The Phnom Penh Post Search

Search form




Logo of Phnom Penh Post newspaper Phnom Penh Post - តោះ! ច្រៀង​លេង ស្តាប់​តន្រ្តី ស្ទូចត្រី ញាំ​ម្ហូបឆ្ញាញ់ នៅ​បឹង​ឈូក​ថ្មី




តោះ! ច្រៀង​លេង ស្តាប់​តន្រ្តី ស្ទូចត្រី ញាំ​ម្ហូបឆ្ញាញ់ នៅ​បឹង​ឈូក​ថ្មី

អាហារដ្ឋាន បឹង​ឈូក​ថ្មី ទី​សម្រាក​កម្សាន្ត​ដ៏​ស្រស់ត្រកាល លាក់​ខ្លួន​ក្បែរ​ទីក្រុង កំពុង​ទាក់ទាញ​អ្នក​ខ្ជិល​ដើរ​លេង​ផ្លូវ​ឆ្ញាយ មក​លម្ហែ​កាយ​នៅ​ក្រុង​តាខ្មៅ ញាំ​ម្ហូបខ្មែរ គេង​ក្នុង​ក្យូស ស្តាប់​តន្រ្តី ច្រៀង​លេង បំបាត់​ស្ត្រេស​ឲ្យ​អស់​ពី​ខួរ​ក្បាល។

ម្ចាស់​អាហារដ្ឋាន បឹងឈូកថ្មី ឈ្មោះ ឈឿន ចាន់ថន អាយុ ៣០ ឆ្នាំ បាន​រៀបរាប់​ប្រាប់ ភ្នំពេញ ប៉ុស្តិ៍ ពី​ថា «ពី​មុន​ទីនេះ​ ជា​បឹង​រាំង​ទេ តែ​ពេល​ខ្ញុំ​មក​ទីនេះ ខ្ញុំ​គិត​ចង់​ផ្លាស់ប្ដូរ​មក​ដាំឈូក​វិញ ព្រោះ​គិត​ថា​ឈូក​ជា​រុក្ខជាតិ​ស្អាត ណា​មួយ​ផ្កា​ឈូក​គេ​យក​ថ្វាយ​ព្រះ វា​មាន​ន័យ​ថា​ល្អ ហើយ​ខ្ញុំ​គិត​ថា​វា​អាច​ទាក់ទាញ​ភ្ញៀវ​បាន»។

ជា​អ្នក​ចូលចិត្ត​ស្ទូចត្រី និង​ដើរ​កម្សាន្ត​តាម​រមណីយដ្ឋាន​នានា ម្ចាស់​អាហារ​ដ្ឋាន អាយុ ៣០ឆ្នាំ​នេះ បាន​យក​បទពិសោធន៍​ដែល​ខ្លួន​ទៅ​ដើរ​លេង​គ្រប់​ទីកន្លែង​នោះ មក​បូក​បញ្ជូល​គ្នា យក​មក​ច្នៃ​នៅ​ទីតាំង​របស់​ខ្លួន និង​រិះរក​គំនិត​ថ្មី​មក​តែង​ឲ្យ​កាន់​តែ​ទាក់ទាញ ដើម្បី​ឲ្យ​ភ្ញៀវ​ទទួល​បាន​អារម្មណ៍​ប្លែក។

លោក ចាន់ថន បាន​ឲ្យ​ដឹង​ថា៖ «ខ្ញុំ​ចាប់​អារម្មណ៍​កន្លែង​គេ​មាន​បេន ខ្ញុំ​មាន​គំនិត​មួយ គឺ​ដាក់​បេន​លើ​ទឹក​ ដើម្បី​ឱ្យ​ប្លែក ហើយ​ផ្លូវ​ដើរ​របស់​ហាង​ខ្ញុំ គឺ​ធ្វើ​ស្ពាន​ឆ្លង​ទៅ​កាន់​ក្យូស​ក៏​មាន​លក្ខណៈ​រាង​ខុស​គេ​បន្តិច​ដែរ មួយទៀត​យើង​ឌីហ្សាញ​ក្នុង​ក្យូស​មាន​ដៃ​ផ្កា មាន​របង​ដែក ហើយ​បើ​ពេល​យប់​វិញ​ស្រស់​ស្អាត​ណាស់ ព្រោះ​យើង​ដាក់​ភ្លើង ហើយ​វា​ឆ្លុះ​ចូល​ទៅ​ផ្ទៃ​ទឹក​របស់​បឹង​ឈូក ធានា​ថា​ប្លែក​អារម្មណ៍»។

បើក​ដំណើរការ​រយៈពេល ៥ ខែ អាហារដ្ឋាន បឹងឈូកថ្មី ទទួល​បាន​ភ្ញៀវ​ច្រើន​ប្រមាណ​ជាង ១០០ នាក់ ក្នុង​មួយ​ថ្ងៃៗ ចំណែក​ចុង​សប្តាហ៍ ទីនេះ​ស្ទើ​រក​កន្លែង​អង្គុយ​សម្រាក​ញាំ​អាហារ​សឹង​មិន​បាន ដែល​ក្យូស​អង្គុយ​នីមួយៗ ​អាច​ទទួល​ភ្ញៀវ​បាន​ប្រមាណ​ ១០ នាក់។

