ក្រុងម៉ា្រឌីដ៖ យុវកីឡាករ Joao Felix នឹងដឹកនាំភារកិច្ចនៅយប់ថ្ងៃពុធនេះ ដើម្បីជួយឲ្យក្រុម Atletico Madrid សងសឹកក្រុម Juventus និងសត្រូវចាស់របស់ពួកគេ គឺខ្សែប្រយុទ្ធ Cristiano Ronaldo ក្នុងការប្រកួតបើកឆាកក្របខ័ណ្ឌ Champions League។
កីឡាករ Felix ដែលគេរំពឹងថា ជាអ្នកបន្តវេនកីឡាករ Ronaldo នោះនឹងបង្ហាញខ្លួនក្នុងការប្រកួតកំពូលនៅអឺរ៉ុប ជាពេលកីឡាករព័រទុយហ្គាល់ទាំង ២ រូបនេះ នឹងជួបគ្នានៅក្នុងទឹកដីរបស់ក្រុម Atletico ខណៈកីឡាករ Felix កំពុងអន្ទះសាចង់សងសឹកម្ចាស់ពានរង្វាន់ស្បែកជើងមាស ៥ ជំនាន់រូបនេះយ៉ាងខ្លាំង។
សូមរំឭកថា ក្រុម Juventus បានទម្លាក់ក្រុម Atletico ក្នុងការប្រកួតកាលពីឆ្នាំមុន ខណៈកីឡាករ Ronaldo រកបាន ៣ គ្រាប់ ដើម្បីលុបចោលការចាញ់ ២-០ របស់ពួកគេនៅជើងទី ១ ហើយបានធ្វើឲ្យម្ចាស់ជើងឯកអ៊ីតាលីនេះឡើងវគ្គ ៨ ក្រុមចុងក្រោយ។
ពេលនោះអតីតកីឡាករនៅក្លិប Real Madrid រូបនេះ ទទួលបានការអបអរពីអ្នកគាំទ្រនៅកីឡដ្ឋាន Allianz របស់ក្លិប Juventus យ៉ាងខ្លាំង ហើយឥឡូវកីឡាករ Felix ចង់សងសឹកនឹងកីឡាករឆ្នើមរូបនេះ។
កីឡាករ Felix វ័យ ១៩ ឆ្នាំ ត្រូវបានសរសើរថាជា Ronaldo ថ្មី ក្រោយពីមានរដូវកាលល្អនៅក្លិប Benfica កាលពីឆ្នាំមុន ដោយសាររូបគេរកបាន ២០ គ្រាប់ ខណៈក្លិបម្ចាស់ជើងឯកអឺរ៉ុប ២ ជំនាន់នេះ បានឈ្នះពានរង្វាន់ Primeira Liga និងបានឡើងដល់វគ្គ ៨ ក្រុមចុងក្រោយ នៃក្របខ័ណ្ឌ Europa League។
អតីតអ្នកចាត់ការក្លិប Madrid លោក Jose Mourinho ជឿថា ក្រុម Atletico បានទិញ «កីឡាករល្អមួយរូប» ដែលពួកគេហ៊ានចំណាយប្រាក់ច្រើនបំផុតសម្រាប់ក្លិបនេះរហូតដល់ ១២៦ លានអឺរ៉ូ (ស្មើ ១៤២ លានដុល្លារ)។
លោក Mourinho និយាយថា៖ «ខ្ញុំគិតថា គាត់អាចជាកីឡាករល្អព្រោះគាត់ហាក់ដូចជាមានបុគ្គលិកលក្ខណៈល្អ»។
លោក Mourinho បានបន្ថែមថា៖ «គាត់នៅក្នុងក្រុមល្អមួយ ដែលសម្បូរកីឡាករមានបទពិសោធ និងគ្រូបង្វឹកមានផែនការច្បាស់លាស់ ហើយក្រុម នេះអាចជាកន្លែងល្អមួយសម្រាប់ការរីកចម្រើនរបស់គាត់»។
Ronaldo គឺជាកីឡាករឆ្នើមមួយរូបក្នុងពិភពលោក និងជារកបានគ្រាប់បាល់ច្រើនជាងគេបំផុតមួយរហូតដល់ ១២៦ គ្រាប់ ខណៈរូបគេគ្រោងនឹងបន្ថែមគ្រាប់បាល់ទៀតនៅក្នុងការប្រកួតនេះ។
នៅរាត្រីថ្ងៃពុធនេះ កីឡាករ Felix មានឱកាសកែប្រែប្រវត្តិរកគ្រាប់បាល់របស់ខ្លួនជាមួយការបន្ថែមគ្រាប់បាល់ទៀតក្នុងការប្រកួតបើកឆាក Champions League នេះផងដែរ។
កីឡាករ Felix និយាយថា៖ «ខ្ញុំនៅទីនេះ ដើម្បីសរសេរពីប្រវត្តិផ្ទាល់ខ្លួន ហើយកីឡាករ Cristiano គឺជារឿងផ្សេងខុសពីរឿងរបស់ខ្ញុំ»៕ AFP/SN