.jpg)
ភ្ញៀវនឹងត្រូវបានណែនាំពីការដើរឡើងចំណោតភ្នំឆ្លងកាត់ព្រៃឫស្សី។ រូបថត សហការី
ភ្នំពេញ: ពេលនឹកឃើញថា ចង់ទៅលេងគិរីរម្យម្នាក់ៗនឹងវេចបង្វេច កញ្ចប់អាហារពិកនិកឡើងរថយន្ដបោះពួយលើចម្ងាយផ្លូវប្រមាណ ១១៤ គីឡូម៉ែត្រតែប៉ុន្មានម៉ោង រួចចតរថយន្ដយ៉ាងរំភើយ។
អ្វីដែលពួកគេបានឃើញ គឺទិដ្ឋភាពតាមដងផ្លូវ និងព្រៃស្រល់នៅលើខ្នងភ្នំនៃឧទ្យានជាតិគិរីរម្យ ដែលសម្បូរដោយភ្ញៀវជាច្រើននាក់នៅទីនោះ។
ប៉ុន្ដែដើម្បីឱ្យដំណើរកម្សាន្ដគយគន់ព្រៃព្រឹក្សាសត្វស្លាប ក៏ដូចជាសម្រស់ព្រៃស្រស់ក្នុងសភាពធម្មជាតិរបស់វា អ្នកដំណើរគួរសាកល្បងចំណាយពេលដើរថ្មើរជើងជាមួយបទពិសោធថ្មីសន្លាង។ ដំណើរឡើងភ្នំគិរីរម្យនេះ ត្រូវបានធ្វើឡើងនៅតាមផ្លូវថ្មើរជើងថ្មីដែលមិនត្រូវបានរំខាន និងចោលសំរាមដោយមនុស្ស។ អ្នកដើរផ្សងព្រេងដែលត្រូវបានទទួលចូលរួមមានអាយុចាប់ពី ១២ ឆ្នាំ នឹងចេញដំណើរថ្មើរជើងពីសហគមន៍ចំបក់ ក្នុងឃុំចំបក់ ស្រុកភ្នំស្រួច ខេត្ដកំពង់ស្ពឺ។
លោក ជា ថុង ជាស្ថាបនិកក្រុមហ៊ុន Vana Adventure Travel ដែលរៀបចំដំណើរកម្សាន្ដនេះបានប្រាប់ ភ្នំពេញប៉ុស្ដិ៍ថា៖ «វាជាផ្លូវលើកទី១ ដែលខាងខ្ញុំសហការជាមួយសហគមន៍ចំបក់ ដោយយើងចាប់ផ្ដើមចេញដំណើរពីសហគមន៍ចំបក់ទៅកាន់ឧទ្យានគិរីរម្យ ដែលមានចម្ងាយផ្លូវប្រហាក់ប្រហែល ១៥ គីឡូម៉ែត្រ»។
លោក ថុង ដែលត្រៀមទទួលភ្ញៀវ ៥ ទៅ ២០ នាក់ ក្នុងដំណើរផ្សងព្រេង ១ ថ្ងៃនេះ នឹងស្នើឱ្យភ្ញៀវចេញដំណើរពីភ្នំពេញនៅម៉ោង ៥:៣០ ព្រឹក។
លើចម្ងាយផ្លូវ ១៥ គីឡូម៉ែត្រ ដែលមានរយៈកម្ពស់ ៦៧៥ ម៉ែត្រ លើនីវ៉ូទឹកសមុទ្រអ្នកផ្សងព្រេងវិលល្ងាចនឹងត្រូវដើរឆ្លងកាត់ ៣ ភ្នំ ដែលរំលេចនូវទេសភាពខុសៗគ្នា។
អំឡុងពេលដំណើរតាមដងផ្លូវ ពួកគេក៏អាចប្រទះឃើញនូវពពួកសត្វស្លាបជាច្រើន ក៏ដូចជាដើមឈើតូចធំក្នុងឧទ្យានជាតិទៀតផង។
សហគមន៍ការពារធម្មជាតិចំបក់ ជាតំបន់អេកូទេសចរណ៍ដ៏ទាក់ទាញមួយរួចហើយ ដែលភ្ញៀវនឹងមានឱកាសបានទស្សនាទេសភាពក្នុងតំបន់សហគមន៍នេះជាហូរហែ។
