The Phnom Penh Post Search

Search form




Logo of Phnom Penh Post newspaper Phnom Penh Post - បឹងហ្គាឡូធម្មជាតិ ផ្ទះស្នាក់ស្ញប់ស្ញាត់ ព័ទ្ធដោយធម្មជាតិជាប់ព្រែកកំពត

បឹងហ្គាឡូធម្មជាតិ ផ្ទះស្នាក់ស្ញប់ស្ញាត់ ព័ទ្ធដោយធម្មជាតិជាប់ព្រែកកំពត

កំពត៖បឹងហ្គាឡូ​ធម្មជាតិ ផ្ទះ​ស្នាក់​ស្ញប់ស្ញាត់ ព័ទ្ធ​ដោយ​ធម្មជាតិ​ជាប់​ព្រែក​កំពតឈរ​បង្ហាញ​ខ្លួន​ជាប់​មាត់​ព្រែក​កំពត បឹងហ្គាឡូ​ធម្មជាតិ​ជា​ទីកន្លែង​ស្នាក់នៅ​លំហែ​កាយ​ដ៏​ល្អ​សាកសម​សម្រាប់​អ្នក​ចូលចិត្ត​ភាព​ស្ញប់ស្ញាត់ ​ស្រលាញ់​ធម្មជាតិ និង​ក្រេប​ក្លិន​បុប្ជា​ចម្រុះ​ពណ៍ ក្រោម​ជំនោរ​ខ្យល់​ត្រជាក់​ចិត្ត​រួម​ជាមួយ​នឹង​បន្ទប់​ស្នាក់​នៅ​យ៉ាង​ស្រស់​ស្អាត​រចនា​ប្លែកៗ​គ្នា​ជា​ច្រើន។

លោកស្រី មុនី ខន្តី ម្ចាស់​ផ្ទះ​ស្នាក់​បឹងហ្គាឡូ​ធម្មជាតិ​បាន​ប្រាប់​ភ្នំពេញ ប៉ុស្តិ៍ ថា៖ «ការ​បង្កើត​ហ្នឹង​បាន​រយៈពេល ៧ ឆ្នាំហើយ ខ្ញុំ​អត់​បាន​ធ្វើ​ម្តង​ទាំង​អស់​ទេ ខ្ញុំ​បង្កើត​ម្តង​តិចៗ ម្តង​មួយ​បឹងហ្គាឡូៗ ហើយ​មក​ដល់​ពេល​ហ្នឹង យើង​នៅ​តែ​បន្ត​ធ្វើ​វា​ទៀត ដូច​តិច​ទៀត​ហ្នឹង​យើង​នឹង​ធ្វើ​អាង​ហែល​ទឹក​ទៀត»។

ជា​មនុស្ស​ស្រលាញ់​ធម្មជាតិ និង​ចូលចិត្ត​ផ្កា លោកស្រី ខន្តី បាន​ដាំ​ផ្កា​ជា​ច្រើន​ដើម្បី​លម្ហ​ទីតាំង​របស់​ខ្លួន ឲ្យ​សាមសម​ជាមួយ​នឹង​ឈ្មោះ​បឹងហ្គាឡូ​ធម្មជាតិ ដែល​មាន​ដូច​ជា៖ ផ្កា​រំយោល ផ្កា​កែវ ផ្កា​សារិកា ផ្កា​ថ្កុល ផ្កា​កំភ្លឹង ផ្កា​រំដួល ផ្កា​សាគូរ៉ា ផ្កា​បក្សីសួគ៌jampei red jampei white ផ្កា​អង្អាបុស្ស ផ្កា​យុថូ ។

