ភ្នំពេញៈ នាព្រឹកមិញនេះ មន្ត្រីនគរបាលបានបញ្ជូនជនសង្ស័យ ៣ នាក់ ដែលត្រូវបានគេអះអាងថា ជាអ្នកវាយដំទៅលើអ្នកតំណាងរាស្ត្រ គណបក្សប្រឆាំងពីររូបឲ្យរងរបួសធ្ងន់ មកកាន់សាលាដំបូងរាជធានីភ្នំពេញ បន្ទាប់ពីអ្នកទាំងបីបានចេញមុខមកសារភាព កាលពីម្សិលមិញ។ នេះបើយោងតាមសេចក្តីប្រកាសព័ត៌មាន របស់អ្នកនាំពាក្យក្រសួងមហាផ្ទៃ។
ជនទាំង ៣ នាក់មានឈ្មោះ ចាយ សារិទ្ធ ភេទប្រុសអាយុ ៣៣ ឆ្នាំ មានលំនៅក្នុងសង្កាត់តាខ្មៅ ក្រុងតាខ្មៅ ខេត្តកណ្តាល ទី២ ឈ្មោះ ម៉ៅ ហឿន ភេទប្រុស អាយុ ៣៤ ឆ្នាំ មានលំនៅភូមិ ៥ ឃុំព្រែកខ្សាយ «ខ»ស្រុកពាមរក៍ ខេត្តព្រៃវែង និងទី ៣ ឈ្មោះ សុត វណ្ណនី ភេទប្រុស អាយុ ៤៥ ឆ្នាំ មានលំនៅភូមិព្រែករាំង.សង្កាត់កំពង់សំណាញ់ ក្រុងតាខ្មៅ ខេត្តកណ្តាល។