The Phnom Penh Post Search

Search form




Logo of Phnom Penh Post newspaper Phnom Penh Post - ថត​រូប​ស្អាតៗ ក្បែរ​ធម្មជាតិ​មាត់​ទន្លេ និង​ភ្លក្ស​ម្ហូប​ខ្មែរ នៅ​អាហារដ្ឋាន​ស្មៅ​ទន្ល

ថត​រូប​ស្អាតៗ ក្បែរ​ធម្មជាតិ​មាត់​ទន្លេ និង​ភ្លក្ស​ម្ហូប​ខ្មែរ នៅ​អាហារដ្ឋាន​ស្មៅ​ទន្ល

កំពង់ចាម៖ ស្មៅ​ទន្លេ គឺ​ជា​អាហារដ្ឋាន​មួយ​ស្ថិត​នៅ​ក្នុង​ខេត្ត​កំពង់ចាម ដែល​បម្រើ​សេវាកម្ម​ម្ហូប​ខ្មែរ តម្លៃ​សមរម្យ ដែល​ភ្ញៀវ​អាច​សម្រាក​លម្ហែ ស្រូប​ខ្យល់​អាកាស​ធម្មជាតិ គយគន់​ទេសភាព​ដង​ទន្លេ​មេគង្គ​កំពង់ចាម និង​ថតរូប​លេង​ស្អាត​ជាមួយ​នឹង​ការ​កែច្នៃ​ទីតាំង​ប្លែកៗ។

ខុស​ប្លែក​ពី​មនុស្ស​ទូទៅ​ដែល​ចូលចិត្ត​សមុទ្រ លោក ប៉េង ឈុន ម្ចាស់​អាហារដ្ឋាន​ស្មៅ​ទន្លេ បែរ​ជា​អ្នក​ចូលចិត្ត​ទេសភាព នឹង​សម្រស់​ដង​ទន្លេ​មេគង្ក​ស្ថិត​នៅ​ក្នុង​ខេត្ត​កំពង់ចាម​នេះ​បាន​បញ្ជាក់​ថា «ខ្ញុំ​ឃើញ resort មួយ​ចំនួន​បាន​បង្កើត​នៅ​តាម​សមុទ្រ ជា​ជាង​ទន្លេ ពេល​នោះ​ខ្ញុំ​សញ្ជឹង​គិត​ថា ទន្លេ​មាន​លក្ខណៈ​ពិសេស​របស់​ទន្លេ ចឹង​ខ្ញុំ​ត្រូវ​តែ​ធ្វើ​អ្វី​មួយ​ដែល​បង្ហាញ​ពី​ខេត្ត​ខ្ញុំ ​ក៏​ដូច​ជា​ទន្លេ​ក្នុង​ខេត្ត​ខ្ញុំ​ដែរ ចឹង​បាន​ពេល​បង្កើត​ខ្ញុំ មាន​សរសេរ​ពាក្យ​ថា ខ្ញុំ​ស្រលាញ់​ទន្លេ​មេគង្គ​កំពង់ចាម ហើយ​ខ្ញុំ​ក៏​ចង់​បង្ហាញ​ថា ទន្ល​មាន​ប្រយោជន៍​ច្រើន​ទៀត​ក្រៅ​ពី​វិស័យ​កសិកម្ម យើង​ក៏​អាច​ទាញ​ប្រយោជន៍​ក្នុង​វិស័យ​ទេសចរណ៍​បាន​ផង​ដែរ»។

អាហារដ្ឋាន​ស្មៅ ទន្លេ បម្រើ​អាហារ​ពីរ​ពេល​ដូច​ជា អាហារ​ថ្ងៃ​ត្រង់ និង​អាហារ​ពេល​ល្ងាច ដោយ​ចាប់​បើក​ដំណើរការ​ពី​ម៉ោង ១០ ព្រឹក រហូត​ដល់​ម៉ោង ១០ យប់។ កន្លែង​ពិសារ​អាហារ​ចែក​ចេញ​ជា ៣ កន្លែង​រួម​មាន៖ បន្ទប់​ម៉ាស៊ីន​ត្រជាក់ បម្រើ​សម្រាប់​តែ​អាហារ​ថ្ងៃ​ត្រង់​តែ​ប៉ុណ្ណោះ។ ចំណែក​កន្លែង ២ ទៀត ជា​ប្រភេទ កន្លែង​ញាំ​អាហារ​នៅ​ខាង​ក្រៅ​មាន​ដំបូល និង​អត់​ដំបូល ដែល​ប៉ះ​ផ្ទាល់​ជាមួយ​ខ្យល់​ធម្មជាតិ​បរិសុទ្ធ។