ចំណែក​ប្រភេទ​ដើម​ឈើ​មាន​ដូច​ជា៖ ដើម​នាងនួន ដើម​មេជ័រ ដើម​មៀន ដើម​ត្របែក​ព្រៃ ដើម​ផ្ញៀវ ដើម​ជំពូ ដើម​រាំងទឹក ដើម​រាំងភ្នំ ដើម​ស្ពឺ ដើម​ដូង ដើម​ត្នោត ដើម​ស្វាយ ដើម​អំពិល ដើម​ស្លាយក្ស ដើម​ស្លា​ស្រុក ស្លា​ព្រៃ ស្លា​ក្ងាន ដើម​អន្សែ ដើម​ក្ងោក ដើម​កាប៉ាង ដើម​ស្នាយ​ជាដើម។

ម្ចាស់​បឹងហ្គាឡូ​ធម្មជាតិ​រូប​នេះ រៀប​រាប់​ទៀត​ថា៖ «កន្លែង​យើង​មាន​ទីតាំង​ល្អ​នៅ​ជាប់​មាត់​ព្រែក​កំពត ហើយ​ភ្ញៀវ​អាច​ទស្សនា​ទេសភាព​ស្អាត​នៅ​ទឹក​ដី​កំពត​នេះ ដូចជា​ទេសភាព​ដង​ព្រែក សត្វ​ស្លាប ហើយ​មើល​ឃើញ​ជួរ​ភ្នំ​បូកគោ ហើយ​អាច​មើល​ថ្ងៃរះ ថ្ងៃ​លិច​ស្អាត​ណាស់ ហើយ​យប់​ឡើង​ភ្ញៀវ​អង្គុយ​កំសាន្ត​អាំង​គ្រឿង​សមុទ្រ​នៅ​លើ​ក្យូស​មាត់​ទឹក​របស់​យើង​បាន​ទៀត»។

បឹងហ្គាឡូ​ធម្មជាតិ​មាន​បន្ទប់​សម្រាក​សរុប​ចំនួន​ ២២ បន្ទប់​ដូចជា បន្ទប់​គ្រែ​មួយ​មាន ៩ បន្ទប់ តម្លៃ​ចាប់​ពី ៤០ ដុល្លារ ដល់ ៦០ ដុល្លារ បន្ទប់​គ្រែ​ពីរ​មាន ៩ បន្ទប់ តម្លៃ​ចាប់​ពី ៥ ដុល្លារ ដល់ ៧០ ដុល្លារ​ បឹងហ្គាឡូ​មាន​បី​ផ្ទះ តម្លៃ ៧៥ ដុល្លារ និង​បន្ទប់​ស្វីតស៊ីវ្យូរ ១ បន្ទប់ តម្លៃ ១១៥ ដុល្លារ។

ចាប់​បើក​ពី​ម៉ោង ៧ ព្រឹក ដល់​ម៉ោង ១១ យប់ ផ្ទះ​ស្នាក់ បឹងហ្គាឡូ​ធម្មជាតិ​ទទួល​បាន​ភ្ញៀវ​មក​សម្រាក​លម្ហែ​ច្រើន​នា​ថ្ងៃ​សៅរ៍ និង​អាទិត្យ រួម​មាន​ទាំង​ភ្ញៀវ​ខ្មែរ និង​បរទេស។ ក្រៅ​ពី​ផ្ទះ​ស្នាក់ ទីនេះ​ក៏​ភោជនីដ្ឋាន​បំរើ​ម្ហូប​អាហារ​ខ្មែរ​ និង​​បរទេស​ជា​ច្រើន​មុខ​ផង​ដែរ។

បឹងហ្គាឡូ​ធម្មជាតិ មាន​ទីតាំង​នៅ​ជិត​ស្ពាន​កំពង់​បាយ ប៉ែក​ខាង​កើត​ប្រមាណ​ជាង ១០០ ម៉ែត្រ ស្ថិត​ក្នុង​ភូមិ​កំពង់​បាយ​ខាង​ជើង ឃុំ​កំពង់បាយ ស្រុក​កំពត ខេត្ត​កំពត។ ទូរស័ព្ទ​ទំនាក់ទំនង៖​ ០១២ ៨១៩០៨១/០៣១ ២៨ ​១៩ ​០៨១ ឬ​ហ្វេសប៊ុក Natural Bungalows។