ភ្នំពេញ: ក្រៅពី​សាលា​អ៊ិន​រ៉ូល​មិន (Sala Enrollment)​ ដែលជា​គេហ​ទំព័រ​​ផ្ដល់​ភាព​ងាយ​ស្រួល​ដល់​សិស្ស​ទើប​បាន​បញ្ចប់​ការ​សិក្សា​​ថ្នាក់​វិទ្យា​ល័យ​ក្នុង​ការ​ស្វែង​រក​សាកល​វិទ្យា​ល័យ ជំនាញ​​សិក្សា​ ក៏​ដូច​ជា​ដំណឹង​អាហា​រូបករណ៍​ ​ពេល​នេះ​ Sala App ត្រូវ​បាន​បង្កើត​ឡើង​បន្ថែម​ពីលើ​វេប​សាយ​ដែល​មាន​ស្រាប់​។

សិស្សា​នុសិស្ស ដែល​រៀន​ថ្នាក់​វិទ្យា​ល័យ​ឬ​បញ្ចប់​ការ​សិក្សា​ថ្នាក់​ទី១២ អាច​ស្វែង​រក​ព័ត៌មាន​នានា​ស្ដីពី​មុខ​វិជ្ជា​សិក្សា សាកល​វិទ្យា​ល័យនិង​អាហា​រូបករណ៍​នៅលើ​កម្ម​វិធី​ទូរស័ព្ទ​តែមួយគឺ Sala App ដែល​ទើប​បាន​បង្កើត​ឡើង​កាល​ពី​ចុង​ឆ្នាំ ​២០២១​ កន្លង​ទៅ​។

យុវ​សិស្ស សុង ម៉ីលី បាន​សុំ​ការ​ផ្ដល់​ប្រឹក្សា​ពី​លោក សុខ លាភ ស្ថាបនិក Sala App នូវ​មុខ​វិជ្ជា​សិក្សា​និង​សាកល​វិទ្យា​ល័យ​ដែល​ខ្លួន​ចង់​ ដោយ​លោក​លាភ​ បាន​ផ្ដល់​បន្ថែម​នូវ​ព័ត៌​មាន​លម្អិត​។

កញ្ញា​ ម៉ីលី​ បច្ចុប្បន្ន​កំពុង​សិក្សា​ផ្នែក​គ្រប់​គ្រង​អាជី​វកម្ម​នៅ​សាកល​វិទ្យា​ល័យ Limkokwing ​បាន​​ប្រាប់​ ភ្នំពេញ​ ប៉ុស្ដិ៍​ថា​៖ «ខ្ញុំ​ចង់​រៀន​នៅ​សាលា Limkokwing ហើយ​ខ្ញុំ​ទាក់​ទង​សុំ​ការ​ផ្ដល់​ប្រឹក្សា​ពី​គាត់​។ ខ្ញុំ​ចាប់​អារម្ម​ណ៍​មុខ​វិជ្ជា Business Ad​mini​stration គាត់​បាន​ពន្យល់​ទាក់​ទង​កម្មវិធី​របស់​សាលា​​ដែល​មាន​កម្មវិធីផ្លាស់ប្ដូរ​កម្ម​សិក្សា​ទៅ​ម៉ាឡេ​ស៊ី​។ គាត់​បាន​សរសេរ​ជួយ​បំពេញ​ការ​ចុះ​ឈ្មោះ»​។

ម៉ីលី ជា​អ្នក​រាជធានី​ភ្នំពេញ និង​កំពុង​សិក្សា​ឆ្នាំ​ទី១​ បាន​បន្ដថា​៖ «ខ្ញុំ​ស្រឡាញ់​មុខ​វិជ្ជា​តាំង​ពី​តូច​មក។ ដូច្នេះ ខ្ញុំ​អាច​រៀន​បាន​ដោយ​រលូន​ ហើយ​គ្រូ​នៅ​សា​លា​ក៏​ពួក​គាត់​បង្រៀន​បាន​ល្អ​ដែរ​»។

