ទម្រង់ល្ខោនស្បែកធំគ្រោងចំណាយប្រមាណ១០ម៉ឺនដុល្លារក្នុងការដំឡើង ដើម្បីត្រៀមចេញសម្ដែងនៅខែមិនា ឆ្នាំ២០១៧ ខាងមុខ ក្នុងគោលបំណងថែរក្សាកេរដំណែលវប្បធម៌ជាតិ។ កាលពីថ្ងៃទី២៣ ខែមិថុនាឆ្នាំ២០១៦ ក្រុមសមាគមសិល្បៈល្ខោនគោកធ្លក បានដកស្រង់សំដែងឈុតមួយក្នុងរឿងរាមកេរ្តិ៍ ដែលជាឈុតហនុមានដុតក្រុងលង្កា ដើម្បីបង្ហាញដល់គ្រូៗ និងរៀមច្បងទស្សនា ស្វែងរកមតិរិះគន់កែតម្រូវ។ ស្បែកធំប្រៀបបានទៅនឹងដុំហ្វ៊ីលជារបកគំហើញរបស់ដូនតាខ្មែរមុនសម័យបដិវត្តន៍ឧស្សាហកម្មរបស់អឺរ៉ុប។ គំនិតច្នៃប្រឌិតនេះឆ្លុះបញ្ចាំងពីល្បឿននៃការរីកចម្រើនដល់កម្រិតកំពូលនៃសិល្បៈខ្មែរមុន មនុស្សលោកចេះផលិតឧបករណ៍យន្តទំនើបៗ។ ល្ខោនស្បែកធំជាការសម្ដែងសក្ការរឿងទេវកថា ដែលកាលជំនាន់នោះមានភាពមហស្ចារ្យដោយសារការសម្ដែងមានប្រើវង់ភ្លេងប្រគំអម និងការដុតបំពួនភ្លើងភ្លឺលេចជាស្រមោល ធ្វើឲ្យទស្សនិកជនរំជើបរំជួលប្រៀបបានទៅនឹងទស្សនាខ្សែភាពយន្តក្នុងរោងមហោស្រពនាសម័យបច្ចុប្បន្ន។ ល្ខោនស្បែកធំត្រូវបានដូនតាបង្រៀនតៗគ្នាពីមួយជំនាន់ទៅមួយជំនាន់ ប៉ុន្តែដោយសារសង្គ្រាម និងការវិវត្តទៅមុខឥតឈប់ឈរ បច្ចុប្បន្នល្ខោនដ៏ល្បីល្បាញនេះ ស្ទើរតែសាបរលាបកិត្យានុភាពរបស់ខ្លួនទាំងស្រុង បើទោះបីជាល្ខោននេះត្រូវបានចុះជា បេតិកភណ្ឌពិភពលោកអរូបិយរបស់អង្គការយូណេស្កូកាលពីឆ្នាំ ២០០៥ ហើយក៏ដោយ។