លោក ជួន ភិរម្យ ភរិយា និងកូនៗ ឡើងភ្នំខ្នងផ្សារ កាលពីឆ្នាំ២០២១។ រូបថត សហការី
កំពង់ស្ពឺ: វីលៀមស៍ និង រស្មីភាណុ ដេញប្រឡែងគ្នាលេងនៅលើបរិវេណក្មេងលេងខុសពីកន្លែងលេងរបស់កុមារទូទៅ។ នោះ គឺនៅលើកំពូលភ្នំខ្នងផ្សារ ជាទីឋានពេញនិយមសម្រាប់ដំណើរផ្សងព្រេងបោះតង់ គយគន់ថ្ងៃរះ និងទស្សនាសម្រស់ធម្មជាតិព្រៃភ្នំ។
ថ្មីៗនេះ កុមារី វ័យ ៤ ឆ្នាំ ភិរម្យ រស្មីភាណុ ទើបបញ្ចប់ដំណើរទៅកាន់វាលខ្នងផ្សារ ជាទីដែលមនុស្សទូទៅប្រើពេលមិនតិចជាង ៥ ម៉ោងក្នុងការដើរត្រាច់ចរតាមជ្រលងដងអូរ។ ចំណែកឯបងប្រុស វីលៀមស៍ អាយុ ៨ ឆ្នាំ ក៏បានទទួលជោគជ័យក្នុងការឡើងភ្នំខ្ពស់បំផុតនៅកម្ពុជាផងដែរ។
លោក ជួន ភិរម្យ ជាបុគ្គលល្បីខាងពូកែលុកលុយព្រៃភ្នំ ស្វែងរកទីឋានធម្មជាតិស្រស់ត្រកាល និងរមែងចែករំលែកចំណេះដឹងស្ដីពីបទពិសោធដើរផ្សងព្រេង និងសម្អាតបរិស្ថាន បាននិយាយថា លោកចង់ឱ្យកូនៗលោករឹងមាំ និងចេះស្រឡាញ់ធម្មជាតិ។
លោកបានប្រាប់ ភ្នំពេញ ប៉ុស្ដិ៍ថា៖ «ដំណើរកម្សាន្ដបែបផ្សងព្រេងនេះផ្ដល់អត្ថប្រយោជន៍ដល់ក្មេងៗក្នុងការបង្កើនទំនុកចិត្ដលើខ្លួនឯង និងជាឱកាសឱ្យគាត់ផ្សារភ្ជាប់ជាមួយធម្មជាតិ ហ្វឹកហ្វឺនរាងកាយបានយ៉ាងល្អ និងជាការអប់រំមួយបែបនៅពេលគាត់ឡើងភ្នំ គាត់អាចឮសំឡេង ក្លិន និងឃើញនូវអ្វីប្លែកៗ»។
លោកបានបន្ដថា៖ «អំឡុងពេលដើរនោះ យើងអាចពន្យល់គាត់ពីសារៈសំខាន់នៃបរិស្ថាន និងអាចបង្រៀនគាត់អំពីចំណេះដឹងមូលដ្ឋាននៃការរស់នៅក្នុងព្រៃ ព្រមទាំងអនុវត្ដគោលការណ៍ «ដើរមិនទុកដាន» ផងដែរ»។
លោក ភិរម្យ អាយុ ៤១ ឆ្នាំ ជាអតីតបុគ្គលិកអង្គការក្រៅរដ្ឋាភិបាល បានបង្វឹកកូនស្រីអាយុ ៤ ឆ្នាំ តាមរយៈការបង្ហាញសកម្មភាពឡើងភ្នំ និងសម្រស់ធម្មជាតិដ៏ស្រស់ត្រកាល ដើម្បីបង្កើតអារម្មណ៍ស្រឡាញ់ និងចេះពុះពារឧបសគ្គ។ ការរៀបចំសម្ពាយក៏ជាកិច្ចការចាំបាច់ ១ សម្រាប់អ្នកឡើងភ្នំគ្រប់រូប រួមទាំងកុមារីតូចនេះផងដែរ។
រូបកូនស្រីរបស់លោក កុមារី រស្មីភាណុ នៅខ្នងផ្សារ។ រូបថត សហការី
