ក្រុងឡុងដ៍: លោក Frank Lampard បាននិយាយថា កីឡាករ Kai Havertz ទើបតែចាប់ផ្ដើមកម្ដៅម៉ាស៊ីនទេ ក្រោយពីមានលទ្ធភាពស៊ុតបញ្ចូលទីដល់ទៅ ៣ គ្រាប់ ជួយក្រុមតោខៀវ Chelsea បំបាក់ក្រុម Barnsley ៦-០ នៅទឹកដីខ្លួនឯង ឡើងទៅជុំទី៤ ក្នុងកម្មវិធី League Cup ខណៈក្រុម Arsenal ក៏កក់កៅអីនៅវគ្គបន្ទាប់ដូចគ្នាដែរ ជាមួយនឹងជ័យជម្នះ ២-០ លើក្រុមម្ចាស់ផ្ទះ Leicester City។
ខ្សែបម្រើប្រយុទ្ធស្លាប Havertz បានប្រឹងប្រែងធ្វើយ៉ាងណា ដើម្បីទទួលបានការចាប់អារម្មណ៍ សម្រាប់ ២ ប្រកួតដំបូងរបស់ខ្លួន នៅក្របខ័ណ្ឌ Premier League ចាប់តាំងពីធ្វើការផ្ទេរពីក្រុមនៅអាល្លឺម៉ង់ Bayer Leverkusen ជាមួយនឹងទឹកប្រាក់ ដែលគេដឹង ៧១ លានផោន ($៩៤ លាន) ពោលគឺជាតម្លៃខ្ពស់បំផុត ក្នុងកញ្ចប់ទឹកប្រាក់ ២០០ លានផោន (ប្រមាណ $២៥៥ លាន) របស់ក្រុម Chelsea ដែលចំណាយក្នុងទីផ្សារដោះដូរកីឡាករ នារដូវក្ដៅនេះ។
តែកីឡាករសញ្ជាតិអាល្លឺម៉ង់វ័យ ២១ ឆ្នាំ គឺជាម្នាក់ប៉ុណ្ណោះ ក្នុងចំណោមកីឡាករ ៣ រូប ដែលដណ្ដើមបានកន្លែងរបស់ខ្លួនបានវិញ ក្រោយក្រុមទទួលបរាជ័យ ២-០ ក្រោមថ្វីជើងក្រុម Liverpool កាលពីថ្ងៃអាទិត្យ ហើយការផ្ដល់ឱកាសរបស់លោក Lampard នេះ ដូចជួយឲ្យគេ ស៊ុតបាន ៣ គ្រាប់ដ៏សំខាន់ជាលើកដំបូង ក្នុងអាជីព។
គ្រូបង្វឹកក្រុម Chelsea លោក Lampard បាននិយាយថា៖ «ខ្ញុំសប្បាយចិត្តជាមួយ Havertz។ វាគឺអ្វីដែលខ្ញុំចង់បានពីគេ។ រូបគេអត់បានធ្វើការប្រកួតមុនរដូវកាលបើក ដូច្នេះ ខ្ញុំចង់ឱ្យគេមានពេលកាន់តែច្រើនជាមួយមិត្តរួមក្រុម នៅលើទីលាន ដើម្បីរៀនសូត្រពីរបៀប ដែលយើងលេង និងគាបសង្កត់។ វាជាយប់ដ៏ពិសេសអស្ចារ្យរបស់ Havertz»។
Havertz ត្រូវបានដូរចេញនៅ ២៥ នាទី មុនចប់ការប្រកួតផ្លូវការ តែពេលនោះ រូបគេបានសម្រេចហែតទ្រីក (ស៊ុត ៣ គ្រាប់) រួចហើយ ដោយទាំង ៣ គ្រាប់នោះ កើតឡើងនៅនាទីទី២៨ ៥៥ និង៦៥។
ខ្សែការពារថ្មី ២ រូប គឺ Thiago Silva និង Ben Chilwell ក៏ធ្វើការបង្ហាញវត្តមានលើកដំបូងរបស់ខ្លួនជាមួយក្រុមតោខៀវផងដែរ ខណៈខ្សែប្រយុទ្ធ Tammy Abraham និងខ្សែបម្រើ Ross Barkley បានទាញផលពីការលេងជម្រើសដំបូង ដែលកម្រនឹងទទួលបាន ដោយការធ្វើឲ្យឈ្មោះខ្លួនមាននៅលើផ្ទាំងដាក់ពិន្ទុ ជាមួយនឹងការស៊ុតបញ្ចូលទីបានម្នាក់ ១ គ្រាប់ ដូចគ្នា។
ក្រុម Chelsea នឹងឡើងទៅប្រឈមជាមួយគូរវាងក្រុម Tottenham Hotspur និង Leyton Orient ដែលត្រូវបានរំសាយការប្រកួតកាលពីថ្ងៃអង្គារ ដោយសារមានករណីឆ្លងវីរុសកូសរ៉ូណា ក្នុងចំណោមកីឡាកររបស់ក្រុមម្ចាស់ផ្ទះ Leyton។
ចំណែកឯគ្រាប់បាល់ នៅកីឡដ្ឋាន King Power ដែលកើតឡើងដោយកីឡាករ Christian Fuchs របស់ក្រុម Leicester ធ្វើឱ្យចូលទីខ្លួនឯង នៅនាទីទី៥៧ និងការស៊ុតរបស់ខ្សែប្រយុទ្ធវ័យក្មេង Eddie Nketiah នៅនាទីទី៩០ គ្រាប់គា្រន់ជួយក្រុម Arsenal ដែលដឹកនាំដោយលោក Mikel Arteta បានឆ្លងទៅជុំបន្តដែរ។
ក្រុម Arsenal ទំនងជាត្រូវប្រឈមជាមួយក្រុម Liverpool នៅទឹកដី Anfield ដល់ទី ២ លើក ក្នុងរយៈពេល ៣ ថ្ងៃ នៅសប្ដាហ៍ក្រោយ ដោយដំបូងត្រូវប៉ះគ្នានៅក្របខ័ណ្ឌ Premier League ហើយបន្ទាប់មកអាចនឹងជួបគ្នានៅក្នុងវិធី League Cup នេះ បើក្រុមរបស់លោក Jurgen Klopp ទម្លាក់ក្រុម Lincoln នៅថ្ងៃនេះបាន។
ក្រោយការប្រកួតបញ្ចប់ទៅ លោក Arteta បាននិយាយថា៖ «វាតឹងតែងណាស់ ក្នុងបានសិទ្ធិទៅអឺរ៉ុប និងពិភពលោក។ ត្រៀមខ្លួនឱ្យល្អ ហើយចាំមើលថា តើនឹងទៅជាយ៉ាងម៉េច?»៕ AFP/VN