មន្ទីរសង្គមកិច្ចរាជធានីភ្នំពេញ និងដៃគូកំពុងរកវិធីជួយស្ដ្រីម្នាក់ជាមេម៉ាយកូន ៥ នាក់ បន្ទាប់ពីកូនស្រីគាត់ម្នាក់អាយុ ៥ ឆ្នាំ ត្រូវបានស្ដ្រីម្នាក់ដែលយកទៅចិញ្ចឹមប្រើហិង្សាធ្ងន់ធ្ងរ ខណៈគណៈកម្មការការពារកុមារថ្នាក់ជាតិនៃក្រុមប្រឹក្សាជាតិកម្ពុជា ដើម្បីកុមារ (ក.ជ.ក) ថ្កោលទោស និងស្នើឱ្យដាក់ទោសធ្ងន់ធ្ងរដល់ជនសង្ស័យ ។ ការថ្កោលទោសនេះបន្ទាប់ពីស្រី្តម្នាក់ឈ្មោះ ចាន់ ធីតា អាយុ ៣៧ ឆ្នាំស្នាក់នៅផ្ទះជួលលេខ ១៣ ផ្លូវ ២១៩ ក្នុងសង្កាត់ផ្សារដេប៉ូ ១ ខណ្ឌទួលគោក រាជធានី-ភ្នំពេញបានប្រើអំពើហិង្សាលើកុមារីឈ្មោះ កង ស្រីកា អាយុ ៥ ឆ្នាំ ដែលជាអ្នកបម្រើតាមផ្ទះ ពីថ្ងៃទី ២០ ខែឧសភា បន្ទាប់ពីសុំពីម្ដាយបង្កើតបាន ១ ឆ្នាំ។