ក្រុងបាងកក: អ្នកដំណើររាប់ម៉ឺននាក់រំពឹងថា នឹងមកដល់ក្រុងបាងកក និងកោះវិស្សមកាលភូកេត កាលពីថ្ងៃចន្ទ ខណៈថៃដាស់វិស័យទេសចរណ៍ឱ្យងើបឡើងវិញក្រោយបិទខ្ទប់រយៈពេល ១៨ ខែ។
វិបត្ដិកូវីដបានបំផ្លាញដល់វិស័យទេសចរណ៍ប្រទេសនេះ ដែលកាលពីឆ្នាំមុនបានធ្លាក់ដុនដាបខ្លាំងតាំងពីជួបវិបត្ដិសេដ្ឋកិច្ចក្នុងឆ្នាំ ១៩៩៧ ដោយបាត់ភ្ញៀវជាង ៨០ ភាគរយ។
អាជ្ញាធរថៃបានបើកភ្លើងខៀវដល់បណ្ដាប្រទេសមានហានិភ័យទាបដោយអ្នកដំណើរមិនចាំបាច់ធ្វើចត្ដាឡីស័កនោះទេ។ អាកាសយានដ្ឋានអន្ដរជាតិសុវណ្ណភូមិ និងអាកាសយានដ្ឋានកោះភូកេត នឹងទទួលភ្ញៀវលើកដំបូង ដែលថៃរំពឹងថា ទទួលភ្ញៀវទេសចរគេចពីអាកាសធាតុរដូវរងាក្នុងខែធ្នូ មកពីអឺរ៉ុប សហរដ្ឋអាមេរិក និងចិនជាដើម។
លោកនាយករដ្ឋមន្ដ្រី ប្រាយុធ ចាន់-អូចា និយាយកាលពីថ្ងៃសុក្រថា៖ «អ្វីដែលរដ្ឋាភិបាល និងខ្ញុំគិតពេលនេះ គឺជួយឱ្យជីវភាពប្រជាជនវិលទៅសភាពដើមវិញ»។
ទេសចរណ៍មានចំណូលជិត ១ ភាគ ៥ នៃសេដ្ឋកិច្ចជាតិ ហើយផលប៉ះពាល់ពីវិបត្ដិកូវីដ បានជះឥទ្ធិពលលើគ្រប់វិស័យចាប់ពីភោជនីយដ្ឋានរហូតដល់ការដឹកជញ្ជូន។
ប៉ុន្ដែអាជ្ញាធររំពឹងថា អ្នកដំណើរពី ១០ ទៅ ១៥ លាននាក់ នឹងវិលមកថៃវិញនៅឆ្នាំក្រោយ ដោយមានចំណូលលើស ៣០ ពាន់លានដុល្លារ។
រដ្ឋមន្ដ្រីទេសចរណ៍ ភីផាត រ៉ាតឆា-គិតប្រាកាន បានឱ្យដឹងថា៖ «ក្នុងឆ្នាំ ២០២៣ យើងជឿថា ប្រាក់ចំណូលហក់ដល់ក្បែរតួលេខឆ្នាំ ២០១៩»។
យ៉ាងណាមិញ អ្នកនៅក្នុងវិស័យនេះមិនសូវមានសុទិដ្ឋិនិយមប៉ុន្មានទេ ជាពិសេសជាមួយមហាយក្សចិន ដែលជាប្រភពផ្នែកវិស័យទេសចរណ៍ដ៏ធំ ដោយនៅតម្រូវឱ្យគោរពតាមវិធានការសុវត្ថិភាពតឹងរ៊ឹង។
ថៃនៅបន្ដកត់ត្រាចំនួនឆ្លងប្រមាណជិត ១ ម៉ឺននាក់ប្រចាំថ្ងៃ ខណៈចំនួនប្រជាជនប្រមាណ ៤០ ភាគរយ ទទួលបានការចាក់វ៉ាក់សាំងបាន ២ ដូស។ នៅទីក្រុងបាងកក មានប្រជាជនចាក់វ៉ាក់សាំងជាង ៨០ ភាគរយ។
យុទ្ធនាការបើកទ្វារស្វាគមន៍ទេសចរដែលចាប់ផ្ដើមតាំងពីខែកក្កដា នៅលើដែនកោះភូកេត វាទាក់ទាញភ្ញៀវត្រឹមតែជិត ៦ ម៉ឺននាក់ក្នុងរយៈពេល ៤ ខែ ជាចំនួនធ្លាក់ចុះយ៉ាងខ្លាំង បើធៀបនឹងអាជ្ញាធរថៃរំពឹងទុក។
អាជីវករលក់ដូរតាមឆ្នេរនៅកោះភូកេត មិនសូវស្រណុកចិត្ដចំពោះការបើកប្រទេសឡើងវិញនេះប៉ុន្មានទេ។
ឌិត អាយុ ១៨ ឆ្នាំ ដែលធ្វើនៅបារ៍របស់ពូ ឈ្មោះ Kamala Beach បាននិយាយថា ពួកគេមានចំណូល ១៥០ ដុល្លារ ក្នុង ១ ថ្ងៃមុនពេលផ្ទុះកូវីដ។
ប៉ុន្ដែនៅកោះពីពី ដ៏មានប្រជាប្រិយសម្រាប់ទេសចរសម្ពាយ សហគ្រិននៅស្រពេចស្រពិល៕ AFP/HR
វីដេអូ៖