កណ្តាល៖ ស្រូបខ្យល់ធម្មជាតិតាមដងទន្លេបាសាក់ លម្ហែកាយលើក្យូស និងញាំអាហារសរីរាង្គស្រស់ៗនៅសួនកម្សាន្ត បងប្អូនសិត្បូ គឺជា ជម្រើសថ្មីសម្រាប់សម្រាកលម្ហែកាយ និងបន្ធូរអារម្មណ៍ តានតឹងមិនឆ្ងាយពីរាជធានីភ្នំពេញ។
លោក ប៉ាត់ ចំណាន ម្ចាស់សួនកម្សាន្តបងប្អូនសិត្បូ បានប្រាប់ភ្នំពេញប៉ុស្តិ៍ថា៖ «យើងបង្កើតទីនេះ គឺចង់ឲ្យបងប្អូននៅទីក្រុង និង អ្នកនៅម្តុំទីក្រុង តាខ្មៅ ឲ្យពួកគាត់បានសម្រាកលម្ហែអារម្មណ៍នៅថ្ងៃធម្មតា ឬ ចុងសប្តាហ៍ ម៉្យាងទៀត យើងបង្កើតទីនេះ ក៏មានបំណងផ្តល់ការងារ ឬប្រាក់កាសសម្រាប់បងប្អូន និង សិស្សនិសិត្សដែលនៅម្តុំនេះ ដែលអត់មានការងារធ្វើ អាចមកធ្វើការជាមួយយើងបាន»។
មានទីតាំងស្ថិតនៅជាប់មាត់ទន្លេ សួនកម្សាន្តនេះ មានខ្យល់អាកាសល្អបរិសុទ្ធ និងមានដើមឈើដុះព័ទ្ធជុំជិតត្រជាក់ត្រឈឹងត្រឈៃ ភ្ញៀវក៏អាចសម្រាកគយគន់សម្រស់ធម្មជាតិដុះអមច្រាំងទន្លេ មើលផ្ទៃទឹកទន្លេរេរាំរសាត់អណ្តែត និងការរស់នៅរបស់ប្រជានេសាទដែលផ្ញើជីវិតលើផ្ទៃជលសា។
ទើបដំណើការសាងល្បងបាន ៤ ខែ សួនកម្សាន្ត បងប្អូនសិត្បូ មានក្យូសសម្រាកកម្សាន្ត ដូចជា៖ ក្យូស VIP ឬ ក្យូសកោងចំនួន ១០ ទទួលភ្ញៀវបានចំនួន ២០ នាក់និងមានក្យូសធម្មតាចំនួន ៥០ ផ្ទុកភ្ញៀវបាន ២០ នាក់ និង មានក្យូសឬស្សីចំនួន ៤ ទទួលភ្ញៀវបានចំនួន ១០ នាក់។
បើកទទួលភ្ញៀវពីម៉ោង ៩ ព្រឹក ដល់ ៩ យប់ សួនកម្សាន្តនេះមានទីតាំងធំទូលាយងាយស្រួលចតយានយន្ត និងមានភាពស្ញប់ស្ងាត់ល្អ ដោយទទួលបានភ្ញៀវប្រមាណជាង ៣០០ នាក់ ជារៀងរាល់ថ្ងៃ។
លោក ប៉ាត់ ចំណាន បញ្ជាក់ថា៖ «ទើបបើកដំណើរការមែន តែយើងទទួលបានភ្ញៀវលើស ពីការរំពឹងទុក គឺភ្ញៀវអញ្ជើញមកច្រើន អញ្ចឹងពេលខ្លះយើងក៏មានចំណុចខ្វះខាតដែរ ដូចជា សេវាកម្មជាដើម តែយើងព្យាយាមកែប្រែចំណុចខ្វះខាតនោះ ឲ្យកាន់តែល្អប្រសើរវិញ»។
ម្ហូបពិសេសមានដូចជា៖ មាន់ដុតតម្លៃ ៤០០០០ រៀល មាន់ឆាក្តៅ មាន់ងាំងូវ មាន់ស្ញោរជ្រក់ ខ្យងអាំងអំបិលម្ទេស ខ្យងចំហ៊ុយទឹកប្រហុក ខ្យងឆាគ្រឿង កង្កែបអាំងអំបិលម្ទេស ចានតូចតម្លៃ ១៤០០០ រៀល និង ចានធំតម្លៃ ២៤០០០ រៀល ប្រហុកក្រសាំងដុត បន្លែស្រស់ តម្លៃ ១៥០០០ រៀល ត្រីដុតអំបិលនំបញ្ចុក តម្លៃ ២៤០០០ រៀល និងមានម្ហូបខ្មែររសជាតិឆ្ញាញ់ជាច្រើនមុខទៀត។
ម្ចាស់សួនកម្សាន្តខាងលើរៀបរាប់ថា «ខ្ញុំអះអាងថា តម្លៃម្ហូបនៅហាងខ្ញុំ គឺធូរថ្លៃមែនទែន ព្រោះខ្ញុំជាអ្នកចូលចិត្តដើរញាំ អញ្ចឹង ខ្ញុំដឹងតម្លៃកន្លែងផ្សេងៗ ហើយកន្លែងយើងព្យាយាមប្រើប្រាស់បន្លែសរីរាង្គដែលដាំក្នុងសួនផ្ទាល់ជាប់មាត់ទន្លេ ដូចជា ត្រកួន ស្លឹកក្រៃ ស្លឹកម្រុំ ស្លឹកតយ យើងកាត់បន្ថយរបស់មកពីទីផ្សារ ព្រោះរបស់នៅតាមទីផ្សារមួយចំនួនមានសារធាតុគីមី ដោយសារ យើងស្រឡាញ់សុខភាព និង ចង់ចូលរួមរក្សាបរិស្ថានផងដែរ»។
នាពេលអនាគត សួនកម្សាន្ត បងប្អូនសិត្បូ នឹងបង្កើតកន្លែងសម្រាប់ស្ទួចត្រី និងកន្លែងកម្សាន្ត ផ្សេងទៀត ដើម្បីធ្វើឲ្យសួនមួយនេះ កាន់តែមានភាពទាក់ទាញ និង ជាជម្រើសដែលភ្ញៀវ មិនអាចមើលរំលងបាន។
សួនកម្សាន្ត បងប្អូនសិត្បូ ស្ថិតនៅទល់មុខមណ្ឌលសុខភាពសិត្បូ ក្នុងភូមិកំពង់ព្រីង ឃុំសិត្បូ ស្រុកស្អាង ខេត្ត កណ្តាល ដោយធ្វើដំណើរតាមបណ្តោយផ្លូវ ២១A ចុះពីស្ពានព្រែកសំរោងត្រឹម ១៥ នាទី។ ទាក់ទងលេខទូរសព្ទ៖ 085 956 056 ឬហ្វេសប៊ុក៖ រមណីយដ្ឋានបងប្អូន សិត្បូ៕