បញ្ហា​របស់​យុវសិស្ស​សម័យ​ទំនើប​នេះ​ហាក់​នៅ​មិន​ទាន់​បាន​អភិវឌ្ឍ​ខ្លួន​ដាច់​ឆ្ងាយ​ពី​ការ​ប្រឈម​របស់​សិស្សានុ​សិស្ស​សម័យ​ទស​វត្សរ៍​ឆ្នាំ​ ១៩៩០ ​និង​ឆ្នាំ​ ២០០០ ជួប​ប្រទះ​ចំពោះ​ការ​ជ្រើស​រើស​មុខ​វិជ្ជា​សិក្សា និង​សាកល​វិទ្យា​ល័យ​ដែលចង់​រៀននោះទេ​។

លោក​ លាភ ​បាន​ឱ្យដឹង​ថា​ លោក​ធ្លាប់​ជា​សិស្ស​ ដែល​ជួប​បញ្ហា​ស្វែង​រកមុខ​វិជ្ជា​សិក្សា ​និង​សាកល​វិទ្យា​ល័យ​កាលពី​អំឡុង​ឆ្នាំ​ ២០០០ ​ហើយ​លោក​​បាន​ធ្វើ​ការ​រយៈ​ពេល​ជាង​ ១០ ​ឆ្នាំ​មុន​ពេល​ចាប់​ផ្ដើមផ្ដល់​ការ​ប្រឹក្សា​នេះ​។

លោក​ លាភ​ បាន​ប្រាប់​ ភ្នំពេញ​ ប៉ុស្ដិ៍​ថា​៖ «​ប៉ុន្ដែ​បើ​យើង​ក្រឡេក​មើល​ក្រោយ​វិញ កាល​ខ្ញុំ​ឈាន​ជើង​ចូល​មហាវិទ្យា​ល័យ​ ខ្ញុំ​បាន​ជ្រើស​រើស​ជំនាញ IT (Information Technology) ដោយ​មាន​ការ​គាំទ្រពី​ម៉ាក់​ប៉ា​។ ខ្ញុំ​គិត​ថា លទ្ធភាព​ជំនាញ​បាន​ផ្ដល់​ឱកាស​ឱ្យ​ខ្ញុំ​អភិវឌ្ឍ​ខ្លួន​រហូត​ដល់​ថ្ងៃ​នេះ​»។

​​រយៈ​ពេល ​១ ទៅ​ ២ ទសវត្សរ៍​ហើយ ​លោក​គ្រូ លាភ ​នៅតែ​មើល​ឃើញ​ថា សិស្ស​របស់​​លោក​​នៅ​មាន​ផល​លំបាក​ក្នុង​ការ​ជ្រើសរើស​មុខ​វិជ្ជា និង​សាក​លវិទ្យា​ល័យ​ដែល​ពួកគេ​ចូល​ចិត្ដ​ ដោយ​មាន​ចិត្ដ​រារែក​មិន​ដឹង​ទៅ​ណា​ ក្រោយ​បញ្ចប់​ថ្នាក់​ទី១២​។ ភាគ​ច្រើន ពួក​គេ​មិន​មាន​គោល​ដៅ​ច្បាស់​លាស់​។

លោក​និយាយ​ថា​៖ «ខ្ញុំ​ពិត​ជា​មាន​ការ​ភ្ញាក់​ផ្អើល​យ៉ាង​ខ្លាំង​ដែល​ខ្ញុំ​នៅ​មើល​ឃើញ​រយៈ​ពេល​ជាង ​២​ ទស​វត្សរ៍​ទៅ​ហើយ​សិស្សានុ​សិស្ស​ដែល​បញ្ចប់​ថ្នាក់​ទី១២ ​នៅតែ​ជួប​បញ្ហា​នៃការ​ជ្រើស​រើស​មុខ​វិជ្ជា​និង​សាកល​វិទ្យា​ល័យ​។ យើង​បាន​សាក​សួរ​សិស្សានុ​សិស្ស​ដែល​មក​រក​ជំនួយ​ពីយើង​ សុទ្ធតែ​និយាយ​ពី​បញ្ហា​ដូច​កាល​ពី ២២​ ឆ្នាំ​មុន​ ដែល​ខ្ញុំ​ធ្លាប់​ជួប​ប្រទះ​​។