បើក​ទទួល​ភ្ញៀវ​ចាប់​ពី ៨ ព្រឹក ដល់​ម៉ោង​ ១១ យប់ បឹងឈូកថ្មី មាន​ទីតាំង​ធំទូលាយ លើ​ផ្ទៃដី​ប្រមាណ​ជិត​កន្លះ​ហិកតា មាន​សន្តិសុខ​ សុវត្ថិភាព និង​ធានា​មិន​បាត់​បង់​ទ្រព្យ​សម្បិត្ត​ភ្ញៀវ ជាពិសេស​មាន​បឹង​ឈូក​ធម្មជាតិ​យ៉ាង​ស្រស់​ស្អាត ទំហំ​ជាង ៣ ០០០ ការ៉េ រដូវ​វស្សា​មាន​ជម្រៅ ៤ ទៅ ៥ ម៉ែត្រ ប៉ុន្តែ​រដូវ​ប្រាំង​នៅ​សល់​ជម្រៅ​ជាង ២ ម៉ែត្រ។ បឹង​នេះ សម្បូរ​ទៅ​ដោយ​ត្រី​ជា​ច្រើន​ប្រភេទ​ដួច​ជា៖ ត្រីប្រា ត្រីអន្តែង ត្រីរ៉ស ត្រូព្រួល ត្រី​ទីឡាបយ៉ា ត្រី​ក្រហម និង​ត្រី​ជា​ច្រើន​ទៀត។ ភ្ញៀវ​ក៏​អាច​ជួល​សន្ទូច​ស្ទូច​ត្រី​លេង​កម្សាន្ត​តម្លៃ ៥ ០០០ រៀល រួម​ជាមួយ​នុយត្រី ហើយ​ត្រី​ដែល​ស្ទូច​បាន​មាន​តម្លៃ ៣ ដុល្លារ ក្នុង ១ គីឡូ។

ម្ហូប​ពិសេសៗ ប្រចាំ​ហាង​មាន​ដូចជា មាន់ដុត តម្លៃ ៦ ម៉ឺនរៀល ម្ជូរ​គ្រឿង​ឆ្អឹង​ជំនី តម្លៃ ៣ ម៉ឺន ៥ ពាន់រៀល សម្លរ​ម្ជូរ​បឹង​ឈូក​តម្លៃ ៣ ម៉ឺនរៀល ត្រីដុត​តម្លៃ ៣ ម៉ឺន​រៀល និង​មាន​ម្ហូប​ឆា​តម្លៃ ២ ម៉ឺន រៀល ដល់ ២ ម៉ឺន ៥ ពាន់រៀល និង​មាន​ម្ហូប​ខ្មែរ​ជាច្រើន​ទៀត​ដូចជា ខ្យង​បឹង សាច់គោ​អាំង​ប្រហុក​ឆៅ និង​កំពឹស​បុក​ចេក​ខ្ចី​ជា​ដើម។

លោក ឈឿន ចាន់ថន បាន​ឲ្យ​ដឹង​ថា «ម្ហូប​យើង ភ្ញៀវ​សរសើរ​ថា សេវាកម្ម​បម្រើ​ល្អ ហើយ​ម្ហូប​ឆ្ញាញ់ ព្រោះ​យើង​ធ្វើ​ភ្លាមៗ អត់​ធ្វើ​ទុក​ទេ ចឹង​ពេល​ខ្លះ​មាន​ភ្ញៀវ​ច្រើន យើង​ចេញ​ម្ហូប​យឺត​បន្តិច តែ​យើង​នឹង​កែប្រែ​ចំនុច​នេះ​បន្ថែម»។

អាហារដ្ឋាន បឹងឈូកថ្មី មាន​ទីតាំង​នៅ​ជិត​ក្រវ៉ាត់​ក្រុង​ភ្នំពេញ ស្ថិត​នៅ​ភូមិ​កោះក្របី សង្កាត់​ព្រែក​ថ្មី ខណ្ឌ​ច្បារអំពៅ ដែល​ធ្វើ​ដំណើរ​ចុះ​ពី​ស្ពាន​ព្រែក​សំរោង​ប្រមាណ ៥០០ ម៉ែត្រ ខាង​ឆ្វេង​ដៃ និង​ប្រមាណ ៣ គីឡូម៉ែត្រ ពី​ក្រុង​តាខ្មៅ។ ទាក់ទង​តាម​លេខ​ទូរស័ព្ទ៖ ០៩៨ ៨៨០ ៨៦៨/០៧១ ២០៩ ៨៦៨ ៦ ឬ​ហ្វេសប៊ុក បឹងឈូកថ្មី៕