ទស្សនាវដ្ដី National Geographic នៅ​ថ្ងៃទី​ ២៦ ខែ តុលា ឆ្នាំ​ ២០២២ ​កន្លងទៅ បាន ប្រកាស​អំពី​បញ្ជី​ទីកន្លែង​ទេសចរណ៍​ដ៏​ស្រស់ស្អាត​បំផុត​ចំនួន​ ២៥ នៅ​ទូទាំង​ពិភពលោក ក្រោម​ផ្នែក​ចំនួន​ ៥ ​ផ្សេងៗ​គ្នា គឺ​ទេសចរណ៍​សហគមន៍​ទេសចរណ៍ ធម្មជាតិ​ទេសចរណ៍ វប្បធម៌ ទេសចរណ៍​បែប​គ្រួសារ និង​ទេសចរណ៍​ផ្សងព្រេង​។ ក្នុងចំណោម​នោះ មាន​កន្លែង​ទេសចរណ៍​ក្នុងប្រទេស​នៅ​អាស៊ី​ចំនួន​ ៣ ជាប់​ចំណាត់ថ្នាក់​នៅក្នុង​បញ្ជី​នោះដែរ​។

កន្លែង​ទេសចរណ៍​ដំបូង​នៅ​អាស៊ី​ដែល​ជាប់​ចំណាត់ថ្នាក់​នៅក្នុង​បញ្ជី​នេះ គឺ​ស្ថិតនៅ​ក្នុង​ប្រទេស​ឡាវ​។ ជា​ប្រទេស​មួយ​នៅ​អាស៊ី​ប៉ែក​អាគ្នេយ៍ ប្រទេស​ឡាវ​ ល្បីល្បាញ​ដោយសារតែ​ទេសភាព​ធម្មជាតិ​ដ៏​ស្រស់ស្អាត ​និង​សម្បូរបែប​របស់​ខ្លួន​។ ចំណុច​ពិសេស​មួយទៀត​នៃ​ប្រទេស​ឡាវ​នេះ គឺជា​ប្រទេស​មួយ ក្នុង​ចំណោម​ប្រទេស​ទាំង​ ៥ ដែល​ទន្លេមេគង្គ​ហូរ​កាត់​ដែល​មាន​ដូចជា​ប្រទេស​ថៃ វៀតណាម កម្ពុជា និង​មីយ៉ាន់ម៉ា​។

ទីក្រុង​ប៊ូសាន​នៃ​ប្រទេស​កូរ៉េខាងត្បូង គឺជា​តំបន់​ទេសចរណ៍​មួយទៀត​ដែល​ជាប់​ចំណាត់ថ្នាក់​នៅក្នុង​បញ្ជី​នេះ​ដែរ​។ មាន​ប្រជាជន​រស់នៅ​ប្រមាណ ៣,៦ ​លាន​នាក់ ទីក្រុង​ប៊ូសាន​គឺជា​ទីក្រុង​ដែល​មាន​ចំនួន​ប្រជាជន​រស់នៅ​ច្រើន​ជាងគេ​ទី​២ ​នៅក្នុង​ប្រទេស​កូរ៉េ​ខាងត្បូង​បន្ទាប់ពី​រដ្ឋធានី​សេអ៊ូល ដែល​មាន​ប្រជាជន​រស់នៅ​ជិត​ ១០ ​លាន​នាក់​។

ទីក្រុង​នេះ ល្បីល្បាញ​ដោយសារតែ​វា​ជាទី​តាំង​រៀបចំ​មហោស្រព​ភាពយន្ត​អន្ដរជាតិ​ប៊ូសាន BIFF ជា​រៀងរាល់ឆ្នាំ​។ មិន​ត្រឹមតែ​ប៉ុណ្ណោះ ក៏មាន​ផងដែរ សួនឧទ្យាន​ជាច្រើន​កន្លែង ដូចជា ឧទ្យាន APEC Naru និង​ទី​បញ្ចុះសព UN Memorial and Park ដែល​រៀបចំ​ឡើង​ដើម្បី​ឧទ្ទិស​ដល់​ទាហាន​ដែល​បាន​ពលី​ជីវិត​ក្នុង​អំឡុង​សង្គ្រាម​កូរ៉េ​។

ចំណែក​ទីតាំង​ទេសចរណ៍​ចុងក្រោយ​ស្ថិត​នៅក្នុង​ប្រទេស​ចិន គឺ តំបន់​រូងភ្នំ Longmen Grottoes ដែល​ជា​តំបន់​បេតិកភណ្ឌ​ពិភពលោក​របស់​អង្គការ​យូណេស្កូ មាន​ទីតាំងនៅ​ទីក្រុង Luoyang ក្នុង​ខេត្ត Henan ភាគ​កណ្តាល​ប្រទេស​ចិន​។ រូងភ្នំ​នេះ មាន​ផ្ទុក​នូវ​សិល្បៈ​ចម្លាក់​ព្រះពុទ្ធ​បដិមា​ដ៏​ធំ និង​គួរឱ្យ​ចាប់អារម្មណ៍​បំផុត​របស់​ប្រទេស​ចិន ពី​ចុង​រាជវង្ស Wei និង Tang ខាងជើង ក្នុងអំឡុង​ឆ្នាំ​ ១៣៦-៩០៧ ​នៃ​គ​.​ស​។ ទីតាំង​នេះ​មាន គឺជា​បណ្ដុះ​រូងភ្នំ​ជាង ២ ៣០០ ​រូងភ្នំ ដែល​មាន​ឆ្លាក់​រូបចម្លាក់​ព្រះពុទ្ធ​បដិមា​ជិត ១១០ ០០០ និង​សិលាចារឹក​នៅលើ​ថ្ម​ចំនួន ២ ៨០០៕​