ភ្នំពេញៈ វិនិយោគិនក្នុងស្រុក បានចំណាយប្រាក់រាប់លានដុល្លារដើម្បីរៀបចំកោះស្លាកែតស្ទូឌីយោ ធ្វើជាកន្លែងសម្រាកលម្ហែកែច្នៃថ្មីតាមបែបវប្បធម៌ និងធម្មជាតិ ក្នុងគោលដៅទាក់ទាញទេសចរជាតិ និងអន្តរជាតិ និងបង្កើតការងារជូនប្រជាជនក្នុងតំបន់ផងដែរ។
កោះស្លាកែតស្ទូឌីយោ គឺជារមណីយដ្ឋានទេសចរណ៍សិប្បនិម្មិតដែលត្រូវបានសម្ពោធជាផ្លូវការ កាលពីថ្ងៃទី ៦ ខែសីហា ដើម្បីឱ្យភ្ញៀវបានចូលមកកម្សាន្តដោយស្ថិតនៅក្នុងឃុំដីឥដ្ឋ ស្រុកកៀនស្វាយ ខេត្តកណ្តាល។
កោះស្លាកែតស្ទូឌីយោ បានរៀបចំជាហាងកាហ្វេប្រេ៊នដែលមានទីធ្លាធំទូលាយភ្ជាប់គ្នានឹងអាងហែលទឹកទំនើប និងមានផ្ទះលម្ហែសាងសង់បែបរចនាប័ទ្មខ្មែរផ្នែកខាងក្រៅ និងផ្នែកខាងក្នុងតែងជាលក្ខណៈទំនើបទាន់សម័យតាមបែបរចនាប័ទ្មបរទេសដូចជា ប្រទេសថៃ ជប៉ុន អាមេរិក និងឈីក (ម៉ូរ៉ុកកូ)។
នៅក្នុងពិធីសម្ពោធនេះដែរ លោកស្រី ច័ន្ទ ដាវី ស្ថាបនិកកោះស្លាកែតស្ទូឌីយោ និងជាអគ្គនាយកក្រុមហ៊ុន និងផលិតកម្ម ដាវីត្រា បានប្រាប់ឱ្យដឹងថា កោះស្លាកែតស្ទូឌីយោមានផ្ទៃដីប្រមាណ ១៣ ហិកតា ដែលជាដីផ្ទាល់ខ្លួនរបស់លោកស្រីដោយបានចំណាយថវិកាខ្ទង់លានដុល្លារ ដើម្បីរៀបចំកន្លែងកម្សាន្តដែលមានរចនាប័ទ្មបែបចម្រុះនេះឡើង។
លោកស្រីបានបន្តថា បច្ចុប្បន្នក្រុមហ៊ុនទើបតែរៀបចំកន្លែងកម្សាន្តបានប្រមាណ ២០ ភាគរយប៉ុណ្ណោះ។ កោះស្លាកែតស្ទូឌីយោមានសេវាកម្មជាច្រើនដែលទាក់ទាញដល់ភ្ញៀវទេសចរឱ្យមកទស្សនាកម្សាន្ត ដោយសំបុត្រចូលទស្សនាមានតម្លៃ ៣ ដុល្លារ ហើយសំបុត្រនេះអាចយកទៅប្តូរយកភេសជ្ជៈបាន។
ម្ចាស់កោះស្លាកែតស្ទូឌីយោរូបនេះ ឱ្យដឹងថា៖ «យើងមិនទាន់អាចកំណត់ត្រូវចំណាយពេលប៉ុន្មានឆ្នាំឱ្យបានច្បាស់ក្នុងការបញ្ចប់ស្ទូឌីយោនេះទេ ដោយឥឡូវនៅតែបន្តការសាងសង់ជាធម្មតា។ ខ្ញុំជឿថា ការដែលខ្ញុំវិនិយោគទៅលើវិស័យទេសចរណ៍វប្បធម៌នេះ រំពឹងថា នឹងទទួលបានការគាំទ្រពីមហាជនទាំងក្នុងនិងក្រៅប្រទេស ដោយនឹងអាចក្លាយជាកន្លែងទេសចរណ៍ក្បែរក្រុង ១ ដែលមានការពេញនិយម»។
