នគរបាលខេត្តបន្ទាយមានជ័យបានឃាត់ខ្លួនពលរដ្ឋខ្មែរជិត ១០០ នាក់ ដែលបម្រុងឆ្លងដែនដោយខុសច្បាប់ទៅធ្វើការនៅប្រទេសថៃ ខណៈអាជ្ញាធរសូមឱ្យពលករស្របច្បាប់ដែលវិលទៅធ្វើការនៅប្រទេសថៃវិញ ត្រូវចូលទៅតាមច្រកព្រំដែនអន្តរជាតិ ដោយមានការបំពេញបែបបទត្រឹមត្រូវ។ អគ្គស្នងការដ្ឋាននគរបាលជាតិបានឱ្យដឹងថា ពាក់ព័ន្ធកិច្ចការព្រំដែននេះ ស្នងការនគរបាលខេត្តបន្ទាយមានជ័យលោក សិទ្ធិ ឡោះ បានដាក់ចេញនូវបទបញ្ជាទប់ស្កាត់រាល់បទល្មើសឆ្លងដែនខុសច្បាប់ ដូចជាបទល្មើសសេដ្ឋកិច្ច បទល្មើសគ្រឿងញៀន និងប្រជាពលរដ្ឋលួចឆ្លងដែនទៅប្រទេសថៃដោយខុសច្បាប់។