The Phnom Penh Post Search

Search form

Logo of Phnom Penh Post newspaper Phnom Penh Post - ទំនប់​ទឹក​ដំណាក់​អំពិល​ផុត​បុណ្យ​ចូល​ឆ្នាំ អស់​ភ្ញៀវ​សល់​តែ​អ្នក​នេសាទ




ទំនប់​ទឹក​ដំណាក់​អំពិល​ផុត​បុណ្យ​ចូល​ឆ្នាំ អស់​ភ្ញៀវ​សល់​តែ​អ្នក​នេសាទ

ពោធិ៍សាត់: បើ​ទោះ​បី​មិន​មែន​ជា​រមណីយដ្ឋាន​ដែល​ចុះ​បញ្ជី​ផ្លូវការ​ពី​មន្ទីរ​ទេសចរ​ខេត្ដ​យ៉ាង​ណា​ក៏​ដោយ ទំនប់​ទឹក​ដំណាក់​អំពិល​ស្វាគមន៍​ភ្ញៀវ​ទេសចរ​ជាតិ​ដ៏​ច្រើន​ណែន​ណាន់​តាន់​តាប់​រាប់​រយ​ពាន់​នាក់​ក្នុង​រដូវបុណ្យ​ចូល​ឆ្នាំ​ចិន និង​ឆ្នាំថ្មី​ប្រពៃណី​ជាតិ​ខ្មែរ ស្ទើរ​តែ​លែង​មើល​ឃើញ​ទឹក។ ទំនប់​ទឹក​ខែ​សម្រក​ដែល​រំលេច​ពន្លក​ថ្ម​ឆ្លាស់​ដូច​ក្រឡា​អុក​ដ៏​គួរ​ឲ្យ​គយគន់ និង​អង្គុយ​លេង ប្រែ​ក្លាយ​ជា​ទី​កម្សាន្ដ​ស្ងាត់​ជ្រងំ​ភ្លាមៗ​ក្រោយ​ពី​ពិធី​បុណ្យ​ទាំង​ពីរ​បាន​បញ្ចប់។

មិន​ខុស​អីពី​តួឯក​ប្រុស និង​តួឯក​ស្រី​ក្នុង​រឿង​ទិព្វ​សុដាច័ន្ទ​ដែល​មាន​ឱកាស​បាន​ជួប​មុខ​គ្នា​តែ​ម្ដង​គត់​ក្នុង​មួយ​ឆ្នាំ​នា​រដូវ​ផ្ការីក ទស្សនីយ​ភាព​ភ្ញៀវ​ទេសចរ​ភ្លូក​ទឹក​ភ្លូក​ដី​នៅ​ទំនប់​ទឹក​ដំណាក់​អំពិល​ហាក់​បាន​កើត​ឡើង​តែ​ម្ដង ឬ​ពីរ​ដង​ប៉ុណ្ណោះ​ក្នុង​មួយ​ឆ្នាំ។

ធ្វើ​ដំណើរ​ចេញ​ពី​ក្រុង​ពោធិ៍សាត់​ឆ្ពោះ​ទៅ​កាន់​បូជណីយដ្ឋាន​ប្រវត្ដិសាស្ដ្រ​អ្នក​តាឃ្លាំង​មឿង​ស្ថិត​ក្នុង​ភូមិ​ បន្ទាយ​ជ័យ​ ឃុំ​ស្នាម​ព្រះ​ ស្រុក បាកាន ចំណាយ​ប្រមាណ ៧ គីឡូម៉ែត្រ លោក​អ្នក​នឹង​បាន​ឃើញ​ទំនប់​ទឹក​ដ៏​ធំ​ល្វឹង​ល្វើយ​មួយ​ដែល​មាន​តួនាទី​ទប់​ទឹក​សម្រាប់​ប្រជាពលរដ្ឋ​ប្រើ​ប្រាស់​ស្ថិត​ក្នុង​ភូមិ​ដំណាក់​អំពិល ឃុំ​បាក់​ចិញ្ចៀន ស្រុក​ភ្នំក្រវាញ ខេត្ដ​ពោធិ៍សាត់។