បន្ទាប់ពីលោកនាយករដ្ឋមន្ត្រី ហ៊ុន សែន បានរិះគន់ខ្លាំងទៅលើមណ្ឌលព្រៃស្ពឺ អំពីការគ្រប់គ្រង ដោយចោទសួរថា «តើគួរបន្តដំណើរការ ឬត្រូវបិទចោល?»នោះ នៅថ្ងៃទី ២ ខែឧសភា ឆ្នាំ២០១៦ ជំនួបសាកសួររវាងរដ្ឋមន្ត្រីនិងប្រជាជនបានធ្វើឡើងក្រោមវត្តមាន លោក វង សូត រដ្ឋមន្ត្រីក្រសួងសង្គមកិច្ច រួមជាមួយនិងលោក ប៉ា សុជាតិវង្ស អភិបាលរាជធានីភ្នំពេញ។ នៅក្នុងជំនួបសួរសុខទុក្ខនោះផងដែរ ប្រជាជនមួយចំនួនធំក្នុងចំណោមប្រជាជនប្រមាណជាង ២០០នាក់ដែលត្រូវបានចាប់ខ្លួនបញ្ជូនទៅដាក់នៅមណ្ឌលសំចតសង្គមកិច្ចរាជធានីភ្នំពេញ ឬហៅថាមណ្ឌលព្រៃស្ពឺនេះ បានស្នើសុំឲ្យដោះលែងខ្លួន ក៏ព្រោះដោយសារតែស្ថានភាពរស់នៅ នៅទីនោះពិតពិបាករស់នៅមិនអាចទទួលយកបាន។