ក្រុងម៉ៃអាមី៖ Saul Canelo Alvarez វាយឱ្យកីឡាករ Avni Yildirim របស់តួកគីបោះបង់ការប្រកួត ត្រឹមទឹកទី៣ ដើម្បីអាចការពារខ្សែក្រវាត់ទាំង ២ ស្ថាប័ន គឺ WBC និង WBA ក្នុងប្រភេទទម្ងន់ធ្ងន់លើមធ្យមបានសម្រេចកាលពីថ្ងៃសៅរ៍។
អ្នកប្រដាល់សញ្ជាតិម៉ិកស៊ិក Alvarez បានវាយសង្គ្រុបលើ Yildirim តាំងពីស្នូរជួងបន្លឺឡើងក្នុងទឹកទី១ ហើយដាល់ឱ្យអ្នកចង់ដណ្ដើមខ្សែក្រវាត់ដួលទៅលើសង្វៀនជាមួយការម៉ាត់ឆ្វេងស្ដាំចំផ្ទៃមុខពេញក្នុងទឹកទី៣ នៃការប្រកួតនៅឯកីឡដ្ឋាន Hard Rock នាក្រុងម៉ៃអាមី។
បន្ទាប់មក Yildirim វ័យ ២៩ ឆ្នាំ ដែលវាយចេញបានច្រើនជាង មិនអាចងើបចេញពីកន្លែងឱ្យទឹក ដើម្បីបន្តទឹកទី៤ បានដោយគ្រូបង្ហាត់សម្រេចមិនឱ្យប្រកួតបន្ត ដូច្នេះ ជ័យជម្នះជារបស់ Alvarez ដែលជាថ្មីម្ដងទៀត បង្ហាញឱ្យឃើញថា តើហេតុអ្វីរូបគេត្រូវបានចាត់ទុកថា ជាអ្នកប្រយុទ្ធប្រភេទទម្ងន់ផ្សេងគ្នាល្អបំផុតក្នុងវិស័យកីឡាប្រដាល់សកលនេះ។
Alvarez និយាយថា៖ «ខ្ញុំចង់បានការប្រកួតដ៏អស្ចារ្យមួយ នៅទីនេះ ហើយខ្ញុំបានធ្វើអ្វីដែលខ្ញុំត្រូវធ្វើហើយ។ ខ្ញុំចង់ឱ្យមានការសន្លប់ ហើយនោះជាអ្វីដែលខ្ញុំបានធ្វើ។ វាមិនសំខាន់ទេ ទោះគេខ្ពស់ជាង វាយចេញល្អជាង ឬក៏មានគ្រូបង្ហាត់ល្អក៏ដោយ។ ខ្ញុំមកដើម្បីការងាររបស់ខ្ញុំ ហើយខ្ញុំមកដើម្បីឈ្នះ»។
Alvarez ដែលឈ្នះ ៥៥ ដង ចាញ់ ១ ដង និងស្មើ ២ ដង ក្នុងនោះឈ្នះវាយឱ្យសន្លប់ ៣៧ ដង ត្រឡប់មកឡើងសង្វៀនវិញ កាលពីថ្ងៃសៅរ៍ ដែលវាមាន រយៈពេលតិចជាង ២ ខែ បន្ទាប់ពីឈ្នះ Callum Smith របស់ចក្រភពអង់គ្លេសក្នុងខែធ្នូ។
ក្រោយប្រកួតនេះ អ្នកផ្គូផ្គង Eddie Hearn និយាយថា អ្នកប្រដាល់ឆ្នើមវ័យ ៣០ ឆ្នាំ នឹងខិតខំប្រមូលខ្សែក្រវាត់របស់សហព័ន្ធប្រដាល់ពិភពលោកបន្ថែមទៀត ដោយការឡើងតទល់នឹង Billy Joe Saunders របស់អង់គ្លេស នាថ្ងៃទី ៨ ខែឧសភា។
Alvarez បន្តថា៖ «គ្មាននរណាម្នាក់ ធ្វើបានទេ។ ខ្ញុំចង់បង្កើតប្រវត្តិសាស្ត្រ។ មិនទាន់មានអ្នកប្រដាល់រូបណា ធ្វើបានឡើយក្នុងប្រភេទទម្ងន់ជាង ៧៥ គ.ក នេះ»។
ជាមួយគ្នានេះ Alvarez បានបដិសេធចំពោះការលើកឡើង ដែលថា ខ្លួនចង់ឱ្យគ្រប់គ្នាចងចាំក្នុងនាមជាអ្នកប្រដាល់ដ៏ឆ្នើមបំផុតម្នាក់ ដែលប្រទេសម៉ិកស៊ិក មិនធ្លាប់មាន។
Alvarez បានបន្ថែមខ្លីៗចុងក្រោយថា៖ «ខ្ញុំគោរពគ្រប់គ្នា តែខ្ញុំចង់បង្កើតប្រវត្តិសាស្ត្រខ្លួនឯង»៕ AFP/VN