ប៉ារីស៖ ក្រុម Bayern Munich បានចាប់ផ្ដើមយុទ្ធនាការការពារតំណែងជើងឯករបស់ខ្លួន នៅក្របខ័ណ្ឌ Champions League ជាមួយនឹងវិធីគំរាមមួយ ដោយការបំបាក់ក្រុម Atletico Madrid ៤-០ អំឡុងការប្រកួតកាលពីយប់ថ្ងៃពុធ ខណៈក្រុម Real Madrid រងបរាជ័យដ៏គួរឱ្យភ្ញាក់ផ្អើល។
រយៈពេល ២ ខែ ក្រោយស៊ុតបញ្ចូលទីគ្រាប់ជ័យជម្នះលើក្រុម Paris Saint-Germain ក្នុងវគ្គផ្ដាច់ព្រ័ត្រ នាក្រុងលីសបោន ជាថ្មីម្ដងទៀត សម្រាប់ការប្រកួតនៅពូល A នេះ Kingsley Coman ជួយឱ្យក្រុម Bayern បើកការនាំមុខ Atletico នៅនាទីទី២៨ ហើយក្រោយមក ក៏មានឱកាសប្រើបច្ចេកទេសផ្ទាល់ខ្លួន បន្ថែម ១ គ្រាប់ទៀត នៅនាទីទី៧២ ដើម្បីធានា ៣ ពិន្ទុឱ្យក្រុម នៅឯកីឡដ្ឋានទទេស្អាត Allianz Arena។
២ គ្រាប់ផ្សេងទៀត បានមកដោយសារ Leon Goretzka នៅនាទីទី៤១ និង Corentin Tolisso នៅនាទីទី៦៦ ដែលជាការស៊ុតពីចម្ងាយបញ្ចូលទីយ៉ាងល្អឥតខ្ចោះ។
ក្រោយការប្រកួតបញ្ចប់ទៅ កីឡាករសញ្ជាតិបារាំង Coman ប្រាប់ទូរទស្សន៍ Sky Sports ថា៖ «គ្រាប់ជ័យជម្នះ ក្នុងវគ្គផ្ដាច់ព្រ័ត្រ រដូវកាលមុន ជាកត្តាជំរុញទឹកចិត្តដ៏ល្អមួយ តែវាជាពេលវេលាកន្លងផុតហើយ តែពេលនេះ យើងរកបានគ្រាប់ថ្មីជាច្រើន នារដូវកាលនេះ»។
នេះជាការឈ្នះ ១២ លើកជាប់ៗគ្នារបស់ Bayern នៅ Champions League ខណៈលទ្ធផលនេះ ទំនងជាបរាជ័យដ៏អាក្រក់បំផុតសម្រាប់ Atletico ក្រោមការដឹកនាំរបស់លោក Diego Simeone។
បន្ទាប់ពីចប់ប្រកួតបើកឆាកដំបូងនេះ ក្រុម Bayern កំពុងឈរទី១ ក្នុងពូល A ដោយមាន ៣ ពិន្ទុ ខណៈក្រុមលេខ ២ Lokomotiv Moscow និងក្រុមលេខ ៣ Red Bull Salzburg មាន ១ ពិន្ទុដូចគ្នា ក្រោយប្រកួតស្មើគ្នា ២-២ នាទឹកដីអូទ្រីស ហើយក្រុម Atletico នៅបាតតារាង មាន ០ ពិន្ទុ។
រឿងមិនគួរឱ្យជឿសម្រាប់ប្រកួតបើកឆាកក្របខ័ណ្ឌអឺរ៉ុបនេះ គឺថា ក្រុមយក្សអេស្ប៉ាញដូចជា Real Madrid ដែលធ្លាប់ឈ្នះពាននេះ ច្រើនជាងក្រុមណាទាំងអស់រហូតដល់ទៅ ១៣ សម័យកាល បែរជាបរាជ័យក្រោមថ្វីជើងក្រុមទៅពីអ៊ុយក្រែន Shakhtar Donetsk នៅផ្ទះខ្លួនឯង ៣-២ ដែលនេះបង្ហាញឱ្យឃើញថា ក្រុមរបស់លោក Zinedine Zidane មានស្ដង់ដាឆ្ងាយពីក្រុម Bayern កម្រិតណា នាពេលនេះ។
នៅកីឡដ្ឋានបណ្ដោះអាសន្ន Alfredo di Stefano របស់ខ្លួន Real ត្រូវក្រុមភ្ញៀវ Shakhtar នាំមុខ ៣-០ តាំងពីវគ្គទី១ ម្ល៉េះហើយវគ្គទី២ ក៏មិនអាចវាយបកតាមស្មើវិញទៀត ធ្វើឱ្យយុទ្ធនាការនៅតំបន់អឺរ៉ុបរបស់ខ្លួន ចាប់ផ្ដើមជាមួយនឹងដំណើរទ្រេតទ្រោត ពោលគឺទទួលបាននូវលទ្ធផលខកចិត្តមួយ។
សម្រាប់ការប្រកួតក្នុងពូល B ជាមួយគ្នានេះដែរ នៅឯទឹកដី San Siro ក្រុមលំដាប់កំពូលអ៊ីតាលី Inter Milan ប៊ិះនឹងមានជោគវាសនាមិនខុសពី Real ប៉ុន្មានឡើយ តែសំណាងល្អ បានខ្សែប្រយុទ្ធ Romelu Lukaku មានឱកាសស៊ុតបញ្ចូលទីគ្រាប់ទី២ របស់ខ្លួននៅចុងម៉ោង ជួយឱ្យក្រុមតាមស្មើ Borussia Moenchengladbach របស់អាល្លឺម៉ង់ ២-២ វិញបាន៕ AFP/VN