តម្លៃរូបិយប័ណ្ណរបស់ប្រទេសម៉ាឡេស៊ីបានធ្លាក់ចុះមកត្រឹម៤.៤៥ រីងហ្គីតស្មើ១ដុល្លារក្នុងឆ្នាំ២០១៦ បានធ្វើឲ្យប៉ះពាល់ដល់ប្រាក់បៀវត្សរ៍របស់ពលករចំណាកស្រុកកម្ពុជាដែលមានប្រមាណជាង ៣ម៉ឺននាក់នៅក្នុងប្រទេសនេះ។ អ្នកស្រី ម៉មផុន ម៉ូនីតា ពលករធ្វើការរោងចក្រនៅប្រទេសម៉ាឡេស៊ី បានប្រាប់ភ្នំពេញប៉ុស្តិ៍ ក្នុងសិក្ខាសាលាស្ដីពីការស្រាវជ្រាវអំពីផលប៉ះពាល់នៃចំណាកស្រុកលើស្ត្រី និងកូនរបស់ពួកគាត់ថា «កាលពីមុន ៣០០ រីងហ្គីតស្មើ១០០ដុល្លារ ប៉ុន្តែឥឡូវ ៤៥០ រីងហ្គីតទើបស្មើ១០០ដុល្លារ មានន័យថាបើយើងទៅធ្វើការនៅហ្នឹងអត់មានផលចំណេញទេ!!»។ ក្រៅពីការធ្លាក់ចុះរូបិយប័ណ្ណម៉ាឡេស៊ី អ្នកស្រីក៏បានបន្ថែមថា ពលករកម្ពុជាដែលចំណាកស្រុកទៅធ្វើការនៅទីនោះក៏ជួបប្រទះនិងបញ្ហាអសន្តិសុខ និងមានការរឹតត្បិតសិទ្ធិមួយចំនួនផងដែរ។