The Phnom Penh Post Search

Search form




Logo of Phnom Penh Post newspaper Phnom Penh Post - ប្រវត្តិ​បុណ្យ​មាឃបូជា




ប្រវត្តិ​បុណ្យ​មាឃបូជា

ភ្នំពេញ៖ បុណ្យ​មាឃ​បូជា​ប្រារព្ធ​ឡើង​ដើម្បី​រំលឹក​ដល់​ថៃ្ង​ដែល​ព្រះ​សម្មាសម្ពុទ្ធ​ទ្រង់​ប្រកាស​បង្កើត​ព្រះពុទ្ធ​សាសនា នា​ប្រទេស ឥណ្ឌា កាល​ពី ៥៨៨ ឆ្នាំ​មុន​គ្រឹស្ត​សករាជ ដែល​ត្រូវ​នឹង​ថៃ្ងទី ១៥ កើត ខែមាឃ ក្រោយ​ពី​ការ​ត្រាស់​ដឹង​របស់​ព្រះអង្គ​ចំនួន ៩ ខែ​គត់។

បុណ្យ​មាឃ​បូជា ធ្វើ​ឡើង​ក្នុង​គោល​បំណង​ចំបង​ចំនួន ៣ រួម​មាន៖ រំឭក​ដឹង​គុណ​ដល់​ព្រះ​សម្មាសម្ពុទ្ធ​ដែល​បាន​ត្រាស់​ដឹង និង​បាន​សម្ដែង​ឱវាទបាតិ​មោក្ខ​ឱ្យ​សត្វ​លោក​បាន​យល់​ដឹង​ពី​ផ្លូវ​ត្រូវ​ក្នុង​ការ​ស្វែងរក​សេចក្ដី​សុខ​ក្នុង​ជីវិត។

រំឭក​ដល់​ការ​ជួប​ប្រជុំ​ដោយ​ឯក​ឯង​គ្មាន​ការ​ណាត់​គ្នា​ទុក​មុន របស់​ព្រះ​អរហន្ត ១ ២៥០អង្គ ដែល​ព្រះ​សម្មាសម្ពុទ្ធ បំបួស​ដោយ​ព្រះពុទ្ធ​អង្គ​ផ្ទាល់។ នឹង​រំលឹក​ដល់​ថ្ងៃ​ដែល​ព្រះអង្គ​ដាក់​ព្រះជន្មាយុ​​សង្ខារ ៣ ​ខែ​​ទៀត​ ​ដែល​ព្រះ​សម្មាសម្ពុទ្ធ​នឹង​បរិនិព្វាន។

កម្មវិធី​ក្នុង​ពិធី​បុណ្យ​មាឃ​បូជា មាន​ដូចជា៖ ពេល​ព្រឹក៖ ការ​ប្រារព្ធ​ពិធី​នៅ​ព្រះ​​សក្យ​មុនីចេតិយ ជា​ទី​តម្កល់​ព្រះ​បរម​សារីរិកធាតុ​ព្រះ​សម្មាសម្ពុទ្ធ និង​នៅ​តាម​វត្ត​អារាម ដូច​ជា​ថ្វាយ​ផ្កា​បូជា​ព្រះពុទ្ធ ឬ​យក​ចង្ហាន់​ប្រគេន​ព្រះសង្ឃ។
ពេល​ថ្ងៃ​រសៀល៖ កម្មវិធី​ចម្រើន​ព្រះបរិត្ត និង​ស្ដាប់​ធម៌ទេសនា។

ពេល​ល្ងាច៖ ពិធី​ហែរ​ប្រទីប និង​ប្រទាក់​សិន​បូជា​ព្រះ​សម្មាសម្ពុទ្ធ​នៅ​ដើម​ពោធ៌ ឬ​ក៏​នៅ​ចេតិយ និង​ពិធី​បង្ហោះ​គោម។ ទន្ទឹម​នឹង​នេះ​ពុទ្ធ​បរិស័ទ​ទាំង​អស់ គប្បី​គោរព​តាម​ពុទ្ធ​ឱវាទ ដូច​ជា​នាំ​គ្នា​រក្សា​សីល រួម​មាន​សីល​ ៥ សីល​ ៨ ជា​ដើម​ឡើង​ទៅ។

កាល​ពី​ឆ្នាំ ២០១៩ រដ្ឋាភិបាល​កម្ពុជា បាន​សម្រេច​លុប​ចោល​ថ្ងៃ​ឈប់​សម្រាក​ចំនួន ៧ ថ្ងៃ នៃ​ថ្ងៃ​ឈប់​សម្រាក​ប្រចាំ​ឆ្នាំ ក្នុង​នោះ​ក៏​មាន​ពិធី​បុណ្យ​មាឃ​បូជា​ផង​ដែរ មូលហេតុ​ដោយសារ​តែ ប្រទេស កម្ពុជា មាន​ថ្ងៃ​ឈប់​សម្រាក​ច្រើន ដែល​ធ្វើ​ឲ្យ​មាន​ផល​លំបាក ទៅ​ដល់​ការ​រីក​ចម្រើន​លូតលាស់​សេដ្ឋកិច្ច​ជាតិ។

សូម​ប្រជាពលរដ្ឋ​ដែល​កាន់​ពុទ្ធសាសនា​ទាំង​អស់ ចូល​រួម​ក្នុង​ពិធី​បុណ្យ​មាឃ​បូជា ដែល​នឹង​ប្រារព្ធ​ឡើង​នៅ ថ្ងៃទី ៨ ខែ កុម្ភៈ ឆ្នាំ ២០២០ ខាង​មុខ។