ម្ហូប​ប្រចាំ​ស្មៅ​ទន្លេ​មាន​ដូច​ជា៖ ប្រហុក​ខ្ទិះ តម្លៃ ១៨ ០០០ រៀល កង្កែប​បំពង តម្លៃ ២២ ០០០ រៀល ស្ញោរ​ជ្រក់​ត្រីឆ្តោក តម្លៃ ៣២ ០០០ រៀល ឆ្អឹង​ជំនី​ជ្រូក​បំពង​ខ្ទឹម​ស តម្លៃ ១៨ ០០០ រៀល ភ្លា​ម្រះ​សាច់​ត្រី ១៨ ០០០ រៀល។

លោក ប៉េង ឈុន បញ្ជាក់​ថា «អាហារដ្ឋាន​ស្មៅ​ទន្លេ ផ្តោត​សំខាន់​ទៅ​លើ​ភាព​សមរម្យ ដូចជា​កត្តា​អនាម័យ រសជាតិ និង​សេវាកម្ម​ជា​ដើម។ កន្លង​មាន​ការ​ភ័ន្ត​ច្រឡំ​ថា អាហារដ្ឋាន​ស្មៅ​ទន្លេ ជា​អាហារដ្ឋាន​បរទេស និង​មាន​តម្លៃ​ថ្លៃ តាម​ពិត​មិន​មែន​ទេ ខ្ញុំ​បង្កើត​ឡើង​ដើម្បី​អ្នក​ស្រុក​ភូមិ​ខ្ញុំ និង​ខេត្ត​ខ្ញុំ ដូចនេះ​ទីតាំង​សម្រាប់​ប្រជាជន​ទាំង​អស់ និង​មាន​តម្លៃ​សមរម្យ អត់​ថ្លៃ​ទេ»។

សម្រាប់​ការ​ថតរូប​លេង​កម្សាន្ត សម្រាប់​ភ្ញៀវ​ដែល​មក​ញាំ​អាហារ គឺ​ឥតគិត​ថ្លៃ សម្រាប់​ភ្ញៀវ​ដែល​ចង់​ថតរូប​លេង​តម្លៃ​ត្រឹម​តែ ២ ០០០ រៀល​តែ​ប៉ុណ្ណោះ។ ក្នុង​មួយ​ថ្ងៃ​ភ្ញៀវ ដែល​មក​កម្សាន្ត​នៅ​អាហារដ្ឋាន​ស្មៅ​ទន្ល មាន​ប្រមាណ​ជាង ២០០ នាក់។

សម្រាប់​ការ​ឌីហ្សាញ​ទីតាំង​សម្រាប់​ថតរូប ម្ចាស់​អាហារដ្ឋាន​ខាង​លើបញ្ជាក់​ថា «ថ្ងៃ​មួយ​ខ្ញុំ​ឃើញ មិត្តភក្តិ​ទៅ​លេង​នៅ​បរទេស ពេល​នោះ​ខ្ញុំ​គិត​ថា បើ​យក​ទេសភាព​ទាំង​នោះ​មក​ច្នៃ​នៅ​ស្មៅ​ទន្លេ​ប្រហែល​ជា​ស្អាត ខ្ញុំ​គិត​ថា​ខ្ញុំ​អាច​ធ្វើ​បាន ពេល​នោះ​ខ្ញុំ​ស្វែងរក​ព័ត៍មាន ដើម្បី​យក​គំនិត​ទាំង​នោះ​មក​ច្នៃ​នៅ​ទីនេះ ហើយ​សម្រាប់​គ្រឿង​ផ្សំ​កន្លែង​ថតរូប​វិញ គឺ​ខ្ញុំ​យក​ចេញ​ពី​ធម្មជាតិ និង​វត្ថុ​នៅ​ជុំវិញ​នេះ​ទាំង​អស់ ដូចជា​ព្រៃ​ត្រែង​ជាដើម»។

នាពេល​ខាង​មុន ម្ចាស់​អាហារដ្ឋាន​រូប​នេះ នឹង​ច្នៃ​ទិដ្ឋភាព​នៅ​ទីនេះ​ពេល​រាត្រី​ឲ្យ​កាន់​តែ​ប្រសើរ​ឡើង ដើម្បី​អាច​ឲ្យ​ភ្ញៀវ​ថតរូប​លេង​កម្សាន្ត​បាន​ទាំង​ពេល​ថ្ងៃ និង​យប់។

អាហារដ្ឋាន​ស្មៅ​ទន្ល ស្ថិត​នៅ​ក្នុង​ភូមិ​ទី ២ ឃុំ​វាលវង់ ក្រុង​កំពង់ចាម ខេត្ត​កំពង់ចាម ចម្ញាយ​ប្រមាណ ៣០០ ម៉ែត្រ ពី​គល់​ស្ពាន​គីសូណា និង​នៅ​ជិត​ចុះទៅ​ស្ពាន​ប្រដឹស​កោះប៉ែន។ ទាក់ទង​ទូរសព្ទ ០១១ ៩២ ២៥ ២២ និង​ហ្វ៊េសប៊ុក ស្មៅ​ទន្លេ៕