លោក ភិរម្យ បានឱ្យដឹងថា៖ «១ ខែមុននឹងចេញដំណើរទៅឡើងភ្នំ ខ្ញុំបានបង្វឹកឱ្យគាត់ដើរ ១ ថ្ងៃ ពី ១ ទៅ ៥ គីឡូម៉ែត្រ ដោយមានទាំងការដើរឡើង និងចុះទួលជាមួយការពាក់ស្បែកជើងឡើងភ្នំ បំណងឱ្យគាត់ស៊ាំនឹងវា។ ខ្ញុំក៏បានប្រាប់គាត់ពីរបៀបចុះចំណោត ការប្រើប្រាស់សម្ភារ ដូចជា របៀបប្រើឈើច្រត់ ឬ Trekking poles របៀបប្រើពិល និងការមើលជុំវិញខ្លួន និងមើលចម្ងាយឆ្ងាយ ក្រែងអាចមានឧបសគ្គកើតឡើង»។
ថ្វីដ្បិតកុមារី ភិរម្យ រស្មីភាណុ អាយុត្រឹមតែ ៤ ឆ្នាំក៏ដោយ ក៏សម្ទុះល្បឿននៃការដើរឡើងភ្នំខ្នងផ្សារ មិនអាចដូចមនុស្សពេញវ័យដែលមិនសូវមានបទពិសោធនោះទេ។
រត់លេងបណ្ដើរ បះបោចផ្កាព្រៃបណ្ដើរ និងទឹកមុខជូរចត់ម្ដងម្កាល កុមារី រស្មីភាណុ ចំណាយពេលដើរចាប់ពីដំណាក់ទី១ រហូតដល់ទីកន្លែងបោះតង់ជាមួយថេរវេលា ៥ ម៉ោងកន្លះ។
ប្រាកដណាស់ រស្មីភាណុ ឆាប់មានការនឿយហត់ និងតែងតែសុំសម្រាកជារឿយៗ ក៏ដូចជាស្រែករអ៊ូពេលដើរឡើងចំណោតច្រើន រហូតដល់មានបំណងចង់បកក្រោយវិញទៀតផង។ ប៉ុន្ដែការនឿយហត់ប៉ុណ្ណឹងមិនមែនជាឧបសគ្គចំពោះកុមារី ដែលស្ថិតក្រោមការបង្ហាត់បង្ហាញគ្រប់ពេលវេលាពីសំណាក់ឪពុកដ៏មានបទពិសោធ។
លើដំណើរផ្សងព្រេងជាលក្ខណៈគ្រួសារទៅកាន់ខ្នងផ្សារ រួមមាន ឪពុក ម្ដាយ និងកូនៗ ២ នាក់ លោក ភិរម្យ បាននិយាយពីភាពរីករាយរបស់កូនថា៖ «គាត់សប្បាយបានរត់លេងលើវាលស្មៅ មើលទេសភាពវាលស្មៅដ៏ស្រស់ស្អាត និងរត់តាមអ្នកឡើងភ្នំផ្សេងៗទៀត ដែលនាំគ្នាទៅគយគន់ថ្ងៃលិច។ ពេលព្រឹកព្រលឹមងើបពីគេង គាត់បានឮសំឡេងសត្វទោចយំក្បែរតង់របស់គាត់»។
ក្រៅពីដំណើរទៅកាន់ខ្នងផ្សារ លោក ភិរម្យ ដែលបានឡើងភ្នំខ្ពស់បំផុតនៅកម្ពុជាក្នុងវ័យ ២១ ឆ្នាំ បាននាំកូនប្រុសលោកទៅសម្រេចគោលដៅ ១ នេះត្រឹមអាយុក្រោម ១០ ឆ្នាំ។
លោកបាននិយាយលើកទឹកចិត្ដកូនប្រុសថា៖ «បើកូនឡើងកំពូលភ្នំឱរ៉ាល់បាន កូនពិតជាមានមោទនភាពចំពោះខ្លួនឯង ហើយកូនមានវ័យនៅក្មេងជាង daddy ដោយសារ daddy អាយុ ២១ ឆ្នាំបានទៅដល់ភ្នំខ្ពស់ជាងគេនៅកម្ពុជានេះ»។
