ភ្នំពេញៈ ក្រុមជម្រើសជាតិកម្ពុជា បានផ្តល់កាដូយ៉ាងពេញចិត្តមួយ ដល់អ្នកគាំទ្រផ្ទាល់ជាង ៥ ម៉ឺននាក់ តាមរយៈការទម្លាក់ក្រុមឆាយនីសតៃប៉ិ ក្នុងការប្រកួតកាត់សេចក្តីក្នុងទឹកដីខ្លួនឯងនៃពហុកីឡដ្ឋានជាតិ កាលពីយប់មិញ ដើម្បីទទួលបានឱកាសឡើងទៅប្រកួតនៅវគ្គបន្តពានរង្វាន់ជើងឯកទ្វីបអាស៊ី AFC Asian Cup 2019 ជាមួយប្រទេសផ្សេងៗទៀត។ ការទទួលបានលទ្ធផលស្មើ ២-២ ក្នុងការប្រកួតជើងទី ១ នៅលើទឹកដីឆាយនីសតៃប៉ិ កាលពីថ្ងៃទី ២ ខែមិថុនា កន្លងមក បានធ្វើឲ្យការប្រកួតកាត់សេចក្តី កាលពីយប់មិញ មានភាពស្វិតស្វាញបំផុត។ ក្រុមឆាយនីសតៃប៉ិ ដែលហាក់ចាញ់ប្រៀបក្រុមជម្រើសជាតិកម្ពុជានោះ បានព្យាយាមវាយសម្រុកទៅលើក្រុមម្ចាស់ផ្ទះកម្ពុជា ភ្លាមៗ ប៉ុន្តែពួកគេមិនអាចរកបានគ្រាប់បាល់ទេ។