ក្រុងស៊ីដនីៈ ប្រជាពលរដ្ឋអូស្ត្រាលីបានកោតសរសើរកីឡាការិនីវាយកូនបាល់ Ashleigh Barty ថាជា «មហាក្សត្រីថ្មីនៃកីឡាវាយកូនបាល់កាលពីថ្ងៃចន្ទធ្វើឲ្យនាងក្លាយជានារីទី ២ ដែលបានជាប់លេខ ១ នៅក្នុងពិភពលោក បន្ទាប់ពីកីឡាការិនី Evonne Goolagong Cawley។
ម្ចាស់ជើង The French Open រូបនេះបានជាប់លេខ ១ ក្រោយពីបានឈ្នះកីឡាការិនី Julia Goerges ដើម្បីលើកពាន Birmingham WTA កាលពីថ្ងៃអាទិត្យបង្ហាញពីការរះឡើងកាន់តែខ្លាំងចំពោះកីឡាការិនីវ័យ ២៣ ឆ្នាំរូបនេះដែលធ្លាប់ឈប់លេងកីឡាវាយកូនបាល់ទៅលេងកីឡាគ្រិកឃីត (Cricket)។
ជាមួយកីឡាការិនី Goolagong Cawley ដែលបានជាប់លេខ ១ ក្នុងរយៈពេលខ្លីនៅឆ្នាំ ១៩៧៦ នោះ កីឡាការិនី Barty បានយកគម្រូតាមកីឡាករវាយកូនបាល់សញ្ជាតិអូស្ត្រាលី ៣ រូបដូចជា John Newcombe, Pat Rafter និង Lleyton Hewitt ដែលពួកគេជាប់លេខ ១ នៅក្នុងពិភពលោក។
ប្រធានកីឡាវាយកូនបាល់អូស្ត្រាលីលោក Craig Tiley បាននិយាយពី «ស្នាដៃជាប្រវត្តិសាស្ត្រគួរឲ្យកត់សម្គាល់នេះ» ដោយប្រាប់ទូរទស្សន៍ TV 9 ថា៖ «វាពិតជារឿងមួយដ៏លំបាកមួយក្នុងការប្រកួតដើម្បីឈ្នះបែបនេះ ហើយនោះពិតជាអស្ចារ្យមែនទែន។ ខ្ញុំយល់ពីចិត្តរបស់នាង នាងមិនភ្ញាក់ផ្អើលចំពោះស្នាដៃនេះទេ។ នាងគ្រាន់តែចង់ត្រឡប់ទៅទីលានវាយកូនបាល់ និង ចង់បានការប្រកួតល្អមួយតែប៉ុណ្ណោះ»។
កីឡាការិនី Goolagong Cawley ដែលមានប្រវត្តិដូច Barty ដែរនោះបាននិយាយថាការរីកចម្រើនរបស់នាង «សឹងតែមិនអាចឈប់បានទេ»។
កីឡាការិនីរូបនេះបានប្រាប់ក្រុមអ្នកកាសែតថា៖ «Barty គឺជាអ្នកជាប់លេខ ១ ដ៏មានតម្លៃបំផុត ហើយការឈ្នះពាន the French នេះនឹងធ្វើឲ្យនាងកាន់តែមានទំនុកចិត្តថែមទៀត»។
Goolagong Cawley បានបន្ថែមថា៖ «ខ្ញុំមានមោទនភាពណាស់ដែលមានកីឡាការិនីជនជាតិភាគដើមម្នាក់ទៀតជាប់លេខ ១ ខាងកីឡាវាយកូនបាល់ក្នុងពិភពលោកបែបនេះ ហើយជាពិសេសគឺម្នាក់នោះជាសុភាពនារីវ័យក្មេងថែមទៀត»។
កាសែត Daily Telegraph នៅទីក្រុងស៊ីដនីបានហៅនាងថាជា «មហាក្សត្រីថ្មីនៃកីឡាវាយកូនបាល់» ដោយសរសេរថា៖ «ការមើលនាងឈ្នះការប្រកួតគឺដូចជាការមើលឃើញកីឡាករឆ្នើមមុនៗដែលមានភាពអស្ចារ្យបែបនេះដែរនាពេលកន្លងមក។ នាងបានធ្វើឲ្យពលរដ្ឋអូស្ត្រាលីមានអារម្មណ៍មោទនភាពព្រោះនាងជាពលរដ្ឋម្នាក់របស់យើង។ សូមឲ្យនាងគ្រងមកុដនេះឲ្យបានយូរអង្វែង»។
ចំណែកប្រព័ន្ធផ្សព្វផ្សាយជាតិអូស្ត្រាលី ABC បាននិយាយថាការរះឡើងរបស់នាងនេះគឺគ្មានអ្វីក្រៅតែពីការសមនឹងទទួលបាននោះទេក្រោយពីបរាជ័យនៅឆ្នាំ ២០១៦ ជានៅពេលដែលនាងបានឈប់ពីកីឡាគ្រិកឃីតនៅក្លិប Brisbane Heat ត្រឡប់ទៅលេងកីឡាវាយកូនបាល់នេះវិញ។
ទន្ទឹមនេះដែរប្រព័ន្ធផ្សព្វផ្សាយ Fox Sports Australia បាននិយាយតាម Twitter ថា៖ «សូមលើកដៃគោរពចំពោះព្រះមហាក្សត្រីថ្មីរបស់អ្នក»។
នៅពេលសួរថា តើពួកគេនឹងអបអរសាទរចំពោះនាងយ៉ាងដូចម្ដេចនោះ? កីឡាការិនី Barty បានប្រាប់អ្នកកាសែតថា៖ «និយាយដោយស្មោះត្រង់ទៅ យើងនឹងធុញទ្រាន់បំផុត។ យើងមានការរៀបចំពិធីខ្លះៗនៅពេលខាងមុខនេះ ហើយយើងត្រៀមខ្លួននឹងចូលរួម ប៉ុន្តែយើងពិតជាមានការញ៉ាំស្រាបៀរ ១ ឬ ២ កំប៉ុងប៉ុណ្ណោះ»៕ SN