ក្រុងហាណូយ: ភូមិអេកូទេសចរណ៍ ហ៊ូលៀន គឺជាគោលដៅកម្សាន្តដ៏ស័ក្ដិសម ដោយសារតែទេសភាពដ៏ស្រស់ស្អាត ពេលវិបត្ដិកូវីដត្រូវបានគ្រប់គ្រង។
ចម្ងាយប្រមាណ ១២០ គីឡូម៉ែត្រភាគឦសានក្រុងហាណូយ ភូមិហ៊ូលៀន ហ៊ុមព័ទ្ធដោយទេសភាពធម្មជាតិដ៏ស្រស់ត្រកាល។ ជួរភ្នំថ្មល្អាងអាថ៌កំបាំង ប្រភពទឹកក្រោមដី និងទឹកបឹងថ្លាឈ្វេង បង្កើតបានអេកូឡូស៊ីដ៏វិសេស ដែលធ្វើឱ្យភ្ញៀវទេសចរមានអារម្មណ៍ថា ពួកគេស្ថិតនៅចន្លោះរវាងឋានសួគ៌ និងផែនដី។
នៅរដូវប្រាំង បឹងដុងឡាម រីងស្ងួត រីឯនៅរដូវវស្សា ដីវាលទំនាបដ៏ល្វឹងល្វើយនេះប្រែសម្រស់មុខមាត់ថ្មី ពេលកម្ពស់ទឹកបានបង្កើតជាទន្លេពត់ពេនតូចៗ។ ទឹកលើបឹងនេះមានពណ៌ខៀវស្រងាត់ ដែលរំលេចជាទស្សនីយភាពដ៏ត្រជាក់ភ្នែក។ នាវេលានេះ ភ្ញៀវអាចជិះទូកកាយៈ ឬអុំទូកជុំវិញផ្ទៃបឹង។
នៅក្រោមអាកាសធាតុសិសិររដូវ ភ្ញៀវតែងតែជ្រើសរើសភូមិឋានធម្មជាតិនេះ ដើម្បីរៀបចំកម្មវិធីផ្សេងៗ ដូចជាការបោះតង់ជាដើម។ ខ្លែងចម្រុះពណ៌ក៏ជាសកម្មភាពភ្ញៀវមកកាន់ភូមិហ៊ូលៀន ផងដែរ។ តំបន់នេះពិតជាស័ក្ដិសមទាំងមនុស្សធំ និងក្មេងក្នុងការលេងបង្ហើរខ្លែង និងអង្គុយពិកនិកបង្កើតអនុស្សាវរីយ៍។
វាល ដុងឡាម ស្ដេព និងហ្វូងសេះ បានក្លាយជាគោលដៅវិសេសចំពោះភ្ញៀវទេសចរ និងអ្នកថតរូប។ នៅចុងផុតនៃវាលទំនាប នៅមានបឹងមួយទៀត ដែលភ្ញៀវអាចជិះក្បូនគយគន់សម្រស់ធម្មជាតិ និងរីករាយនឹងបរិយាកាសជុំវិញខ្លួន។
ភ្ញៀវមកពីហាណូយ ភឿង ឌុង បាននិយាយថា៖ «ពិតជាសំណាងណាស់ ដែលខ្ញុំមានឱកាសបានឃើញភូមិហ៊ូលៀន។ ខ្ញុំចូលចិត្ដបរិយាកាសនៅវាលទំនាបនេះ ដែលមានបឹងទឹកពណ៌ខៀវ ម្ហូបឆ្ងាញ់ៗ និងបទពិសោធថ្មីៗ»។
លោកបានបន្ដថា៖ «គោលដៅទេសចរណ៍នេះមិនឆ្ងាយពីក្រុងហានូយនោះទេ ហើយផ្លូវក៏ងាយស្រួលធ្វើដំណើរ។ ក្នុងក្រុមយើង មានសមាជិកជាច្រើន និងគ្រប់វ័យ តែម្នាក់ៗមានអារម្មណ៍រីករាយ និងផាសុកភាព។ នៅទីនេះ ស្ទើរតែពាក្យថា ទីក្រុងនូបណីកម្មនោះឡើយ»។
នៅរដូវប្រមូលផលស្រូវ វាលស្រែរំលេចនូវទស្សនីយភាពកាន់តែស្រស់ត្រកាល។ ភ្ញៀវអាចមើលឃើញក្រុមមនុស្សប្រមូលផលស្រូវ ហិតក្លិនស្រូវ លាយឡំផ្សែងភ្លើងចំបើង។
ភូមិហ៊ូលៀន ពេលនេះមានផ្ទះស្នាក់ចំនួន ៦ ដែលអាចទទួលភ្ញៀវទេសចរជាមួយនឹងម្ហូបអាហារប្រចាំស្រុក។
វី វ៉ាន់ធូយ៉េន ម្ចាស់ផ្ទះស្នាក់ ង៉ុក ប៊ិច បាននិយាយថា អ្នកភូមិហ៊ូលៀន បានទទួលការគាំទ្រយ៉ាងច្រើន និងការបណ្ដុះបណ្ដាលពីអាជ្ញាធរមូលដ្ឋានចំពោះការអភិវឌ្ឍទេសចរណ៍សហគមន៍។
លើសពីនេះ ភូមិហ៊ូលៀន មានកន្លែងទាក់ទាញទេសចរជាច្រើនទៀត អាស្រ័យលើរដូវកាល និងកត្ដាអាកាសធាតុ។ចម្ងាយត្រឹម ១០ គីឡូម៉ែត្រពីឃុំ ភ្ញៀវអាចទស្សនាចម្ការផ្កាបាក់វីត ទឹកធ្លាក់ ខេដោ និងល្អាង សួង ផុងជាដើម៕ VIET NAM NEWS/ASIA NEWS NETWORK