.jpg)
ភ្នំពេញ: នៅម្ដុំមេភ្លើង ហាងអាហារខ្មែរដែលទើបបើកបម្រើការបាន ២ សប្ដាហ៍មានអតិថិជនចូលទទួលទានច្រើនកុះករស្ទើរមិនគួរឲ្យជឿ។ តើអ្វីទៅជាអាថ៌កំបាំងធ្វើឲ្យភ្ញៀវចេញចូលហាងនេះមិនដាច់ដូច្នេះ?
ហាង «មាតុភូមិ ប្រហុក និងអន្លក់» បានរក្សាអត្តសញ្ញាណខ្មែរតាំងពីការចម្អិនម្ហូបអាហារ ការតុបតែង និងតន្ត្រីបុរាណចាក់កំដរភ្ញៀវ។
នៅខាងមុខហាងមានម្ហូបអាហារឆ្អិនស្រាប់តាំងពីប្រហុកគ្រឿងអាំង ម៉ាំឆាពោះវៀនតាន់ សម្លកកូរត្នោត សម្លម្ជូរពងត្រី និងបន្លែអន្លក់ស្រស់ៗតាមរដូវប្រមាណជា ៣០ មុខ។
អ្នកស្រី មាស ផានីដា ជាម្ចាស់ហាង និងជាចុងភៅចម្អិនអាហារដោយផ្ទាល់ដៃបាននិយាយថា៖ «ដំបូងឡើយ ដោយសារតែខ្លួនឯងមានជំនាញធ្វើម្ហូបរសជាតិខ្មែរពិតៗ និងចង់ឲ្យអ្នកដទៃទៀតបានភ្លក្ស អ៊ីចឹងហើយក៏សម្រេចចិត្តបើកហាងអាហារខ្មែរ និងដាក់ឈ្មោះ មាតុភូមិ នេះតែម្ដង ដើម្បីខុសប្លែកពីគេ»។
ម្ចាស់ហាងដែលមានបងប្អូនបីនាក់កើតក្នុងគ្រួសារនិយមម្ហូបម្ហាបែបខ្មែររូបនេះបានបញ្ជាក់ថា៖ «ខ្ញុំប្រកាន់ខ្ជាប់នូវការលក់តែម្ហូបខ្មែរ ដោយមិនបន្ថែមនូវម្ហូបបរទេសចូលនោះទេ គឺចង់បង្ហាញឲ្យខ្មែរយើងភាគច្រើនបានស្គាល់ពីម្ហូបខ្មែរ និងបន្តគាំទ្រម្ហូបជាតិយើងឲ្យបានច្រើន»។
ដោយឡែក សម្លម្ជូរពងត្រីស្លឹករមៀតនៅទីនេះមានតម្លៃ ១២០០០ រៀល។ ហាង មាតុភូមិ ប្រហុក និងអន្លក់ អាចទាក់ទងតាមទូរស័ព្ទលេខ ០៩៧ ៧៦ ៨៦ ៩៧៧៕