អ្នកនាំពាក្យក្រសួងទេសចរណ៍ លោក តុប សុភ័ក បានឱ្យដឹងថា ក្រសួងទេសចរណ៍តែងគាំទ្ររាល់ការបង្កើតផលិតផលទេសចរណ៍ថ្មីរបស់វិស័យឯកជន ដែលជាការរួមចំណែកធ្វើឱ្យចលនាទេសចរនៅក្នុងស្រុកកាន់តែមានកំណើន ស្របពេលកម្ពុជាបាននិងកំពុងជំរុញការស្តារវិស័យទេសចរណ៍ក្រោយពីវិបត្តិកូវីដ ១៩។
លោកបញ្ជាក់ថា៖ «វិស័យទេសចរណ៍កម្ពុជា បានងើបជាបណ្តើរហើយ ដោយការតភ្ជាប់ជើងហោះហើរមានការកើនឡើង ខណៈចំនួនភ្ញៀវទេសចរជាតិ និងអន្តរជាតិ ក៏កើនឡើងជាបណ្តើរដែរ។ ការណ៍នេះធ្វើឱ្យវិស័យឯកជនមានទំនុកចិត្ត ក្នុងការវិនិយោគឡើងវិញ ឬវិនិយោគថ្មី ទៅលើវិស័យមួយនេះ ដែលជាសញ្ញាវិជ្ជមានមួយសម្រាប់ វិស័យទេសចរណ៍»។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានគាំទ្រឱ្យមានការរៀបចំរមណីយដ្ឋានបែបទេសចរណ៍ធម្មជាតិ និងវប្បធម៌ ដូចកោះស្លាកែតស្ទូឌីយោនេះ បើទោះពេលនេះកូវីដ ១៩ នៅបន្តរីករាលដាល ក៏លោកស្រីជំរុញឱ្យមានការចាក់វ៉ាក់សាំងគ្រប់ដូស និងឱ្យពលរដ្ឋបន្តការពារខ្លួន និងរស់តាមគន្លងប្រក្រតីភាពថ្មី។
លោកស្រីបន្ថែមថា៖ «ថ្វីដ្បិតកម្ពុជាមានសម្ទុះទេសចរមិនលឿនដូចប្រទេសថៃ ប៉ុន្តែការជំរុញទេសចរផ្ទៃក្នុង និងការទាក់ទាញទេសចរពីក្រៅ គឺជារឿងចាំបាច់។ ការបង្កើតផលិតផលទេសចរណ៍ ឬសេវាកម្មទេសចរណ៍ថ្មី នឹងរួមចំណែកជំរុញការស្តារវិស័យទេសចរណ៍កម្ពុជាឱ្យឆាប់មានភាពល្អប្រសើរឡើងវិញ»។
ស្ថិតិក្រសួងទេសចរណ៍បានបង្ហាញថា ក្នុងឆមាសទី១ ឆ្នាំ ២០២២ កម្ពុជាទទួលបានភ្ញៀវទេសចរអន្តរជាតិប្រមាណជាង ៥០ ម៉ឺននាក់ កើនឡើង ៣៩៤ ភាគរយ ធៀបរយៈពេលដូចគ្នាឆ្នាំ ២០២១ ចំណែកទេសចរផ្ទៃក្នុងធ្វើដំណើរក្នុងប្រទេស មានទេសចរជាតិ ៦,៣៣ លាននាក់ កើនឡើង ២១៩ ភាគរយ និងទេសចរបរទេសផ្ទៃក្នុង ៦៨ ម៉ឺននាក់កើន ៣៨០ ភាគរយ៕