម្មិត​នេះ គឺ​ទិន្នន័យ​មានកំណត់ និង​ទិន្នន័យ​ប្រកប​ដោយ​គុណភាព ជាពិសេស​ក្នុង​មាតិកា​នៅ​កម្ពុជា ការ​កំហិត​នៃ​សមត្ថភាព​នៅ​កម្ពុជា កម្មវិធីសិក្សា​ក្នុង​វិស័យ​បច្ចេក​វិទ្យា​វៃឆ្លាត និង​ជំនាញ​ផ្សេងៗ​ដ៏​មានកំណត់ មូលនិធិ​គាំទ្រ និង​សហ​ប្រតិ​ប​ត្ដិ​ការ​ដ៏​មានកំណត់ ក៏ដូចជា​តម្រូវការ​ច្បាប់ និង​បទ​ប​ញ្ញ​ត្ដិ​នានា​ទាក់ទង​នឹង​បច្ចេកវិទ្យា​វៃឆ្លាត​នេះ​»​។​

Content image - Phnom Penh Post
សិក្ខាសាលា​​ «​តើបច្ចេកវិទ្យា​វៃឆ្លាត​ ឬ​​​​បញ្ញា​​សិប្បនិម្មិត​អាច​ជួយ ឬ​ជំនួស​មនុស្សបាន​ដែរឬទេ?» ដោយ CamTech University។ សហការី

​យ៉ាងណាមិញ លោកបាន​បន្ដ​ដោយ​យោងតាម​ក្រុមហ៊ុន​ប្រឹក្សា និង​ស្រាវជ្រាវ​បច្ចេកវិទ្យា Gartner, Inc. ថា​៖ «​អង្គភាព​នានា​ចំនួន ៧០ ​ភាគរយ​នឹង​បញ្ចូល​ការប្រើប្រាស់​បច្ចេកវិទ្យា​វៃឆ្លាត​ ដើម្បី​ជួយ​ដល់​ផលិត​ភាព​បុគ្គលិក​។ ដូច្នេះ ការងារ​ប្រមាណ ២,៣​ លាន​ត្រូវបាន​បង្កើតឡើង​ក្នុង​ឆ្នាំ​ ២០២០ ហើយ​មនុស្ស ១,៨ ​លាន​នាក់ ​បាន​បាត់បង់​ការងារ​ធ្វើ​»​។

​ជា​ប្រធានបទ​ស៊េរី​សិក្ខា​សាលា​ស្ដីពី​បច្ចេកវិទ្យា​វៃឆ្លាត​នៃ​សាកលវិទ្យាល័យ CamTech University គោលបំណង​នៃ​កម្មវិធី​នេះ​ជាការ​ជជែក​ពី​ចម្ងល់​នានា​ដ៏​មាន​សារៈសំខាន់​ក្នុងចំណោម​អ្នកជំនាញ​ទាក់ទងនឹង​បញ្ញា​សិប្បនិម្មិត ក៏ដូចជា​ផ្សព្វផ្សាយ​ចំណេះដឹង​ស្ដីពី​បច្ចេកវិទ្យា​វៃឆ្លាត​ទៅដល់​សាធារណជន​នៅ​កម្ពុជា​។

​សាកលវិទ្យាល័យ​បច្ចេក​វិទ្យា និង​វិទ្យាសាស្ដ្រ​កម្ពុជា (CamTech) ជា​ស្ថាប័ន​ឯក​ជន​មិន​រកប្រាក់​ចំណេញ​ដែល​ត្រូវបាន​បង្កើតឡើង​ក្នុង​ឆ្នាំ ​២០២១ ដោយមាន​ទស្សនៈ​ចង់​ក្លាយជា​សាកលវិទ្យាល័យ​ឈានមុខ​ក្នុង​វិស័យ​បច្ចេកវិទ្យា និង​វិទ្យាសាស្ដ្រ​ដើម្បី​ភាព​រីក​ចម្រើន​នៅ​កម្ពុជា​។

​លោក ផា​រី​ណូ បានឱ្យដឹងថា សាកលវិទ្យាល័យ​បាន​សហ​ការ​ជាមួយ​រាជរដ្ឋាភិបាល​ក្នុងការ​រៀបចំ​ផែនទី​ចង្អុល​ផ្លូវ​បច្ចេកវិទ្យា​វៃឆ្លាត​ដែលជា​តម្រូវការ​អភិវឌ្ឍ​ប្រទេស​។