ចំពោះ​សាលា​ជំនាន់​ថ្មីដែល​រដ្ឋាភិ​បាល​បាន​បង្កើត​ឡើង​ប៉ុន្មាន​ឆ្នាំ​នេះ​លោក ​សុខ​ លាភ​ បាន​និយាយ​ថា ​លោក​​គិត​ថា វា​ល្អដែល​បាន​ផ្លាស់​ប្ដូរ learning methodology។ សាលា​ជំនាន់​ថ្មី ទើប​តែ​មាន​ចន្លោះ​ពី ១១​ សាលា​ប៉ុណ្ណោះ​ ក្នុង​ចំណោម​ជាង ១២​ ​៥០០​ សាលា​ ទូទាំង​ប្រទេស​។

​​លោក​និយាយ​ថា ដូច្នេះតើ​មនុស្ស​ប៉ុន្មាន​នាក់​មាន​ឱកាស​ដឹង​ពី​ខ្លួន​ឯង ចាប់​អាជីព​ជំនាញ​មួយ​ដែល​ស័ក្ដិ​សម​នឹង​ខ្លួន​ឯង​ចូលចិត្ដ និង​បន្ដការ​ងារ​ដែល​ខ្លួន​ឯង​ចូល​ចិត្ដ។

នេះ​ជា​អ្វីដែល​ SalaE​nrollment និង Sala App ចាប់ផ្ដើម​ឡើង​ដើម្បី​ដោះ​ស្រាយ​បញ្ហា​ដែល​សិស្សានុ​សិស្ស​នៅ​វិទ្យា​ល័យ​ជួប​ប្រទះ​។

ស្ថាប​និក​ Sala App បាន​និយាយ​ថា​៖ «ដោយ​ផ្អែក​លើ​បទ​ពិសោធ​របស់​ខ្ញុំ​ផ្ទាល់ ដែលមើល​ឃើញ​ថា ដំបូង​ត្រូវ​យល់​ពី​ខ្លួន​ឯង​ដឹង​គោល​ដៅ​ចង់​ទៅ ​ស្រឡាញ់​មុខ​វិជ្ជា​អ្វី និង​មាន​ការ​គាំទ្រពី​មនុស្ស​ជុំវិញ​ខ្លួន​ជាពិសេស​អ្នក​ផ្ទះ​ឬ​សង្គម​ដើម្បី​លើក​ទឹក​ចិត្ដ​ជ្រើស​រើស​អាជីព​មួយ​ដ៏​ត្រឹម​ត្រូវ​។ ​ដូច្នេះ Sala ជា​ទី​កន្លែង​មួយ​ដែល​យើង​សម្លឹង​ថា បន្ទាប់​ពី​ឪពុក​ម្ដាយ និង​បង​ប្អូនពួកគាត់​មក​ពី​ទីនេះ គឺជា​ទី​កន្លែង​ពិសេស​ដើម្បី​ស្វែង​រក​ចម្លើយ​ដ៏​ត្រឹម​ត្រូវ​នូវការ​ជ្រើស​រើស​មុខវិជ្ជា​សិក្សានិង​សាកល​វិទ្យា​ល័យដែល​ស័ក្ដិ​សម​សម្រាប់​ពួក​គាត់​»។