អ្នកដំណើរនឹងបានឃើញទឹកធ្លាក់លាក់ខ្លួនក្នុងព្រៃ ដែលហាក់រង់ចាំភ្ញៀវទេសចរមកថតរូបអនុស្សាវរីយ។
លោក ថុង បាននិយាយបន្តថា៖ «សម្រាប់ដំណើរលើភ្នំ ដំបូងយើងនឹងបានឃើញ និងដើរឆ្លងកាត់ព្រៃឫស្សីក៏ដូចជាពើបប្រទះពពួកសត្វស្លាបមួយចំនួនដូចជា ស្ទាំង ត្រសេះ ពពេចថ្ម ចាបព្រៃ និងចាបភ្នំ»។
អ្នកផ្សងព្រេងនឹងត្រូវដើរឆ្លងកាត់ ៣ភ្នំ រំលេចនូវទេសភាពខុសៗគ្នា នៅរយៈកម្ពស់ ៦៧៥ម៉ែត្រពីនីវ៉ូសមុទ្រ។ រូបថត សហការី
ចេញផុតពីតំបន់ព្រៃឫស្សី ភ្ញៀវបានជ្រកម្លប់ឈើត្រឈឹងត្រឈៃនៃដើមឈើធំៗឈរខ្ពស់ៗ ដែលជាជម្រករបស់ពពួកសត្វស្វា និងទោច។
លោក ថុង ដែលទើបរៀបចំដំណើរកម្សាន្ដកន្លះថ្ងៃទៅទស្សនាសត្វស្លាបឯជាយក្រុងនាពេលថ្មីៗនេះ បានបន្ដថា ទៅដល់តំបន់ភ្នំទី២ ជាប្រភេទភ្នំព្រៃស្រោងដែលមានដើមឈើតូចធំ។ វាជាជម្រកសត្វស្វា និងទោចដែលផ្លាស់ប្ដូរទីលំនៅទៅតាមរដូវកាលរបស់វា ក៏ដូចជាសត្វកេងកង។
បន្ទាប់ពីព្រៃស្រោង អ្នកថ្មើរជើងនឹងបានឃើញទេសភាពព្រៃស្រល់ចោលសម្រស់បៃតងស្រស់ ដែលផ្ដល់ជាភាពស្រទន់ត្រជាក់ភ្នែកលើខ្នងភ្នំនៃឧទ្យានជាតិគិរីរម្យ។ ព្រៃស្រល់ក៏ជាជម្រកសត្វស្លាបជាច្រើន ដែលហោះហើរពីដើមឈើ ១ ទៅដើមឈើ ១ ទៀតយ៉ាងមានសេរីភាព។
ស្ថាបនិកក្រុមហ៊ុនទេសចរណ៍ ដែលតែងតែនាំភ្ញៀវទៅកាន់តំបន់កម្សាន្ដប្លែកៗនៅទូទាំងប្រទេស លោក ថុង បានបន្ដថា៖ «ដល់តំបន់ទី៣ ស្ថិតនៅលើភ្នំឧទ្យានគិរីរម្យ ជាព្រៃស្រល់ ដែលកកើតជាឧទ្យានជាតិតាំងពីឆ្នាំ ១៩៦១»។
លោកអះអាងថា៖ «ទីនេះជាតំបន់ទេសភាពស្អាតមានផ្លូវដើរខ្វាត់ខ្វែងក្នុងព្រៃស្រល់។ នៅទីនេះក៏មានសត្វស្លាបមួយចំនួនទៀតដែរដូចជា ពពូលភ្នំ កេងកង និងសត្វចេកទុំផងដែរ»។
ជាមួយបទពិសោធមគ្គុទេសក៍ដើរព្រៃជាច្រើនអ្នកដំណើរប្រាកដជាត្រូវបានជូនដំណឹងពីរបៀបនៃការដើរឡើងភ្នំ និងរឿងរ៉ាវគួរឱ្យចាប់អារម្មណ៍ជាច្រើនដូចជា អត្ថប្រយោជន៍នៃរុក្ខជាតិមួយចំនួន និងប្រវត្ដិនៃការកើតឡើងឧទ្យានជាតិជាដើម។
