ភ្នំពេញ៖ ស្ថានីយទូរសទស្សន៍ CNC បានឈានដល់ការបង្កើតឲ្យមានព្រឹត្តិការណ៍ប្រដាល់ថ្មីមួយទៀត នៅលើសង្វៀនរបស់ខ្លួន ឈ្មោះថា ប្រដាល់ជើងឯកអន្តរជាតិ «គុនខ្មែរអធិរាជកម្លាំងរេដអាន» បន្ទាប់ពីម្ចាស់សង្វៀនមួយនេះ បានទទួលការទុកចិត្ត ពីម្ចាស់ឧបត្ថម្ភធំថ្មីមួយទៀត គឺក្រុមហ៊ុនភេសជ្ជៈប៉ូវកម្លាំងរេដអាន។
ការប្រកួតគុនខ្មែរអធិរាជកម្លាំងរេដអាន ត្រូវបានប្រកាសជាផ្លូវការនៅក្នុងសន្និសីទកាសែត នៅ CNC កាលពីព្រឹកថ្ងៃព្រហស្បតិ៍ ហើយព្រឹត្តិការណ៍នេះ នឹងចាប់ផ្តើមបើកសករាជថ្មីរបស់ខ្លួនចាប់ពីថ្ងៃអាទិត្យនេះ ចន្លោះពីព្រឹកម៉ោង ៨ ដល់ម៉ោង ១០:៣០ ហើយទាំង CNC ព្រមទាំងម្ចាស់ឧបត្ថម្ភ និងសហព័ន្ធកីឡាប្រដាល់គុនខ្មែរបានចាត់ទុកថា ព្រឹត្តិការណ៍ប្រដាល់ថ្មីនេះ នឹងចូលរួមយ៉ាងសំខាន់ក្នុងការជួយលើកស្ទួយវិស័យកីឡាប្រដាល់គុនខ្មែរឲ្យកាន់តែមានភាពល្បីល្បាញនៅលើឆាកអន្តរជាតិ។
លោក នាង វាសនា តំណាងក្រុមហ៊ុនភេសជ្ជៈរេដអាន បានថ្លែងថា៖ «ព្រឹត្តិការណ៍ គុនខ្មែរអធិរាជកម្លាំងរេដអាន ជាកម្មវិធីប្រដាល់ដែលរេដអាន បានរៀបចំដំបូងនៅ CNC ហើយយើងពិតជាមានមោទនភាពដ៏ក្រៃលែងដែលបានរួមចំណែកជាមួយគ្រប់ភាគីពាក់ព័ន្ធទាំងអស់ ក្នុងការបន្តបេសកកម្មលើកស្ទួយកីឡាគុនខ្មែរយើងឲ្យកាន់តែលេចធ្លោថែមទៀត នៅលើឆាកអន្តរជាតិ។ ក្រុមហ៊ុនយើងមានការតាំងចិត្តថា នឹងបន្តចូលរួមចំណែកធ្វើរឿងកាន់តែអស្ចារ្យថែមទៀត សម្រាប់វិស័យកីឡាប្រដាល់គុនខ្មែររបស់យើង នៅក្នុងឆ្នាំថ្មី ២០២០ នេះ»។
តាមខ្លឹមសារដែលត្រូវបានប្រកាសនៅក្នុងសន្និសីទកាសែតនោះបានឲ្យដឹងថា គុនខ្មែរអធិរាជកម្លាំងរេដអាន នឹងមានរៀបចំការប្រកួតមិត្តភាពអន្តរជាតិចំនួន ២ សប្តាហ៍សិនមុននឹងឈានទៅដល់ការរៀបចំឲ្យមានការប្រកួតដណ្តើមខ្សែក្រវាត់រេដអាន ក្នុងទម្ងន់ ៦៣,៥ គីឡូក្រាម រវាងកីឡាករកម្ពុជា ៤ នាក់ និងថៃ ៤ នាក់ ដែលនឹងចាប់ផ្តើមពីថ្ងៃទី ១៥ ខែមីនា។
ចំណែកការប្រកួតបើកឆាកនៅថ្ងៃអាទិត្យនេះ គឺមានការប្រកួតគូក្នុងស្រុក ៣ គូ និងការប្រកួតមិត្តភាពអន្តរជាតិ ២ គូ ដោយក្នុងនោះកីឡាករ វង្ស វិឆ័យ ត្រូវជួបថៃ Phou Sangyai ក្នុងទម្ងន់ ៦៩ គ.ក្រ ហើយជើងខ្លាំង រឿង សោភ័ណ្ឌ ត្រូវប៉ះជនជាតិអ៊ីរ៉ង់ Shaho Gheisarian ក្នុងទម្ងន់ ៧១ គីឡូក្រាម។
លោក ហួរ រតនៈ ប្រធានទីផ្សារ និងជាតំណាងរបស់ CNC បានថ្លែងថា៖ «គុនខ្មែរអធិរាជកម្លាំងរេដអាន ជាកម្មវិធីប្រកួតថ្មីមួយទៀត សម្រាប់ពួកយើងទាំងអស់គ្នា ក្នុងឆ្នាំ ២០២០ នេះ ដែល CNC និង RED ANT ក្រោមការជួយជ្រោមជ្រែងដោយសហព័ន្ធកីឡាប្រដាល់គុនខ្មែរ បានបង្កើតឡើង គឺពួកយើងបានកំពុងតែជួយគ្នាទៅវិញទៅមកលើទិសដៅលើកស្ទួយ ក៏ដូចជាអភិវឌ្ឍប្រដាល់គុនខ្មែរឲ្យកាន់តែរីកចម្រើន និងពង្រីកមុខមាត់ថែមទៀតលើឆាកអន្តរជាតិ»។
ចំណែកលោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានជំរុញឲ្យមន្រ្តីគណៈកម្មការរបស់លោកត្រូវធ្វើការឲ្យបានហ្មត់ចត់ ពិសេសត្រូវបំពេញការងារ និងកាត់សេចក្តីឲ្យមានតម្លាភាព និងយុត្តិធម៌ គឺមិនត្រូវមានការប្រកាន់បក្ខពួកនិយមជាដាច់ខាត ដើម្បីធ្វើឲ្យព្រឹត្តិការណ៍ប្រដាល់ថ្មីនេះ ដំណើរការទៅបានរលូន និងទទួលបានជោគជ័យដោយមានអ្នកគាំទ្រច្រើន៕