​ចំពោះ​ការ​ឆ្លើយ​តប​នឹង​ចម្ងល់​ផ្សេងៗលោក​បាន​ឱ្យ​ដឹង​ថា វា​​បាន​បែង​ចែក​ជា ២ ប្រភេទ​។ ជា​ដំបូង ​​ក្រុមការងារ​របស់​លោក​ផ្ទាល់​​ធ្លាប់​ឆ្លង​កាត់​ជា​សិស្ស​ និង​បច្ចុប្បន្ន​ជា​និស្សិត​ឆ្នាំ​ទី៣ ទី៤ មក​ពី​សាកល​វិទ្យា​ល័យ និង​រៀន​មុខវិជ្ជា​ផ្សេងៗ​បាន​ចែក​រំលែក​បទ​ពិសោធ​របស់​ពួកគេជាមួយ​ការផ្ដល់​យោ​បល់​ចំពោះ​ចម្ងល់​របស់​​សិស្ស​វិទ្យា​ល័យ​។ពួ កគេ​ជា​សិស្ស​ច្បងដែល​ធ្លាប់​ឆ្លង​កាត់​បទ​ពិសោធ​ដើរ​កន្លង​មក​អំឡុង​ការ​ជ្រើស​រើស​មុខ​វិជ្ជា និង​សា​កល​វិទ្យា​ល័យ​សិក្សា​។

លោក​បន្ដ​ថា មួយ​ផ្នែក​ទៀត ​​សិស្ស និង​និស្សិត ​ចែក​រំលែក​បទ​ពិសោធ​ផ្ទាល់​ខ្លួន​របស់​ពួកគេ​។ នេះ​ជា​វេទិកា​បើក​ទូ​លាយ​សម្រាប់​សិស្ស​-និស្សិត​ បញ្ចេញ​មតិ​យោ​បល់​ ដើម្បី​លើក​ទឹកចិត្ដ​ឱ្យ​ពួកគេ​ត្រិះរិះ​ពិចារ​ណា​។

Sala App នៅ​មាន​ប្រអប់​សារ​ឯក (private chat) ដែល​សម្រាប់​ការ​សុំ​ការ​ណែនាំ​ផ្ទាល់​ជា​លក្ខណៈ​ឯកជន​។ ពួក​គេ​អាច​សុំ​ផ្ដល់​យោ​បល់​ពី​មុខវិជ្ជា​អ្វី សាកល​វិទ្យា​ល័យ​ណា និង​តម្លៃ​ប៉ុន្មាន​ ។

ស្ថាប​និក​ Sala App ​បាន​បង្កើត one-to-one call និង one-to-one meeting សម្រាប់​ការ​បំភ្លឺ​ដល់​សិស្ស​ ​ជាដើម​ទុន​ក្នុង​ការ​ជ្រើស​រើស​អ្វី​ដែល​ខ្លួន​ចូល​ចិត្ដ​។

លោក លាភ បាន​ប្រាប់​ថា​៖ «​ពេល​ខ្លះ សិស្សានុ​សិស្ស មាន​ភាព​ងងឹត​ខ្លាំង​ចំពោះ​ការ​ជ្រើស​រើស យើង​តម្រូវ​ឱ្យ​ពួក​គាត់​ធ្វើ personality test នៅលើ App ក្នុង​ប្រភេទ Orientation Test ដើម្បី​ឱ្យ​ពួកគាត់​យល់​ពី​ខ្លួន​ឯង​បន្ដិច​។ ពេល​ពួក​គាត់​បញ្ចប់​តេស្ដ​ ពួក​គាត់​អាច​ដឹងពី​ខ្លួន​ឯង​ខ្លះ ដូច​ជា ប្រភេទ​មនុស្ស​ដោះ​ស្រាយ​បញ្ហា ដែល​ស័ក្ដិ​សម​ចំពោះ​ជំនាញ​ណា​មួយ​»។