លោក ថុង បានឱ្យដឹងថា៖ «យើងតែងតែណែនាំដល់ភ្ញៀវចំពោះការដើរឡើងភ្នំដោយមានការប្រុងប្រយ័ត្ននូវការឡើងចំណោត ឬព្រៃឫស្សីដែលអាចមុតរបួសស្នាម។ យើងណែនាំពីរុក្ខជាតិមួយចំនួនដែលផ្ដល់ប្រយោជន៍ជាគ្រឿងសង្ហារិម និងឱសថ។ នៅមានល្អាងប្រចៀវធំ និងឈើស្រោងនៅភ្នំទី២ ក៏ដូចជាប្រវត្ដិព្រៃស្រល់»។
នៅលើដំណើរថ្មើរជើងជាច្រើនម៉ោងនេះ ភ្ញៀវមិនចាំបាច់ខ្វល់ពីការដើរត្រឡប់ក្រោយវិញឡើយ។
ដំណើរតាមដងផ្លូវ ពួកគេក៏អាចប្រទះឃើញពពួកសត្វស្លាប និងដើមឈើតូចធំក្នុងឧទ្យានជាតិទៀតផង។ រូបថត សហការី
លោក ថុង បញ្ជាក់ថា៖ «ចំពោះការដើរចម្ងាយ ១៥ គីឡូម៉ែត្រ ដែលចំណាយពេលចន្លោះពី ៦ ទៅ ៧ ម៉ោងនេះ យើងអត់ត្រឡប់មកក្រោយវិញទេ។ ឡានរបស់យើងនឹងទៅរង់ចាំនៅលើភ្នំគិរីរម្យត្រង់ចំណុចនាគព័ន្ធ និងសម្រាកមួយរយៈ មុនពេលវិលត្រឡប់មកភ្នំពេញវិញ»។
ជាមួយអាហារពេលព្រឹក ១ កញ្ចប់ និងអាហារថ្ងៃត្រង់ ១ កញ្ចប់ សម្រាប់ភ្ញៀវម្នាក់ ដែលត្រូវបានចម្អិនដោយប្រជាសហគមន៍ ភ្ញៀវបរទេស និងត្រូវចំណាយ ៦៥ ដុល្លារ និងខ្មែរ ៤៥ ដុល្លារម្នាក់ រួមទាំងថ្លៃសំបុត្រចូលឧទ្យានជាតិ អ្នកនាំផ្លូវពីសហគមន៍ទឹកបរិសុទ្ធ និងដំណើរទាំងទៅ និងមកក្រុងភ្នំពេញ។
សម្រាប់ភ្ញៀវអ្វីដែលពួកគេត្រូវធ្វើ គឺការបន្ថែមអាហារសម្រន់សម្រាប់បំពេញក្រពះពេលស្រេកឃ្លាន ប្រើដបទឹកសម្រាប់ចាក់ទឹកបន្ថែម ដើម្បីកាត់បន្ថយការប្រើប្រាស់ប្លាស្ទិក។
អ្នកផ្សងព្រេងក៏ត្រូវបានស្នើឱ្យគ្រងសម្លៀកបំពាក់បែបឡើងភ្នំទៅតាមរដូវភ្លៀង និងសម្ពាយដែលផ្ទុកអាហារសម្រន់ និងទឹកបន្ថែម។ ពួកគេគួរមានស្បែកជើង វែនតាខ្មៅ និងក្រែមលាបការពារ ថ្នាំមូស កាមេរ៉ា ឬស្មាតហ្វូនសម្រាប់ផ្ដិតយករូបភាពដ៏ស្រស់ត្រកាលអំឡុងធ្វើដំណើរ និងគួរមាន powerbank បំពេញថ្មជាប់ជានិច្ច។
ដំណើរផ្សងព្រេងចាប់ផ្ដើមពីម៉ោង ៥:៣០ ព្រឹក នៅថ្ងៃទី ៤ ខែ មិថុនា ឆ្នាំ ២០២២ ដោយយកវត្ដឧណ្ណាលោមជាចំណុចណាត់ជួប។
សម្រាប់ព័ត៌មានលម្អិតសូមចូលទៅកាន់ហ្វេសប៊ុក @vanaadventuretravel ឬតំណភ្ជាប់នៃវេបសាយ https://bit.ly/3MMzuX5៕
