.jpg)
លោក ភា សុភ័ក្ត្រា ពេលដឹកនាំក្រុមទ័ព ហើយពេលនេះលោកនឹងត្រូវដឹកនាំក្រុម Cambodia All Stars ដើម្បីជួប Muangthong។ ស្រេង ម៉េងស្រ៊ុន
ភ្នំពេញៈ ប្រការប្រមូលផ្តុំក្រុមជម្រើសលីកកំពូលកម្ពុជា ឬ Cambodia All Stars ដើម្បីត្រៀមការប្រកួតមិត្តភាពអន្តរជាតិជាមួយក្រុមខ្លាំងថៃ Muangthong United នៅពហុកីឡដ្ឋានជាតិ នាល្ងាចម៉ោង ៦:៣០ ថ្ងៃទី ៩ ខែ កុម្ភៈខាងមុខបានចុចឈ្មោះកីឡាករ ២៥ នាក់រួចហើយ។
បើទោះបីជាបញ្ជីឈ្មោះកីឡាករទាំង ២៥ នាក់នោះនៅមិនទាន់បានប្រកាសជាផ្លូវការដោយរង់ចាំការសម្រេចពីអ្នកចាត់ការទូទៅក្រុម និងការដាក់លិខិតស្នើសុំការអនុញ្ញាតពីបណ្តាក្លិបដែលជាអ្នកគ្រប់គ្រងកីឡាករទាំងនោះ ប៉ុន្តែលោក ភា សុភ័ក្ត្រា បានបង្ហើបថានៅក្នុងបញ្ជីឈ្មោះនោះមានកីឡាករបរទេសតែ ៤ នាក់គត់ ក្រៅពីនោះជាកីឡាករកម្ពុជា តែ ចាន់ វឌ្ឍនាកា និង ធារី ចន្ថាប៊ីន ដែលត្រៀមលេងនៅលីកកំពូលម៉ាឡេស៊ីរដូវកាលនេះមិនត្រូវបានកោះហៅឲ្យមកចូលរួមទេ។
លោក ភា សុភ័ក្ត្រា ដែលជាគ្រូបង្គោលក្រុមក្រសួងការពារជាតិ ផងនោះបានប្រាប់ភ្នំពេញប៉ុស្តិ៍កាលពីថ្ងៃអង្គារថា៖ «សម្រាប់ការប្រកួតមិត្តភាពនេះខ្ញុំបានជ្រើសរើសកីឡាករ ២៥ នាក់ក្នុងនោះមានបរទេស ៤ នាក់ហើយការដាក់បរទេសតិចនេះដោយសារខ្ញុំមើលឃើញថាកីឡាករខ្មែរ និងបរទេសមានគម្លាតពីគ្នាមិនឆ្ងាយប៉ុន្មានទេ ហើយម្យ៉ាងទៀតខ្ញុំចង់ផ្តល់ឱកាសឲ្យកីឡាករខ្មែរបានបង្ហាញខ្លួនផង ព្រោះកីឡាករខ្មែរទាំងនេះយើងបានជ្រើសរើសចេញពីសមិទ្ធផលកីឡានៅក្នុងលីកកំពូលឆ្នាំ ២០១៨ របស់យើង»។
យ៉ាងណាក៏ដោយលោក ភា សុភ័ក្ត្រា បានបង្ហើបថាការជ្រើសរើសកីឡាករខ្មែរភាគច្រើននេះក៏លោកមានការប្រថុយប្រថានប្រឈមទៅនឹងការលំបាកក្នុងការស្វែងរកលទ្ធផលដ៏ល្អផងដែរ សម្រាប់ការដឹកនាំក្រុម Cambodia All Stars ជាលើកដំបូងត្រៀមស្វាគមន៍ Muangthong United លើកនេះ ព្រោះក្រុមលីកកំពូលរបស់ថៃមួយនេះមានគម្លាតឆ្ងាយពីយើងដែរ ប៉ុន្តែការធ្វើបែបនេះគឺជាទស្សនៈ និងការយល់ឃើញរបស់គាត់ផ្ទាល់ ដើម្បីប្រយោជន៍ដល់កីឡាករខ្មែរ។
លោក ភា សុភ័ក្ត្រា បានបញ្ជាក់ថា៖ «ជាទស្សនៈ និងការយល់ឃើញរបស់ខ្ញុំគឺយើងគួរតែផ្តល់ឱកាសឲ្យកីឡាករខ្មែរបានច្រើនជាងកីឡាករបរទេស ហើយខ្ញុំនឹងនិយាយជាមួយកីឡាករខ្មែរយើងថានេះជាការប្រកួតដើម្បីបង្ហាញនូវទម្រង់លេង និងសមត្ថភាពរបស់ពួកគាត់ព្រោះមិនមែនមានតែភ្នែកអ្នកទស្សនាក្នុងស្រុកទេ តែអាចមានអ្នកតំណាងក្លិបមកពីក្រៅប្រទេសតាមមកមើលដែរ អ៊ីចឹងគេអាចឃើញកីឡាករខ្មែរ និងអាចទាក់ទងយកគាត់ទៅលេងនៅក្រៅប្រទេស ហើយនេះជារឿងមួយដែលយើងត្រូវតែចូលរួមជួយលើកកម្ពស់ដល់កីឡាករខ្មែរយើង»។
សម្រាប់កីឡាករបរទេសទាំង ៤ នាក់ដែលត្រូវបានជ្រើសរើសឲ្យចូលរួមជាមួយក្រុម Cambodia All Stars លើកនេះរួមមានកីឡាករ Private Mbarga ដែលលេងឲ្យក្លិបអាស៊ីអឺរ៉ុបកាលពីរដូវកាលមុន Anderson Zogbe របស់ណាហ្គាវើល Mohamed Hamza Allam របស់ក្រសួងការពារជាតិ និង Sugiyama Joichiro ដែលលេងឲ្យអង្គរថាយហ្គឺរនៅរដូវកាលឆ្នាំ ២០១៨។
បើតាមលោក ភា សុភ័ក្ត្រា បានឲ្យដឹងថាក្រុម Cambodia All Stars ទាំង ២៥ នាក់នេះគ្រោងនឹងចាប់ផ្តើមហ្វឹកហាត់នៅព្រឹកថ្ងៃទី ៤ ខែកុម្ភៈហើយនៅថ្ងៃទី ៦ ខែកុម្ភៈ ពួកគេត្រូវប្រកួតដកស្រង់បច្ចេកទេសជាមួយក្រុម African All Stars បន្ទាប់មកក្រុមមួយនេះនឹងត្រូវហ្វឹកហាត់ ហូកចុក និងស្នាក់នៅជុំគ្នា រហូតដល់ថ្ងៃប្រកួតមិត្តភាពអន្តរជាតិជាមួយក្រុម Muangthong United តែម្តង៕
