កាលពី៤០ឆ្នាំមុន គ្រាប់បែកអាមេរិកកាំងដែលបានទម្លាក់លើកម្ពុជានាពាក់កណ្តាលទស្សវត្សទី៧០ បានធ្វើឲ្យកម្លាំងខ្មែរក្រហមកាន់តែខ្លាំងក្លាឡើងៗ ពួកគេវាយសម្រុកបំបែករដ្ឋធានីភ្នំពេញ ដែលកំពុងទទួលជនភៀសខ្លួនកាន់តែច្រើនជារៀងរាល់ថ្ងៃ។ ហើយទីបំផុតបន្ទាប់ពីចូលឆ្នាំខ្មែររួចនៅថ្ងៃទី១៧ មេសា ឆ្នាំ១៩៧៥ កងទ័ពបក្សកម្មុយនិសដែលជ្រកក្រោមស្លាកប្រជាធិប្បតេយ្យខ្មែរក្រហម ដឹកនាំដោយ ប៉ុល ពត បានទទួលជោគជ័យដោយប្រើពាក្យរំដោះកម្ពុជាចេញពីនឹមចក្រព័ត្តអាមេរិកកាំង ហើយជម្លៀសប្រជាជនទាំងកំរោលចេញពីផ្ទះសម្បែងទៅកាន់ទីជនបទនានា។ អង្គការបានបង្ខំប្រជារាស្រ្ដទូទាំងប្រទេសធ្វើការយ៉ាងធ្ងន់ធ្ងរបណ្ដសលឲ្យប្រជាជនបាត់បង់ជីវិតជាបន្តបន្ទាប់អស់រយៈពេលជាង៣ឆ្នាំ។ ផ្អែកទៅតាមតុលាការខ្មែរក្រហមបន្ទាប់ពីរបបនេះបានដូលរលំទៅ យ៉ាងហោចណាស់មានប្រជាជនប្រមាណជា ១លាន៧សែន នាក់ស្មើរនឹង ១ភាគ៣ នៃប្រជាជនសរុប បានបាត់បង់ជីវិតដោយសារការសម្លាប់ក្រៅប្រព័ន្ធតុលាការ ដោយភាពអត់ឃ្លាន និងការបង្ខំឲ្យធ្វើការធ្ងន់ធ្ងរ។