ក្រុងស៊ីដនីៈ លោក David Campese អតីតកីឡាករបាល់ឱបអូស្ត្រាលីដ៏ឆ្នើមម្នាក់បានសម្ដែងការខកចិត្តចំពោះការមិនបានជាប់ក្នុងបញ្ជីបេក្ខជនសម្រាប់តំណែងគ្រូបង្វឹកបាល់ឱបក្លិប NSW Waratahs ដោយសារ «គ្មានបទពិសោធគ្រប់គ្រាន់»។
កីឡាករ Campese ជាកីឡាករឆ្នើមម្នាក់ដែលតែងតែរកបានគ្រាប់បាល់គ្រប់ពេលនោះបាននិយាយតាមប្រព័ន្ធ Facebook ថាគាត់ត្រូវបានគេបដិសេធមិនទទួលយកជាបេក្ខជន ដើម្បីដឹកនាំបន្តពីលោក Daryl Gibson អតីតគ្រូបង្វឹកក្រុមជម្រើសជាតិនូវែលសេឡង់ All Black។
លោក Campese បានសរសេរពីយប់ថ្ងៃពុធថា៖ «ខ្ញុំបានទទួលការហៅទូរស័ព្ទដែលនិយាយថា ខ្ញុំមិនបានឈានទៅដល់បេក្ខជនចុងក្រោយ ២ នាក់សម្រាប់តំណែងគ្រូបង្វឹកនៅក្លិប Waratahs ទេ»។
អតីតកីឡាករបាល់ឱបរូបនេះបានបន្ថែមថា៖ «ហេតុផលរបស់ពួកគេគឺថា ខ្ញុំគ្មានបទពិសោធគ្រប់គ្រាន់ក្នុងការធ្វើជាគ្រូបង្វឹកនោះឡើយ»។
លោក Campese បានបន្ថែមថា៖ «វាហាក់ដូចថា បទពិសោធរបស់ខ្ញុំជាកីឡាករអន្តរជាតិ និងគ្រូបង្វឹកនៅគ្រប់កម្រិតនៃកីឡាបាល់ឱបកម្រិតអន្តរជាតិ កម្រិត Super 15 និងកម្រិតមូលដ្ឋានក្នុងរយៈពេល ៤០ ឆ្នាំមកនេះគឺមិនគ្រប់គ្រាន់ទាល់តែសោះ»។
លោក Gibson បានលាឈប់ជាគ្រូបង្វឹកនៅក្លិបដែលលេងនៅក្របខ័ណ្ឌបាល់ឱប Super Rugby កាលពីខែមិថុនាពោលគឺមុនពេលបញ្ចប់កុងត្រារបស់គាត់ ១ ឆ្នាំក្រោយពីមានរដូវកាលមួយពោរពេញដោយបញ្ហាជាច្រើនជុំវិញការបណ្ដេញកីឡាករ Israel Folau និងបញ្ហាជាមួយសហព័ន្ធបាល់ឱបអូស្ត្រាលីផងដែរ។
កាសែត Sydney Morning Herald បាននិយាយថាគ្រូបង្វឹកក្លិប NSW Rugby លោក Andrew Hore ត្រូវគេជឿថាកំពុងស្ថិតនៅប្រទេសជប៉ុនថ្មីៗនេះដើម្បីសម្ភាសបេក្ខជនដែលមានសក្តានុពលសម្រាប់តំណែងទំនេរមួយនេះ។
លោក Campese មានអារម្មណ៍ថា គាត់បានស្នើសុំជាច្រើនដោយនិយាយថា៖ «សំណើររបស់ខ្ញុំចំពោះក្លិប NSW Rugby គឺសូមឲ្យកែប្រែប្រព័ន្ធហ្វឹកហាត់បច្ចុប្បន្ន និងបណ្ដាក់ទុនលើប្រព័ន្ធថ្មីមួយដែលឆ្លុះបញ្ចាំងពីកម្រិតកំពូលរហូតដល់កម្រិតមូលដ្ឋាន»។
លោក Campese បានបញ្ជាក់ថា៖ «តើអ្នករំពឹងថានឹងផលិតបានកីឡាករដែលមានទេពកោសល្យដោយគ្មានការបណ្ដាក់ទុនក្នុងប្រព័ន្ធទាំងនេះយ៉ាងដូចម្ដេច?»។
អតីតកីឡាករបាល់ឱបរូបនេះបានបន្តថា៖ «ខ្ញុំបានសុំឲ្យមានការផ្លាស់ប្ដូរទម្រង់លេងដែលមានលក្ខណៈនាំមកនូវជ័យជម្នះតាមរយៈប្រព័ន្ធហ្វឹកហាត់ថ្មីដែលលើកទឹកចិត្តឲ្យមានការប្រយុទ្ធ រត់ និងហ៊ានទទួលយកហានិភ័យ»។
ក្លិប NSW Rugby បានព្យាយាមយ៉ាងខ្លាំងកាលពីរដូវកាលមុន ប៉ុន្តែនៅតែបានចំណាត់ថ្នាក់ទី ១២ នៅក្នុងចំណោម ១៥ ក្រុម៕ SN