តេស្ដ​ប្រភេទ​នេះ លោក​អះអាង​ថា គឺជា​ក្រប​ខ័ណ្ឌដ៏​ល្បីល្បា​ញ​មួយ​ដែល​ត្រូវ​បាន​ប្រើ​ភាគ​ច្រើន​ក្នុង​ការ​គាស់​កកាយ​អំពី​ការ​ស្វែង​យល់​ពី​នរណា​ម្នាក់​។ ការ​ធ្វើ​តេស្ដ​ប្រភេទ​នេះ​ គឺសម្រាប់​អ្នក​ស្វែង​រក​សេវា​កម្ម​ប្រឹក្សា​តាម​រយៈ​ private chat ដែល​មិន​តម្រូវ​បង់​ប្រាក់​នោះ​ទេ​។

កញ្ញា​ ម៉ីលី​ បាន​បន្ដ​ថា ចំពោះ​អ្នក​អត់​មាន​គោល​ដៅ​ច្បាស់​លាស់ ពួកគេ​ពិត​ជា​លំបាក​ក្នុង​ការ​ស្វែង​រក​មុខ​វិជ្ជា​សិក្សា និង​សាកល​វិទ្យា​ល័យ​ដែល​ស័ក្ដិ​សម​សម្រាប់​ខ្លួន។ ប៉ុន្ដែ Sala App អាច​ផ្ដល់​ប្រឹក្សា​និង​សម្រួច​គំនិត​ឱ្យ​ងាយ​ស្រួល​ក្នុង​ការ​ជ្រើស​រើស​ជម្រើស​មួយ​ដ៏​ល្អ​។

កញ្ញា សន សុវណ្ណារ៉ា ដែល​បាន​បញ្ចប់​ការ​សិក្សា​ថ្នាក់​បរិ​ញ្ញា​បត្រ និង​បន្ដ​ការ​សិក្សា​វគ្គខ្លី PowerPoint BL នៅ​វិទ្យា​ស្ថាន Institute of Finance and Accounting (IFA) បាន​ឱ្យ​ដឹ​ងថា ពេល​ដឹង​ថា​ ខ្លួន​ស្រឡាញ់ ​និង​ចង់​រៀន​ផ្នែកសេវា​ផ្ដល់​ប្រឹក្សា​ពី Sala App បាន​ណែនាំ​សាលា​ IFA និង​បាន​ជួយ​សម្រប​សម្រួល​ឱ្យ​កាន់​តែ​ងាយ​ស្រួល​។

និស្សិត​ដែល​បាន​ចូល​រៀន ​កាល​ពីខែ​មីនា​ និងបាន​បញ្ចប់​ការ​សិក្សា​នា​ពេល​ថ្មីៗនេះបាន​ឱ្យដឹង​ថា៖ «វាពិ​តជា​ងាយ​ស្រួល ដោយសារ​ព័ត៌មាន​ទាំ​ងអស់​ស្ថិត​នៅលើ App នេះតែមួយ​។ ប្រសិនបើ​ខ្ញុំ​ចង់​រៀន​អ្វី ខ្ញុំ​គ្រាន់តែ​ចូល​ក្នុង App ខ្ញុំ​នឹង​ទទួល​បាន​នូវ​ព័ត៌មាន​ដែល​ខ្ញុំ​ចង់​បាន​ ដោយ​មិន​ចាំបាច់​ស្រាវ​ជ្រាវ​ច្រើន​ទីតាំង»​។