ដោយសារតែការឡើងភ្នំឱរ៉ាល់ត្រូវប្រើកម្លាំងថាមពលច្រើន លោក ភិរម្យ មិនបាននាំកូនស្រីទៅជាមួយឡើយ។
ចំពោះចំណូលចិត្ដនាំកូនដើរកម្សាន្ដប្លែកខុសពីឪពុកម្ដាយទូទៅនេះ លោកបានបកស្រាយថា លោកចង់ឱ្យកូនស្គាល់ពីតម្លៃធម្មជាតិ ចង់បង្រៀនកូនឱ្យចេះតស៊ូ អត់ធ្មត់ ដើម្បីឱ្យកូនដឹងថា មុនដល់គោលដៅ វាមានឧបសគ្គអ្វីខ្លះ និងចង់ឱ្យកូនស្គាល់ពីជីវភាពរស់នៅរបស់កុមារសហគមន៍ក្បែរតំបន់ទេសចរណ៍ធម្មជាតិ។
លោក ជួន ភិរម្យ ភរិយា និងកូនប្រុសកុមារា វីលៀមស៍ អាយុ ៨ ឆ្នាំនៅកំពូលភ្នំឱរ៉ាល់ ឆ្នាំ២០២១។ រូបថត សហការី
លោកបានឱ្យដឹងថា៖ «លើសពីនេះ ខ្ញុំចង់ជួយដល់ជីវភាពសហគមន៍តាមរយៈការផ្ដល់សេវាកម្មជូនភ្ញៀវឡើងភ្នំ ហើយខ្ញុំចង់បង្ហាញដល់ឪពុកម្ដាយផ្សេងទៀតថា កូនៗរបស់ពួកគេក៏អាចឡើងភ្នំឱរ៉ាល់បានដូចកូនរបស់ខ្ញុំដែរ»។
ដោយត្រៀមសម្ភារមិនខុសពីការឡើងខ្នងផ្សារ កុមារា វីលៀមស៍ បានចំណាយពេល ២ យប់ ៣ ថ្ងៃ ដើម្បីទៅដល់កំពូលភ្នំឱរ៉ាល់ រួមទាំងការសម្រាកឯភូមិសហគមន៍ ១ យប់ផងដែរ។
លោក ភិរម្យ ដែលបានបង្ហោះវីដេអូប្រឡែងលេងជាមួយសត្វទាកដោយមិនខ្លាចញញើតបានប្រាប់ថា៖ «អ្វីដែលខ្ញុំមើលទៅទាំងការហូបចុក និងការសម្រាករបស់គាត់ មិនមានជាបញ្ហាលំបាកច្រើនទេ ដោយសារគាត់ធ្លាប់គេងក្នុងតង់បែបផ្សងព្រេងជាច្រើនដងជាមួយខ្ញុំ។ តែគាត់ពិបាកងូតទឹកបន្ដិច។ គាត់ចាញ់រងា ពីព្រោះនៅលើកំពូលភ្នំ មានអាកាសធាតុត្រជាក់ខ្លាំង»។
លោកក៏បានបង្ហើបទៀតថា លោកក៏មានបំណងនាំកូនៗ និងភរិយារបស់លោកបន្ដផ្សងព្រេងទៅកាន់ភ្នំសំកុស ភ្នំទំព័រ វាលធំ ខ្នងក្រពើ ខ្នងវាល និងខ្នងព្រះផងដែរ។
ជាចុងក្រោយ អ្នកលុយព្រៃភ្នំរូបនេះ បានលើកទឹកចិត្ដភ្ញៀវទេសចរនិយមដំណើរផ្សងព្រេងទាំងអស់ជ្រើសយកសេវាកម្មអ្នកនាំផ្លូវ ដែលសម្រួលឱ្យដំណើរកម្សាន្ដប្រកបដោយសុវត្ថិភាព និងស្ទួយជីវភាពសហគមន៍ តាមរយៈលេខទូរស័ព្ទ៖ ០៨៧ ៧៩៤ ៥៨០ (ម៉ៅ) /០១៥ ៧៥០ ១៣១ (គុយ) ០៩៦ ២៤៨ ៤៥៦៦ (ពូនឹម) / ០៩៦ ៩១៩ ៦៥៣៥ (រិទ្ឋិ) / ០១៥ ៧០ ៤៩ ៨៨ (សៅ)៕