​ផែនទី​ចង្អុល​ផ្លូវ​បច្ចេកវិទ្យា​វៃឆ្លាត ឬ AI Roadmap គឺជា​ឯកសារ​ស្រាវជ្រាវ​សម្រាប់​ណែនាំ និង​បង្កើត​កិច្ច​សហ​ប្រតិ​ប​ត្ដិ​ការ​រវាង​សកល​វិទ្យាល័យ​អ្នកស្រាវជ្រាវ​ទីភ្នាក់ងារ​ទាំង​រដ្ឋ និង​ឯកជន​ដើម្បី​អត្ថប្រយោជន៍​ទៅវិញទៅមក​ក៏ដូចជា​សង្គមជាតិ​កម្ពុ​ជា​ទាំងមូល​។

Content image - Phnom Penh Post
បញ្ញាសិប្បនិម្មិតជួយ​មនុស្សយន្តលេងព្យ៉ាណូ​នៅ​សាលពិព័រណ៍​​អប្សរា ក្រុងហានចូវ។ រូបថត AFP

​អ្នកសម្របសម្រួល​រូបនេះ​បន្ថែមថា​៖ «​សាកលវិទ្យាល័យ​បានរៀបចំ​កម្មវិធីសិក្សា​ផ្សារ​ភ្ជាប់​នឹង​តម្រូវការ​នានា​ដូចជា​ជំនាញ​វិទ្យាសាស្ដ្រ​ទិន្នន័យ​បញ្ញា​សិប្បនិម្មិត មនុស្ស​យន្ដ​ស្វ័យ​ប្រ​វ​ត្ដិក​ម្ម និង​មុខជំនាញ​វិស្វកម្ម​ផ្សេងទៀត​ ដើម្បី​បង្រួម​គម្លាត​នៃ​កម្លាំង​ពលកម្ម​ជំនាញ​សម្រាប់​ឧស្សាហកម្ម ៤.០ និង​បញ្ញា​សិប្បនិម្មិត​នៅ​កម្ពុជា​»​។​

​សាកលវិទ្យាល័យ Cam-Tech ​មាន​មហាវិទ្យាល័យ​ចំនួន ៥ ដូចជា មហាវិទ្យាល័យ​វិស្វកម្ម មហាវិទ្យាល័យ​សិល្បៈ មហាវិទ្យាល័យ​មនុស្សជាតិ និង​វិទ្យាសាស្ត្រ​សង្គម មហា​វិទ្យាល័យ​ពាណិជ្ជ​សាស្ត្រ និង​គ្រប់គ្រង មហាវិទ្យាល័យ​វិទ្យា​សាស្ត្រ និង​មហាវិទ្យាល័យ​បរិស្ថាន​បង្កើត​និរន្តរភាព​។​

​សាកលវិទ្យាល័យ​មិន​រកប្រាក់​ចំណូល​នេះ​នឹង​ផ្ដល់​អាហារូបករណ៍​ពេញលេញ​សរុប ២០​ នាក់ និង​អាហា​រូបករណ៍​ផ្នែក​ខ្លះ​ដល់​សិស្ស​វិទ្យាល័យ ​និង​អ្នក​យុវជន​អាយុ​ក្រោម ​២៥ ​ឆ្នាំ​ចំនួន ​៣០០​ នាក់​៕

អត្ថបទគួរចាប់អារម្មណ៍

  • ភ្នំពេញៈ ក្រុមហ៊ុន Longfruiter Anlong Veng Oddor Meanchey Agriculture Park Co., Ltd បាន​បញ្ចេញ​ប្រាក់​វិនិយោគ ៥១ ​លាន​ដុល្លារ​ទៅលើ​ការដាំ​ដំណាំ​ចេក និង​ដំណាំ​ហូប​ផ្លែ​មួយចំនួន​នៅក្នុង​ស្រុក​អន្លង់វែង ខេត្ត​ឧត្តរមានជ័យ ដើម្បី​ជំរុញ​ការនាំចេញ ពិសេស​ទៅ​ទីផ្សារ​ប្រទេស​ចិន​។