លោក​បាន​ឱ្យដឹង​ថា វាជា​អនាគត​របស់​មនុស្សដែល​ទាមទារ​ឱ្យ​​លោក​​យកចិត្ដ​ទុក​ដាក់​ខ្លាំង​ដែរ​។ លោក​​ចង់​ឱ្យ​សិស្ស​-​និស្សិត​​ចូលរួម​ ដោយ​កុំ​ពឹង​លើ​ការ​ចង្អុល​ផ្លូវ​របស់​ឪពុក​ម្ដាយ​មួយ​រយ​ភាគរយ​។ តា​មពិតឪពុក​ម្ដាយ​ចង់​ឱ្យ​កូនៗ​ល្អ​ មិន​មែន​ចង់​ណែនាំ​ឱ្យ​កូន​ទៅ​ផ្លូវ​​ខុស​នោះទេ​។ ប៉ុន្ដែ​បុគ្គលិក​លក្ខណៈ​របស់​​មនុស្ស​ម្នាក់​​ស័ក្ដិ​សម​នឹង​អ្វី​ដែល​ឪពុកម្ដាយ​​ចង់​បាន​ឬទេ​? អ្នក​ខ្លះ​សិក្សា​បាន ​១​ ឬ​ ២​ ឆ្នាំ ក៏​ស្រាប់​តែ​សុំ​ផ្លាស់​ប្ដូរ​។

​លោក​បាន​អះ​អាង​ថា វា​អាច​ធ្វើ​ឱ្យ​ពួកគេ​​ខាត​ពេល​វេលា លុយ​កាក់ ​ហើយ​​ទឹកចិត្ដ​​ក៏​ធ្លាក់​ចុះ​ថែម​ទៀត​។ ចំពោះ​សិស្សានុ​សិស្ស​ទាំង​ការ​មក​ជួប​ផ្ទាល់ និងការសុំ​យោ​បល់​លើ​ឆាត​ឯក​ជន​ក៏​ដោយ ក៏​មិន​មាន​ការ​គិត​ប្រាក់​អ្វី​នោះ​ទេ​ ។

លោក​ លាភ​ បាន​បន្ដថា​៖ «រហូត​មក​ទល់​ពេល​នេះយើង​បាន​សហ​ការ​ជា​មួយ​សាកល​វិទ្យាល័យ​ចំនួន ១៦ ដែល​ភាគ​ច្រើន​ជា​សាកល​វិទ្យា​ល័យ​ឯក​ជន​និង​សាលា​រដ្ឋ ២-៣ មាន ​international department។ បច្ចុប្បន្ន យើង​ផ្ដោត​លើ​សាកល​វិទ្យា​ល័យ​នៅ​តែ​ភ្នំពេញ​នៅ​ឡើយ​»។

ចំពោះ​ការ​ផ្ដល់​ព័ត៌មាន​ ​Sala App បាន​ផ្ដល់​ជូន​សិស្សានុ​សិស្ស​នូវ​សាកល​វិទ្យា​ល័យ​ទាំង ៥៤។ ប៉ុន្ដែ​​សាក​លវិទ្យា​ល័យ ១៦ ត្រូវ​បាន​ធ្វើ​​បច្ចុប្បន្ន​ភាព​ជា​បន្ដ​បន្ទាប់ ខណៈ​​សាកល​វិទ្យាល័យ​ផ្សេង​ទៀត ​ការ​​ធ្វើ​បច្ចុប្បន្ន​ភាព​ មាន​រយៈ​ ៣ ​ខែ​ម្ដង​។

លោក សុខ លាភ នឹង​​ពង្រីក​ទៅ​កាន់​ជំនាញ​ការ​អប់រំ​បច្ចេក​ទេសនិង​វិជ្ជាជីវៈ ​(TVET) ដោយ​ការ​ចូលរៀន​របស់​សិស្សានុ​សិស្ស​នៅ​មាន​កម្រិត​នៅ​ឡើយ​។

លោក​និយាយ​ថា​​​ ៥ ​ឆ្នាំ ​ទិន្នន័យ​ចុង​ក្រោយ​នេះ ​​​សិស្សានុ​សិស្ស​ថ្នាក់​ទី​១២ ​​ចំនួន​ប្រហែល ១២ ​ម៉ឺន​នាក់ ​ហើយ​មាន​តែ ២៥​ ០០០ ​នាក់ ទៅ ៣ ម៉ឺន​នាក់​ប៉ុណ្ណោះ​ ចូល​ទៅ​ឧត្ដម​សិក្សា​ប្រចាំ​​ នៅ​ខ្វះ​ប្រហែល​ជា៣​ភាគ។ អ៊ិចឹង ​ ចំពោះ TVET ​រាជរដ្ឋា​ភិបាល​ជំរុញ​ខ្លាំង​លើ​សិស្ស​ដែល​អត់​មាន​លទ្ធ​ភាព​សិស្ស​ធ្លាក់​ មាន​ពេល​វេលា​តិច​តួច ​និង​ថវិកា​មិន​គ្រប់​គ្រាន់​។ ​

លោក​បាន​បញ្ជាក់​ថា​៖ «បើ​ថ្ងៃ​ក្រោយ​ពួកគាត់​ចង់​ធ្វើ​ពលករ​ចំណាក​ស្រុក​មែន​តែពួក​គាត់​មាន​ជំនាញ​ទុន​ខ្លះ​​ជា​ជាង​ទៅ​ដំឡូង​មូល​ ដោយ​នាំ​យក​ទៅ​ជាមួយ​នូវ​ភាសា​និង​ជំនាញ​ខ្លះ​។ នៅ​ចុង​ឆ្នាំ​នេះ​យើង​នឹង​ពង្រីក​វិសាល​ភាព​ទៅកាន់TVETដែល​គ្រប​ដណ្ដប់​ទូទាំង​ប្រទេស»​។

ក្រៅពី​ការ​ណែ​នាំ​មុខ​វិជ្ជា​សិក្សា និង​សាកល​វិទ្យា​ល័យ​នានា Sala App ផ្ដល់​ព័ត៌មាន​បន្ថែម​ទៅលើ​មុខ​វិជ្ជា​ដែល​ពួក​គាត់​ជ្រើស​រើស ដូច​ជា ការ​ចាប់​យក​មុខ​វិជ្ជា IT។ យើង​មាន​ Education Content ដើម្បី​ឱ្យ​ពួក​គាត់​ស្វែង​យល់​ពី​មុខ​វិជ្ជា​ IT ស្ដីពី​ com​puter ​science ថា តើ​ពួកគាត់​ត្រូវ​រៀន​អ្វី​?តើ​ត្រៀម​ខ្លួន​របៀប​ម៉េច? ហើយ​រៀន​ចប់​ទៅ​ត្រូវ​ចូល​ទៅ​កាន់​ផ្នែក​ការងារ​មួយ​ណា​?

ក្រៅពី​ Education Content យើង​នៅ​មាន​ព័ត៌​មាន​ពី​កម្មវិធី​សិក្សា​នៅ​តាម​សាកល​វិទ្យា​ល័យ ឬ​វិទ្យា​ស្ថាន​នីមួយៗ​ ដូច​ជា start-up, STEM ឬ competition ហើយ​យើង​ក៏មាន​ព័ត៌​មាន​ស្ដីពី​អាហា​រូប​ករណ៍​ទាំង​ក្នុង​ និង​ក្រៅ​ប្រទេស​។

ជាមួ​យ​ការ​ដោន​ឡូតជា​ង​ ១​ ពាន់​ដង Sala Appដែល​អាច​ដោន​ឡូន​ទាំង​នៅ​ក្នុង​ប្រតិបត្ដិ​ការ Android និង iSO ត្រូវ​បាន​ដាក់​ឱ្យ​ដំណើរ​ការ​កាលពី​ចុង​ឆ្នាំ​ ២០២១ ដោយ​វេប​សាយ​បាន​ដំណើរ​ការ​ជាង ២ ​ឆ្នាំ​​។

លោក ​លាភ ​ទទួល​ស្គាល់​ថា៖ «App នៅតែ​មាន​អ្នក​ប្រើ​ប្រាស់​តិចតួច​ តែ​វេបសា​យ​អ្នក​ចូល​ប្រើ​ក្នុង​ចំនួន​ច្រើន»​៕