  • ភ្នំពេញៈ មូលនិធិ​កម្ពុជា​ប្រឆាំង​កូវីដ​ ១៩ បន្ត​អំពាវនាវ​ដល់​សប្បុរជន​ឱ្យ​ចូលរួម​បរិច្ចាគ​ធនធាន ដើម្បី​រួមចំណែក​ក្នុងការ​ឧបត្ថម្ភ​ទ្រទ្រង់​ដល់​ពលរដ្ឋ​ដែល​កំពុង​ជួប​ការលំបាក និង​ក្រុមគ្រូពេទ្យ​អាវស អំឡុងពេល​ប្រយុទ្ធប្រឆាំង​ជំងឺ​កូវីដ ខណៈ​មូលនិធិ​នេះ​បាន​ជួយ​ដល់​ពលរដ្ឋ​ជាង ១ ​ម៉ឺន​គ្រួសារ តាមរយៈ​ការផ្តល់​ជា​គ្រឿង​បរិភោគ និង​កញ្ចប់​ថ្នាំ​ជាដើម​។

  • ភ្នំពេញៈ ​ជន​ជាប់ឃុំ​នៅតាម​ពន្ធនាគារ និង​មណ្ឌល​អប់រំ​កែប្រែ​រាជធានី​-​ខេត្ដ​ជាង ២ ​ពាន់​នាក់​បាន​ចាក់​វ៉ាក់សាំង​បង្ការ​ជំងឺ​កូវីដ​ ១៩ ​ដូស​ទី​ ៣ និង​កំពុង​បន្ត​ចាក់​ដូស​ជំរុញ​នេះ​បន្ថែមទៀត ខណៈ​ជន​ជាប់ឃុំ​សរុប​ប្រមាណ ៣៨ ០០០ ​នាក់​បាន​ចាក់​ ២​ ដូស​រួចហើយ​។

  • ភ្នំពេញៈ ​សាកលវិទ្យាល័យ និង​គ្រឹះស្ថាន​អប់រំ កម្រិត​ឧត្ដមសិក្សា​សាធារណៈ និង​ឯកជន​ប្រមាណ​ ២០ នៅ​ថ្ងៃទី​ ២៩ ខែមករា ខាងមុខនេះ​នឹង​រៀបចំ «​ពិព័រណ៍​ជំនាញ និង​សាកលវិទ្យាល័យ​» ​តាម​អន​ឡាញ​ដើម្បីឱ្យ​វាគ្មិន​ជំនាញ​ចែករំលែក​ចំណេះដឹង បទពិសោធ ដល់​និស្សិត​លើ​ការជ្រើសរើស​មុខជំនាញ​សិក្សា និង​សាកលវិទ្យាល័យ​សិក្សា​នៅក្នុង​ប្រទេស​កម្ពុជា​។

  • ភ្នំពេញៈ ជប៉ុន​បាន​ផ្ដល់​រថយន្ត​ពន្លត់​អគ្គិភ័យ​ចំនួន​ ៤ ​គ្រឿង​ដល់​អង្គភាព​ការិយាល័យ​នគរបាល​បង្ការ ពន្លត់​អគ្គិភ័យ និង​សង្គ្រោះ​នៃ​ស្នងការដ្ឋាន​នគរបាល​រាជធានី​ភ្នំពេញ ដើម្បី​ចូលរួមចំណែក​ធ្វើឱ្យ​ប្រសើ​ឡើង​នូវ​ប្រសិទ្ធភាព​ការងារ​ឆ្លើយតប និង​ការ​កាត់បន្ថយ​នូវ​ហានិភ័យ​នានា ដែល​បង្កឡើង​ដោយ​គ្រោះ​អគ្គិភ័យ​នៅ​កម្ពុជា ពិសេស​ក្នុង​រាជធានី​ភ្នំពេញ​។

  • ភ្នំពេញៈ ​សាជីវកម្ម​ធានាឥណទាន​កម្ពុជា (CGCC) និង​មជ្ឈមណ្ឌល​បច្ចេកវិទ្យា និង​ព័ត៌មាន​ជីវឧស្ម័ន (BTIC) នៅ​ថ្ងៃទី​ ២៤ ខែមករា បាន​ចុះ​អនុស្សរណៈ​ជាមួយ​គ្នា ដើម្បី​លើកកម្ពស់​បរិយាកាស​អំណោយផល​ដល់​ការវិនិយោគ​លើ​បច្ចេកវិទ្យា​ជីវឧស្ម័ន​ខ្នាត​ធំ​នៅ​កម្ពុជា​ដើម្បី​រួមចំណែក​កាត់​បន្ថយ​ការប្រែប្រួល​អាកាសធាតុ​។ នេះ​បើតាម​សេចក្ដី​ប្រកាស​ព័ត៌មាន​។